KRITISK: Ordførar Kåre Martin Kleppe sin fyrste kommentar til nytt ruteframlegg utan å ha fåt studert det inngåande, er at dette ikkje er godt nok. (Arkivfoto)
KRITISK: Ordførar Kåre Martin Kleppe sin fyrste kommentar til nytt ruteframlegg utan å ha fåt studert det inngåande, er at dette ikkje er godt nok. (Arkivfoto)

Ordførar Kåre Martin Kleppe: Ruteframlegget er ikkje godt nok

– Eg forventar at dette blir ei politisk sak i fylket, og at ferjerutene til og frå Tysnes blir betre enn det som kjem fram i dette framlegget. Dette er ikkje godt nok, slår ordførar Kåre Martin Kleppe fast.
Publisert 10.07.2019 kl. 18.06. Oppdatert 12.07.2019 kl. 14.06.

Kort tid før «Tysnes» gjekk i trykken i går, onsdag ettermiddag, fekk Tysnes kommune og Stord kommune tilsendt frå Skyss nytt framlegg ferjeruter både for Våge-Halhjem og Hodnanes-Jektevik-Nordhuglo.

Ordførar Kåre Martin Kleppe er klinkande klar i sin kommentar etter å ha fått ein kort informasjon om framlegget. Han er for tida på ferie.


Kritisk til Hodnanes-Jektevik

– Eg må studera framlegget betre, før eg kan koma med ein utfyllande kommentar, seier han.

Det som han likevel er glad for, er at Skyss har teke omsyn til pendlarrutene mellom Våge og Halhjem både om morgonen og om ettermiddagen. Han er mindre nøgd med at det er kutta ein tur, i dag er det 13 rundturar, i det nye framlegget er det 12.

Mest kritisk er ordføraren til framlegget til nye ruter for Hodnanes-Jektevik-Nordhuglo.

– Eg ser dei har teke bort morgonturen 06.40 frå Hodnanes, det er ein ruteavgang som normalt har bortimot full ferje. Det kan me ikkje godta, seier han.

Avgangen frå Hodnanes klokka 07.45 er og teken bort.

Ordføraren er også kritisk til at det berre er ein pendlaravgang frå Jektevik til Hodnanes mellom klokka 15 og 16. I dag er det to.

– For Tysnes er det viktig å oppretthalda det same rutetilbodet som me har i dag. Me kan ikkje godta kutt i tilbodet, seier ordføraren.


– Kjem altfor seint

Ordføraren er også kritisk til at ruteframlegget kjem så seint som midt i ferietida. Han peikar på at framlegget var lova ferdig tidleg i vår.

Framlegget frå Skyss som er adressert til Tysnes kommune er datert 10. juli og underskrive av direktør Målfrid Vik Sønstabø.

– Arbeidet med å avklara rutetilbodet for kvart einskild samband har teke noko lenger tid enn forventa. Når det gjeld sambanda Jektavik-Nordhuglo-Hodnanes og Halhjem-Våge er det gjort vesentlege endringar i rutetilbodet i høve til tabellane som vart presentert i møtet 25. mars, skriv Vik Sønstabø i brevet til Tysnes kommune.

Ifølgje Vik Sønstabø legg fylkesrådmannen opp til å orientera politisk om endringane i rutetilbodet ved fyrste møte i utval for miljø og samferdsel og i fylkesutvalet etter sommaren.


VÅGE-HALHJEM: Det siste framlegget frå Skyss for nye ferjerute for Våge-Halhjem frå 2020.
VÅGE-HALHJEM: Det siste framlegget frå Skyss for nye ferjerute for Våge-Halhjem frå 2020.
HODNANES-JEKTEVIK-NORDHUGLO: Tabellen viser Skyss sitt siste framlegg til nye ferjeruter frå 2020 mellom Hodnanes-Jektevik-Nordhuglo.
HODNANES-JEKTEVIK-NORDHUGLO: Tabellen viser Skyss sitt siste framlegg til nye ferjeruter frå 2020 mellom Hodnanes-Jektevik-Nordhuglo.

Siste saker Gå til framsida