70-ÅRSJUBILEUM: Åge Aleksandersen & Sambandet spelte sist på Tysnesfest i 2015, og er i år eit av høgdepunkta torsdagen. (Arkivfoto: Vidar Alfarnes)
70-ÅRSJUBILEUM: Åge Aleksandersen & Sambandet spelte sist på Tysnesfest i 2015, og er i år eit av høgdepunkta torsdagen. (Arkivfoto: Vidar Alfarnes)

– Ein folkeleg torsdag

Tysnesfest-torsdagen inneheld alt frå trønderrock og Hallelujah-comeback, til såtekonsert og blomstershow.
Publisert 07.07.2019 kl. 15.00.

– Det er kanskje noko me pleier å seia, men i år er det nok tidenes torsdag på Gjerstad arena, fortel Øystein Vaage, som er dagleg leiar for Tysnesfest.

Sjølv om Tysnesfest-programmet vert sparka i gang allereie onsdag, er det på torsdag at det er dei fyrste kveldskonsertane på Gjerstad. Vaage omtalar kveldsprogrammet som folkeleg, og fortel at det er populære artistar som skal stå på scenen.

– Normalt sett er det torsdagskvelden me sel færrast billettar til, men i år ligg billettsalet til torsdagen langt framfor salet til fredags- og laurdagskvelden, fortel Vaage.


Trønderrock

Torsdag kveld er det trønderrocken som inntek Gjerstad, med D.D.E. og Åge Aleksandersen & Sambandet. Det er desse banda som er headlinerar torsdag, og begge er kjenningar for Tysnesfest-publikummet. Begge banda var til stades på festivalen i 2015, og D.D.E var også innom i 2010.

Åge Aleksandersen kjem til Tysnes som ein del av jubileumsturnéen «Åge & Sambandet 3570». Her feirar den folkekjære artisten både at han har fylt 70 år i 2019, og at det er 35 år sidan albumet «Levva Livet», som er Aleksandersen sitt mest suksessfulle album, vart gjeve ut.

D.D.E. fekk i mars heidersprisen på Spelemannprisutdelinga, og Namsos-bandet har også vorte ein rutinert gjeng. Bjarne Brøndbo og gjengen har spelt saman sidan 1992, og opplevde på 90-talet stor suksess med låtar som «Rai Rai», «Det Går Likar No», «Vinsjan På Kaia» og «E6».


Comeback

Ein annan kjærkomen retur til Gjerstad, står kvartetten Lind+Nilsen+Fuentes+Holm for. Det var i 2006 Espen Lind, Kurt Nilsen, Alejandro Fuentes og Askil Holm turnerte i lag for fyrste gong, og dei fekk mellom anna ein stor hit med ein cover-versjon av Leonard Cohen-låten «Hallelujah».

Turnéen i 2006 vart følgd opp med ny turné i 2009, der dei mellom anna tok turen innom Tysnesfest. No, 10 år seinare, legg dei ut på ny turné, og er ein del av torsdagskvelden under Tysnesfest.

– Lind+Nilsen+Fuentes+Holm har ein viktig betydning for oss. Det var då me hadde dei på besøk i 2009 at me verkeleg vart ein stor festival, fortel Vaage.


Highasakite-medlemmar

Til å fylla ut konsertprogrammet torsdagen, har Tysnesfest fått med Stord-bandet Novocaine, sunnmøringane i Rotlaus og «supergruppa» LÖV. Sistnemnde består av Marte Eberson og Øystein Skar, som fram til i fjor var ein del av den populære gruppa Highasakite. Med seg i LÖV har dei fått tidlegare «The Voice»-vinnar Martin Halla.

Ørsta-bandet Rotlaus er fronta av Bjørn Marius Øyehaug, som er tidlegare trommeslagar i Vassendgutane. Dei omtalar seg sjølve som eit av dei mest ettertrakta live-banda i landet, og har ein fullspekka festival-sommar framfor seg, med mellom anna besøk til countryfestivalen på Breim og Trollrock på Beitostølen, i tillegg til Tysnesfest.

Alt i alt er Øystein Vaage godt nøgd med bookinga til torsdagen.

– Det er artistar og band som treffer eit vidt spekter av alders- og samfunnsgrupper. Det er ein folkeleg torsdag, seier den daglege leiaren.


Såtekonsert

– Me får stadig fleire band som tek kontakt og ynskjer å spela på Såto, fortel Vaage.

Såtekonserten har vorte eit populært innslag under Tysnesfest, og dei siste to åra har kring 2.400 personar funne vegen til Tysnes sin høgaste fjelltop for ei unik konsertoppleving.

I år er det hardrockbandet Skambankt som skal spela «unplugged» på Såto, og dei fylgjer med det i fotspora til Bigbang, Sivert Høyem og Sondre Justad, som er blant artistane som tidlegare har spelt på fjelltoppen.

– Me får gode tilbakemeldingar frå dei banda som spelar på Såto, og det er ingen band som ikkje har skrytt av opplevinga, seier Vaage.


Ikkje berre musikk

For dei som er ekstra tidleg ute på Såto torsdagen, er det høve til å delta på Pop-In Yoga på toppen med medlemmar av Bergen Fjellyoga. Kring 50 fjellgåarar deltok då såteyogaen vart arrangert for fyrste gong i fjor.

– Eg anbefaler yoga spesielt til folk som går tur i fjellet. Det hjelper på balanse og smidigheit. I tillegg kan det hjelpa deg å finna deg sjølv, sa instruktør Gørhild Aakre til «Tysnes» etter yogaen i fjor sommar.

Ein ny post på programmet i år skal gå føre seg om bord på MS «Sunnhordland». I år er det 100 år sidan Tysnes-forfattaren Johannes Heggland vart fødd, og i slutten av juni skal dette jubiléet markerast. Men det vert også ei markering under Tysnesfest, når forfattar og språk- og litteraturvitar Ottar Grepstad kjem for å prata om Johannes Heggland sine bøker.

Dette er eit samarbeid mellom Tysnesfest og komitéen som jobbar med Heggland-jubiléet, og Øystein Vaage fortel at dette innslaget vart snakka om allereie i 2017, men at det passar veldig godt at dei får Grepstad med på programmet i år.

– I høve jubiléet er det heilt naturleg å heidra Johannes Heggland på Tysnesfest i år, seier Vaage.


Blomster-Finn

Medan kjente kulturprofilar som Tande P, Hans-Wilhelm Steinfeld og Torkjell Berulfsen tidlegare har vore på Tysnesfest, er det i år ingen ringare enn Finn Schjøll, kjend som Blomster-Finn, som kjem til festivalen.

På ettermiddagen torsdag skal han halda blomstershow i Bermudateltet. Arrangementet er i samarbeid med Tysnes Blomster og Interiør, og det er Torstein Hatlevik som ynskjer velkomen til showet.

– Eg trur Finn vert populær, seier Vaage.


TRØNDERAR: Endå meir trønderrock vert det når også D.D.E. skal stå på scenen torsdagen. Den populære Namsos-gruppa har spelt på Tysnesfest fleire gongar tidlegare. (Foto: Line Berre)
TRØNDERAR: Endå meir trønderrock vert det når også D.D.E. skal stå på scenen torsdagen. Den populære Namsos-gruppa har spelt på Tysnesfest fleire gongar tidlegare. (Foto: Line Berre)
COMEBACK: Dagleg leiar for Tysnesfest, Øystein Vaage, fortel at konserten med Lind+Nilsen+Fuentes+Holm for ti år sidan var eit definerande augeblikk for Tysnesfest. (Arkivfoto: Jørgen Haaland)
COMEBACK: Dagleg leiar for Tysnesfest, Øystein Vaage, fortel at konserten med Lind+Nilsen+Fuentes+Holm for ti år sidan var eit definerande augeblikk for Tysnesfest. (Arkivfoto: Jørgen Haaland)
SÅTEYOGA: Som i fjor arrangerar Bergen Fjellyoga yoga på Tysnessåto før såtekonserten. I fjor var det kring 50 personar som deltok på fjelltoppen. (Arkivfoto: Vetle Mikkelsen)
SÅTEYOGA: Som i fjor arrangerar Bergen Fjellyoga yoga på Tysnessåto før såtekonserten. I fjor var det kring 50 personar som deltok på fjelltoppen. (Arkivfoto: Vetle Mikkelsen)
BLOMSTERSHOW: Finn Schjøll kjem til Tysnes for å halda «Finn’s Blomstershow» i Bermudateltet.» (Pressefoto)
BLOMSTERSHOW: Finn Schjøll kjem til Tysnes for å halda «Finn’s Blomstershow» i Bermudateltet.» (Pressefoto)

Siste saker Gå til framsida

Fekk oppleva barndomsbasaren igjen

Arild Lundeflaten frå Jeløy har ikkje vore på basar sidan han var liten gut, men minna har sete godt. Torsdag fekk han sjansen til å vera med på den årlege storhendinga i Lunde.

Tall Ships Races til Bergen

Frå søndag til onsdag blir Bergen igjen fylt med nokre av dei største og vakraste seglskutene i verda, når The Tall Ships Races går av stabelen. Mat, kulturinnslag og ei rekkje aktivitetar står på programmet, og truleg vert det nok ein gong sild i tønne-tilstandar i byen mellom dei sju fjell. Før skipa kjem til Bergen, skal dei mellom anna ha stopp ved Rosendal, Leirvik og Bekkjarvik,...