DØDS: Det vert spektakulære svev i dødsekonkurransen i hamna i Våge. (Foto: Dag Oliver)
DØDS: Det vert spektakulære svev i dødsekonkurransen i hamna i Våge. (Foto: Dag Oliver)

Lovar spektakulære svev i Våge

Laurdagen under Tysnesfest består mellom anna av eigen festival for barn og unge, Tysnes Døds Challenge og stor partystemning på Gjerstad arena.
Publisert 09.07.2019 kl. 06.00.

– Eg prata med Staysman sjølv, som likte konseptet veldig godt, fortel Øystein Vaage, dagleg leiar for Tysnesfest.

Konseptet som involverer artisten Stian «Staysman» Thorbjørnsen vart seint lansert av festivalen. Frå før av var store namn som Broiler, Ina Wroldsen og Kjartan Lauritzen bekrefta til laurdagsprogrammet på Gjerstad arena, men Tysnesfest-leiinga slo på stortromma og lanserte i tillegg Staysman & Lazz, som for to år sidan laga god feststemning torsdagen på festivalen.


Vorspiel

Der Staysman & Lazz for to år sidan avslutta torsdagskvelden, er det i år dei som skal opna kveldsprogrammet laurdagen. Øystein Vaage håpar på god vorspielstemning på Gjerstad frå tidleg på kvelden.

– Dei går på scenen allereie før klokka sju, fortel Vaage.

Sjølv om artistduoen fint klarar å laga liv på eiga hand, tek dei i år med seg nokre spesielle gjestar til Tysnes, deriblant den tidlegare fotballspelaren Mads Hansen, som i fjor sommar toppa hitlistene med låten «Sommerkroppen», og fekk i mars Spelemannprisen i kategorien Årets låt. Hansen har tidlegare uttalt at dette er den einaste låten han nokosinne kjem til å gje ut som artist.

I tillegg til Mads Hansen, tek Staysman med seg rapduoen Oral Bee og Mr. Pimp Lotion til Gjerstad.


Travel kveld

Vaage fortel at det skulle litt til for å få vorspiel-gjengen til Tysnes laurdagskvelden.

– Staysman & Lazz skal spela på Midsundfestivalen kvelden før, og på Rudskogen same kveld som på Tysnes, seier han.

Det betyr at det både må helikopter og privatfly til for å få duoen fram til ny konsert same kvelden.

– Me har jobba litt for å få dette til, seier Vaage.


Festen fortset

Etter vorspielet er det den ferske bergensgruppa Shuffle Baby som går på scenen. Dette er eit band som Øystein Vaage sjølv har fått sansen for.

– Dei speler veldig fengande og kul musikk. Eg trur dei dekkjer gapet mellom vorspielet og resten av artistane på ein god måte, seier han.

Deretter fylgjer Kriminell Kunst, som vann Vestlandssatsinga under 100 dagar-festivalen på Stord i januar, før det vidare kjem ei solid rekkje med headlinerar.

Både Ina Wroldsen, Julie Bergan og Broiler har etablert seg blant dei største norske artistane, og dei har alle hatt store internasjonale hitar. Broiler var også headliner på laurdagsprogrammet i 2016, og fekk mykje skryt for sin opptreden då.

– Eg trur aldri me har hatt ei sånn stemning som me hadde då Broiler spelte her sist, seier Vaage.

Også sogningen Kjartan Lauritzen er klar for Gjerstad arena laurdagen.


Spektakulære stup

Forutan kveldskonsertane, inneheld laurdagen det mest spektakulære nye innslaget på Tysnesfest-programmet. Då inviterer nemleg festivalen, i samarbeid med The International Døds Federation, til Tysnes Døds Challenge.

For dei som ikkje veit kva døds, eller dødsing, er for noko, så er det ein stupekonkurranse der det gjeld å kasta seg ut frå eit stup og laga spektakulære kroppsformasjonar i lufta. Deretter skal ein gå inn for landing med eit mageplask, men like før ein treffer vatnet trekker ein armar og bein inn mot kroppen for å hindra mageplasket.

Konkurransen handlar om å ha best mogleg stil på hoppet, og er ei konkurranseform som har vakse seg stor i Frognerbadet i Oslo, der det også vert arrangert VM kvart år.


Påmelding

– Sist eg sjekka var det over 15 påmelde til konkurransen, inkludert regjerande verdsmeistar Emil Lybekk, fortel Vaage.

Førebels er det stort sett aktive dødsarar som har meldt seg på, men den daglege leiaren oppmodar også tysnesingar til å melda seg på.

– Eg håpar det er nokre lokale heltar som vil prøva seg. Og så er det ikkje slik at ein nødvendigvis må gjera det så spektakulært viss ein er med. Det held å berre kasta seg ut og visa tommel opp i lufta, fortel Vaage.

Dødsinga skal gå føre seg i hamna i Våge. Normalt sett vert det hoppa frå eit stupebrett ti meter eller meir over vassoverflata, og festivalen har vore kreative i jakta på ein passande rampe i Våge.

– Det skal hoppast frå MS «Sunnhordland». Det vert mellom ti og tolv meter over vatnet, seier Vaage.


Festival for dei unge

Program for barn og unge, og heile familien, er noko som alltid har vore i fokus for Tysnesfest. No lanserer Vaage ein eigen i festival i festivalen, nemleg Tysnesfest UNG, som ifølgje den daglege leiaren er eit nytt steg i satsinga på det unge festivalpublikummet.

– Det er ei vidareutvikling av barneprogrammet, fortel han.

Tysnesfest UNG går føre seg i Bermudateltet, og inneheld mange ulike innslag. Det vert mellom anna musikal med Musikaljentene og musikk med Gutta og Serlina. Tysnes soulchildren vert også med på dei musikalske innslaga.

UNG-festivalen vert avslutta med youtubeshow med Murdrocks og Agnetesh, som er to av dei største youtubarane i landet. Begge har over 100.000 abonnentar kvar på youtubekanalene sine.

– Det verkar som youtubarane er spesielt populære, fortel Vaage.

Også dei andre dagane er det mykje program for barn og familiar. Torsdagen er det konsert med Naboen Min, som nyleg vann Spelemannprisen i kategorien for barnemusikk, medan det same dag er «Smaksverkstedet», eit matkurs for barn mellom åtte og 13 år i tentipien på E-brygga.

Fredagen er det også konsert retta mot det yngste publikummet. Då speler duoen Vilde og Anna i Bermudateltet. Dei er fyrst og fremst kjend som vinnarar av MGPjr i 2016 med låten «Vestlandet».


VORSPIEL: Staysman & Lazz lagde god stemning i 2017, og opnar i år kveldskonsertane på Gjerstad laurdag. (Arkivfoto)
VORSPIEL: Staysman & Lazz lagde god stemning i 2017, og opnar i år kveldskonsertane på Gjerstad laurdag. (Arkivfoto)
ÅRETS LÅT: Mads Hansen toppa hitlistene med «Sommerkroppen» i fjor sommar, og skal framføra låten under Tysnesfest i juli. (Pressefoto)
ÅRETS LÅT: Mads Hansen toppa hitlistene med «Sommerkroppen» i fjor sommar, og skal framføra låten under Tysnesfest i juli. (Pressefoto)
TYSNESFEST UNG: Youtubarane Murdrocks og Agnetesh har over 100.000 følgjarar kvar på Youtube, og skal ha youtubeshow i Bermudateltet. (Pressefoto)
TYSNESFEST UNG: Youtubarane Murdrocks og Agnetesh har over 100.000 følgjarar kvar på Youtube, og skal ha youtubeshow i Bermudateltet. (Pressefoto)
RETUR: Broiler fekk mykje skryt etter konserten på Gjerstad i 2016, og kjem no tilbake til Tysnesfest. (Pressefoto)
RETUR: Broiler fekk mykje skryt etter konserten på Gjerstad i 2016, og kjem no tilbake til Tysnesfest. (Pressefoto)

Siste saker Gå til framsida

Fjord1 vil møta tysnespolitikarane

Prosjektdirektør Nils Kristian Berge i Fjord1 set si lit til at politikarane i Tysnes godkjenner søknaden om nytt teknisk bygg på ferjekaien i Våge på neste møte i utval for landbruk/teknisk.

Svindel-e-post florerer

Politiet har fått inn fleire meldingar om svindel-e-post. – Me har mellom anna fått fleire henvendingar frå folk som mottek e-post med vedlagt faktura, frå bedrifter som dei ikkje har vore i kontakt med i det heile tatt, fortel Susann Rosvold, politibetjent ved Tysnes lensmannskontor. – Dette er rein svindel, og viss fleire har opplevd å få ein slik faktura, kan dei sjå bort...