SPENT: Ella Sandra Dahl Berland ser fram til å arbeida som journalist på Tysnes. (Foto: Vetle Mikkelsen)
SPENT: Ella Sandra Dahl Berland ser fram til å arbeida som journalist på Tysnes. (Foto: Vetle Mikkelsen)

– Eg har sterk tru på at dette blir veldig kjekt!

Ella Sandra Dahl Berland lengta etter dyr og landlege omgjevnadar. No er ho journalist i «Tysnes».
Publisert 12.07.2019 kl. 06.00.

– Eg har sterk tru på at dette blir veldig kjekt! seier Ella Sandra Dahl Berland (26).

Måndag hadde ho sin første dag på jobb i «Tysnes»-redaksjonen. Ho kjem med andre ord inn i avisa i den travlaste veka i året, men ho verkar å ta det med knusande ro.

– Eg trur det blir godt å koma inn i ein rutine her. Dette blir min første fulltidsjobb. Det er veldig spennande, seier ho.

Ella har ein mastergrad i medievitskap, og skreiv oppgåva si om lokalavisene Strilen og Nordhordland; førstnemnde har ho vore frilansar for sidan ho var 18.


Vurderte å søka i fjor

I fjor vår hadde Ella akkurat levert mastergraden sin, og jobba som frilansar i Strilen og på Brilleland på Lagunen i Bergen. Ein dag kom Morten Haaland, altmoglegmann i «Tysnes» innom.

– Av ein eller annan grunn begynte me å snakka om journalistikk, og at eg akkurat hadde levert master. Og så var det ledig stilling hos dykk, fortel Ella.

Den gongen slo ho frå seg tanken om å søka. Ho hadde knapt høyrt om Tysnes, og reisevegen blei for lang. Det siste året har ho derfor jobba deltid i eit bufellesskap for menneske med psykisk utviklingshemming.

– No i vår var eg innpå nettsida til Tysnesbladet, og så stod det øvst at de søkte folk. Så søkte eg, og fekk jobben, smiler Ella.


Allsidig journalist

– Eg er veldig glad i å laga portrett av folk, eg er veldig glad i folk, seier nordhordlendingen.

– Eg trur kanskje eg er mest glad i mjuke saker, men eg er òg ein liten kritikar. Eg liker å stilla spørsmål ved ting, legg ho til.

– Kvifor er lokalavisa viktig?

– Det er den som bind lokalsamfunnet saman. Den er lim og lupe, seier Ella.

– Du får opplysningar om det som skjer rundt deg, i ditt lokalsamfunn. Den er òg ein gledesspreiar, held ho fram.


Dyr og natur

– Eg er oppvaksen på ein nedlagd gard. Eg elskar dyr, fortel Ella.

Dei siste tre åra har ho budd i Bergen sentrum, og har derfor ikkje hatt høve til å ha dyr. Noko av det første ho gjorde då ho flytta til Tysnes, var å skaffa seg katt.

26-åringen liker òg å ta naturen i bruk:

– No har eg flytta til Lunde, og gjett om eg blei glad då eg såg at det var kanoar til utlån, viss du blei med i idrettslaget, seier Ella.

– Det har allereie blitt eit par padleturar. Padling og fjellturar er eg veldig glad i. Eg har allereie oppsøkt Tysnessåto, og det var ei vanvitig fin utsikt.

– Eg synest at tysnesingane er veldig inkluderande. Det er utruleg lett å koma i snakk med folk, seier ho.


Siste saker Gå til framsida

Har fått 100 år gamle draktdelar

Synnøve Hodneland i Tysnes Husflidslag kan fortelja at laget har fått mange gamle draktdelar i gåve frå ein privatperson. Plagga skal vera om lag 100 år gamle, og kjem mellom anna frå Bergsvåg og Solheimsdalen. – Det er blant anna bunadsbelte, brystdukar, bunadsliv, silkeforkle, barnehuer og bunadshuer, fortel Hodneland. På lagskvelden i Husflidstova komande måndag vil Britt Kjellesvik...

Lesarbrev: God søndagstur

På søndag skal Norge nok ein gong gjennomføra verdas største dugnad. 100.000 bøsseberarar går på tur i heile Norge, og samlar inn pengar til velgjerande organisasjonar. Kvart år blir det lagt ned ein stor innsats på Tysnes, og det er kjekt å sjå at gjevargleda til oss tysnesingar er stor kvart einaste år. Skular, lag og organisasjonar, kyrkja, privatpersonar og bedrifter har bidrege for å få...