SUPERSTJERNE: Matoma kjem tilbake til Tysnesfest, og i bagasjen har han fleire låtar med godt over 100 millionar avspelingar på Spotify. (Arkivfoto: Lena Helvik)
SUPERSTJERNE: Matoma kjem tilbake til Tysnesfest, og i bagasjen har han fleire låtar med godt over 100 millionar avspelingar på Spotify. (Arkivfoto: Lena Helvik)

Frå USA-turné til Gjerstad arena

Tysnesfest-fredagen har eitt spreitt program med både «Ta sjansen», matgilde og ein tiåring i fokus på Gjerstad.
Publisert 08.07.2019 kl. 12.00.

Fredagen under Tysnesfest er ein dag med eit variert kveldsprogram på Gjerstad arena. Det vert mellom anna høg internasjonal klasse når to av dei største artistane i Norge skal på scenen.


Høge strøymetal

Headlinerane Aurora og Matoma har begge hatt store internasjonale hitar. Matoma, som avsluttar kvelden, har mellom anna hatt stor suksess med låten «All Night» saman med det britiske bandet The Vamps, som førebels er avspelt over 394 millionar gongar på Spotify og 49 millionar gongar på Youtube.

«All Night» har saman med dei andre største hitane «False Alarm», «Old Thing Back», «Running Out» og «Party On The West Coast» over éin milliard strøymingar til saman på Spotify, noko som seier ein del om den internasjonale statusen til Matoma.

Det gjer også turné-kalenderen hans, som viser eit tettpakka internasjonalt program i sommar. I løpet av sommaren skal han spela på festivalar både i Dover, Chicago, Milwaukee, Las Vegas, Boston og San Francisco i USA, samt Calgary, Kiev og Berlin.


Os-artist

Aurora er også eit kjend artistnamn for dei fleste. Os-jenta slo ordentleg gjennom i 2015 med låten «Running With The Wolves», samt ein cover-versjon av Oasis-songen «Half The World Away». Sistnemnde vart mellom anna særs populær i Storbritannia, der den nådde 11. plass på den britiske hitlista.

Både Aurora og Matoma har spelt på Tysnesfest tidlegare. Aurora var på Gjerstad i 2014, og har klatra høgt på stjernehimmelen sidan den gong. Matoma spelte på Gjerstad året etter, og var godt nøgd med å underhalda Tysnes-publikummet den gongen.

– Det er morosamt å spela på mindre stader. Det krev meir av meg som artist, både energimessig og spelemessig, sa Matoma til «Tysnes» for tre år sidan.


Tiåring

Etter at Aurora har gjort sitt på Gjerstad, er det tid for Matoma, men mellom dei to superstjernene er det ein unggut som får moglegheita til å visa seg fram for festivalpublikummet.

Ti år gamle Jonas Hansen frå Haugesund går under artistnamnet DJ Axillar, og går på scenen på Gjerstad kring midnatt. Dagleg leiar for Tysnesfest, Øystein Vaage, fortel at han diskuterte med Matoma om festivalen skulle gje tiåringen speletid. Matoma likte idéen, og festival-leiinga fann plass til den unge DJ-en på eit særs gunstig tidspunkt.

– Det er ein gøy ting å gjera, og det er kjekt å gje han denne sjansen. Han er ikkje sjølv den som seier mest, men han synest det er kjekt å skulla varma opp for Matoma, fortel Vaage.


Rockekveld

Etter å ha spelt på Tysnesåto torsdagen, skal Skambankt spela på Gjerstad fredagen. Terje Winterstø Røthing er kanskje mest kjend som gitarist i Kaizers Orchestra, men han har også hatt stor suksess som frontfigur i Skambankt.

– Skambankt er vårt rockealibi i år. Dei er ganske hardtslåande, men samtidige melodiøse, seier Vaage.

Eit anna rockealibi som skal på scenen same kveld, om enn noko mildare rock enn Skambankt, er dei britiske veteranane i 10cc. Bandet vart stifta i 1972, og vert under Tysnesfest det einaste utanlandske bandet på scenen. Gruppa er mellom anna kjent for låtane «I’m Not In Love», «The Things We Do For Love» og reggae-hiten «Dreadlock Holiday».

– Det er eit av banda me har booka som eg har fått mest positive tilbakemeldingar på, seier Vaage.

Ei anna populær gruppe som speler på Gjerstad denne dagen, er Valdres-bandet Staut, som i 2016 spelte i Kjevikjo.


«Ta sjansen»

For femte året på rad vert det «Ta sjansen»-konkurranse i Våge, og i år er dette arrangementet flytta frå laurdag til fredag.

– Dette er eit arrangement som er blitt større og større for kvart år, det ser me både på publikumsmengda og talet på deltakarar, fortalde Vaage då arrangementet vart lansert i mars.

I fjor var det Yngve Vevatne som vann konkurransen, og Vaage har varsla at han veit om fleire deltakarar som ynskjer revansje for Vevatne sin siger i fjor.


Matgilde og sentrumsliv

Fredagen er, i tillegg til «Ta sjansen» og kveldskonsertane på Gjerstad, ein av dei mest innhaldsrike dagane under Tysnesfest. Tentipi-teltet på E-brygga vert både fredag og laurdag ein freistande stad for dei mest matglade. Gjennom konseptet Tysnes matgilde, skal fleire lokale matprodusentar, både frå Tysnes og nabokommunane, visa seg fram for publikum.

Av matprodusentar kjem mellom anna Garden på Dalland, Myrdal Gard, Tveitakjerring, Jordbær frå Årbakka og Villa Lunde Bakeri.

Lokalmatinnslaga er ein del av marknadsdagane i Våge hamn fredag og laurdag, og i tillegg til lokalmat, vert det ulike «stands» og salsbodar, og diverse underhaldning. Laurdagen skal Bergen Pipes and Drums laga godt med lyd med sine sekkepiper og trommer, og for dei minste vert det høve til å treffa det musikalske trollet Trollala både fredag og laurdag. Bak Trollala-maska er det ingen ringare enn tidlegare Melodi Grand Prix-vinnar Stig van Eijk som skjuler seg.


Musikk i Våge

Fredagen er det også konsert med Ausekarane i Bermudateltet. Tor Endresen og Bjørn Jensen, med band, har for vane å dukka opp på Tysnesfest, og Øystein Vaage fortel at dei alltid er populære blant publikum.

– Eg fekk fleire forespurnadar frå folk som ville kjøpa billett til Ausekarane før me i det heile tatt lanserte dei til festivalen, seier han.

Eit anna musikalsk innslag i Våge same dag, er Stord-artisten Mukti, som skal halda konsert på MS «Sunnhordland». Dagen etter vert det også musikalske opplevingar på veteranbåten, då det tradisjonen tru er bluescruise med den lokale gruppa Big Men Bluesband.

– Nesten alle billettane er selde til bluescruiset. Big Men Bluesband er alltid eit populært innslag, seier Vaage.


FRAMTIDIG SUPERSTJERNE?: Ti år gamle Jonas Hansen, med artistnamnet DJ Axillar, skal varma opp for Matoma på Gjerstad. (Pressefoto)
FRAMTIDIG SUPERSTJERNE?: Ti år gamle Jonas Hansen, med artistnamnet DJ Axillar, skal varma opp for Matoma på Gjerstad. (Pressefoto)
NY DAG: «Ta sjansen» er eit populært konsept, og er i år flytta til fredagen. I fjor var det Yngve Vevatne (biletet) som vann konkurransen. (Arkivfoto: Lena Helvik)
NY DAG: «Ta sjansen» er eit populært konsept, og er i år flytta til fredagen. I fjor var det Yngve Vevatne (biletet) som vann konkurransen. (Arkivfoto: Lena Helvik)
LOKALMAT: Garden på Dalland er blant dei lokale matprodusentane som skal vera til stades på Tysnes matgilde i tentipien på E-brygga. Her frå opninga av pølsemakeriet på garden. (Arkivfoto)
LOKALMAT: Garden på Dalland er blant dei lokale matprodusentane som skal vera til stades på Tysnes matgilde i tentipien på E-brygga. Her frå opninga av pølsemakeriet på garden. (Arkivfoto)
TILBAKE TIL GJERSTAD: Etter konserten i 2014 vart Aurora lansert som ei framtidig stjerne, og spådomane trefte godt når det gjaldt Os-jenta. (Pressefoto)
TILBAKE TIL GJERSTAD: Etter konserten i 2014 vart Aurora lansert som ei framtidig stjerne, og spådomane trefte godt når det gjaldt Os-jenta. (Pressefoto)

Siste saker Gå til framsida

Fjord1 vil møta tysnespolitikarane

Prosjektdirektør Nils Kristian Berge i Fjord1 set si lit til at politikarane i Tysnes godkjenner søknaden om nytt teknisk bygg på ferjekaien i Våge på neste møte i utval for landbruk/teknisk.

Svindel-e-post florerer

Politiet har fått inn fleire meldingar om svindel-e-post. – Me har mellom anna fått fleire henvendingar frå folk som mottek e-post med vedlagt faktura, frå bedrifter som dei ikkje har vore i kontakt med i det heile tatt, fortel Susann Rosvold, politibetjent ved Tysnes lensmannskontor. – Dette er rein svindel, og viss fleire har opplevd å få ein slik faktura, kan dei sjå bort...