BLIDE: Marius Miron fann gull ved Tysnes skule. Her med sonen Julian (3). (Foto: Vetle Mikkelsen)
BLIDE: Marius Miron fann gull ved Tysnes skule. Her med sonen Julian (3). (Foto: Vetle Mikkelsen)

Marius fann vikingskatt på Gjerstad

Marius Miron bruker metalldetektoren flittig. Nyleg gjorde han eit funn han seint vil gløyma.
Publisert 08.07.2019 kl. 06.00. Oppdatert kl. 08.02.

– Endeleg, etter fem år som hobbyarkeolog, skjedde det!

Marius Miron står ved ballbingen utanfor Tysnes skule og smiler frå øyra til øyra. 21. juni, på enga rett bak han, gjorde Marius det som kanskje er hans livs funn; eit gullstykke som sannsynlegvis stammar frå vikingtida.

– Alle trur at metalldetektor betyr skattar og gull, men det er eigentleg nesten berre boss eg finn, seier Marius.

Med det i bakhovudet smaker nok gullfunnet ekstra godt.


Første gullfunn

– Eg har vore mange gongar her ved skulen. Her er det mest korkar. Barna samlar på dei, og dei trur det er skattar, seier Marius.

Det hender heller ikkje reint sjeldan at barna er med på tur med metalldetektoren.

– Ein gong fann eg ein koparmynt, seier Marius.

I år var likevel første gongen han fann gull.

– Det skjedde ein dag eg tok med meg metalldetektoren heilt opp til Ramnanuten. Eg fann ingenting, men så tok eg den med hit, seier Marius.

Og etter den lange turen utan å finna noko som helst, fann han gullstykket, som kanskje stammar frå vikingtida.

– Dette er veldig spennande! smiler Marius.


Hjelp frå arkeologgruppe

Marius er med i ei gruppe for arkeologar og hobbyarkeologar på Facebook. Då han fann gullstykket, posta han bilete av det i gruppa.

– Då eg publiserte det, eksploderte det med kommentarar og likerklikk. Dei forstod kva det er, og sa at det er frå vikingtida, fortel Marius.

– Eg har òg snakka med fylkesarkeologen. Eg trur han har snakka med eit museum i Bergen.

Marius har fylt ut eit skjema, og sendt bilete av funnet til arkeologen. No skal det enten sendast til Bergen, eller så kjem arkeologen sjølv til Tysnes.

Han fortel at det er nokre som har lurt på om han vil selja funnet, men den tanken har aldri slått han.

– Eg er ikkje berre interessert i historie, eg er òg interessert i å passa på historia, seier Marius.


Ei spesiell oppleving

– Eg har vore veldig forsiktig med det, seier Marius om gullstykket han fann i juni.

Han er veldig takksam for støtta han har fått frå vennar og bekjente på Tysnes, til å halda på med hobbyen sin.

Marius fortel at det kjennest spesielt å ha gjort eit viktig, historisk funn, med tanke på at han har hatt ei sterk interesse for historie i ei årrekke.

– No skal det kanskje stillast ut på eit museum i Bergen. Eg kan ikkje beskriva denne følelsen. Det er ein så stor ting for ein så liten mann, seier hobbyarkeologen.


Mangeårig interesse

– Kva tid begynte du eigentleg å leita rundt med metalldetektor?

– Det er eigentleg ei lang historie. Då eg var liten, kanskje ti år gammal, hadde eg skikkeleg lyst på ein metalldetektor, svarer Marius, som opphaveleg kjem frå Romania.

– Eg stal to radioar frå pappa, og laga ein metalldetektor av dei, legg han til.

Framgangsmåten fann han i ei gammal bok han hadde liggande.

– Eg fekk sjølvsagt ei stor straff for det, ler Marius.

Då han kom til Norge i 2012, kjøpte han seg metalldetektor ganske fort. Først kjøpte han ein til 3.000 kroner, og så ein til 10.000 kroner. Det er med andre ord ikkje ein billig hobby.

Heldigvis er sambuaren Lea Qvistgaard støttande:

– Eg er veldig heldig som har ei dame som støttar meg 150 prosent, smiler Marius.


Siste saker Gå til framsida

Har fått 100 år gamle draktdelar

Synnøve Hodneland i Tysnes Husflidslag kan fortelja at laget har fått mange gamle draktdelar i gåve frå ein privatperson. Plagga skal vera om lag 100 år gamle, og kjem mellom anna frå Bergsvåg og Solheimsdalen. – Det er blant anna bunadsbelte, brystdukar, bunadsliv, silkeforkle, barnehuer og bunadshuer, fortel Hodneland. På lagskvelden i Husflidstova komande måndag vil Britt Kjellesvik...

Lesarbrev: God søndagstur

På søndag skal Norge nok ein gong gjennomføra verdas største dugnad. 100.000 bøsseberarar går på tur i heile Norge, og samlar inn pengar til velgjerande organisasjonar. Kvart år blir det lagt ned ein stor innsats på Tysnes, og det er kjekt å sjå at gjevargleda til oss tysnesingar er stor kvart einaste år. Skular, lag og organisasjonar, kyrkja, privatpersonar og bedrifter har bidrege for å få...