BLID: Noko av det første ein merkar når ein snakkar med Agnes, er at ho byr på mange smil og smittande latterar. (Alle foto: Vetle Mikkelsen)
BLID: Noko av det første ein merkar når ein snakkar med Agnes, er at ho byr på mange smil og smittande latterar. (Alle foto: Vetle Mikkelsen)

Agnes (61) har feriert i Godøysund i fire tiår

Størsteparten av året er Agnes Cecilie W. Giertsen bergensbuar, men somrane hennar tilhøyrer Godøysund og Tysnes.
Publisert 14.07.2019 kl. 06.00.

– Noko av det mest fantastiske er det klare vatnet, seier Agnes Cecilie Wilhelmsen Giertsen.

«Tysnes» møter 61-åringen på familiehytta ute i Godøysund, vis-á-vis Erleholmen og Solstråleøya.

Under båtturen ut til hytta, kunne ein sjå sjøbotnen fleire gongar, gjennom det krystallklare vatnet.

– For meg, som kjem frå Fredrikstad, ved Glomma, der ein ikkje såg botnen frå to centimeter, var det å koma hit og sjå fisk, og å sjå kva som rører seg på botnen, heilt fantastisk, seier Agnes.

– Eg saknar sjølvsagt temperaturen litt, men me morgonbadar, og badar det me kan, kvar dag. Sommar, det er shorts, og ikkje langbukser, uansett, legg ho til.

– Uansett vêr?

– Ja, eg tenker at dette klarer me, ler Agnes.


Lang fartstid i Godøysund

Sjølv har frekstingen budd i Bergen sidan 1979, og feriert i Godøysund nesten like lenge.

– Eg trefte ein mann frå Bergen, som er mannen min endå. Familien hans bygde det som heitte Sara Tufte, rett overfor Godøysund fjordhotell. Det bygde farfaren hans og farmora hans, fortel Agnes.

Ho legg til at familien til mannen hennar har halde til i Godøysund i 100 år.

– Første gong eg var her, var det ein eskadre-seglas, som Bergen seilforening arrangerte. Då var det fest på Godøysund fjordhotell, fortel Agnes.

– Det var ein stor fest, med mange seglarar og mange kjente, og det var ei stor oppleving. Det var første gong eg var på Tysnes; eg trur det var i 1979 eller 1980. Sidan har eg vore her kvar sommar, smiler høgskulelektoren.


– Ei perle

– Mitt forhold til Tysnes er at det er ei perle av ein stad, som kan tilby det meste; fjell, sjø, fisk og hjelpsame menneske. Me hadde ikkje klart å bu her, viss ikkje det var for tysnesingar som har hjelpt oss, seier Agnes.

Mykje av Tysnes-feriane går med til fisking, utforsking av øyene og turar i skog og fjell.

På hytta har dei dårleg nett og ingen TV. Det trur Agnes er bra for dei.

– No er det jo faktisk sånn at det er meg som...

Agnes får auga på noko utanfor stovevindauga, stoppar midt i setninga, og ler ein trillande latter.

– Her kan du sjå, her hoppar fisken rett utanfor. Me fiskar jo middag rett frå brygga. Me må liksom stoppa når me har fått 15 makrellar, seier ho.

– Sånt har eg aldri opplevd tidlegare, sjølv om eg er oppvaksen ved sjøen i Fredrikstad, det å kunna stå på brygga og fiska middag. Det er heilt utruleg.


Finn roen

Agnes fortel at hytta i Godøysund er ein plass ho og familien kan senka skuldrene. Hytta har vore ein fristad, både for ho, mannen, barna, barna sine vennar og no barnebarna.

– Her går me inn med sko og sjøstøvlar. Her er er det regntøy og det er fiskestenger. Det er på ein måte heilt avslappa, seier ho.

Det er sterk kontrast til kvardagen i byen, med mykje å gjera på jobb og i fritida.

– Eg elskar å vera her, for her slepp eg å ta meg heilt ut. Eg liker på ein måte å ha ferie når eg har ferie, og ikkje gjera så veldig mykje, fortel Agnes.

– Me er ikkje så gode på å setta garn, for då må me opp veldig tidleg, synest me. Men no har me barnebarn, så no er garnsettinga litt i gang igjen, for då er me tidleg oppe uansett.

Hytta er bygd mellom to øyer, og Agnes både sovnar og vaknar til lydane frå sjøen. Når det er skikkeleg flo går vatnet eit lite stykke opp langs husveggen, og ein kan høyra bølgene slå mot hytta.

– Det er som å bu i ein husbåt! utbryt Agnes entusiastisk.Agnes og familien er på god fot med alle naboane ute i Godøysund, men spesielt ein av dei har Agnes blitt god venn med. Nokre titals meter frå hytta ligg nemleg Erleholmen, der friluftsentusiasten Wenche Elsebeth Strømme held til.

– Eg har hatt mykje lengre feriar enn mannen min, for eg har jobba lenge på skule, så Wenche og eg har eit veldig tett samhald. Me er mykje saman, seier Agnes.


Engasjert helsesjukepleiar

– Eg har jobba med ungdom sidan 2000, stort sett, med forskjellige utfordringar, fortel Agnes.

Til dagleg er ho høgskulelektor ved Høgskulen på Vestlandet; i tillegg har ho mange år som leiar av helsestasjonen for ungdom og studentar i Bergen bak seg.

– Eg har vore leiar i 15 år, men no jobbar eg med prosjekt i forhold til å utvikla helsestasjonen for alle kjønn, seksualitetar og identitetar, seier Agnes, som òg har jobba som helsesjukepleiar ved vidaregåande skular i ei årrekke.

Som høgskulelektor er ho involvert i utdanninga av helsesjukepleiarar, det som tidlegare heitte helsesøstrer.

– Helsesjukepleiar vil bli eit vel så godt namn som helsesøster, og så er det kjønnsnøytralt, seier Agnes.

Ho legg til at dei, etter namneskiftet, har opplevd ein stor auke av menn som søker seg inn på helsesjukepleiar-utdanninga.

Til dei som saknar helsesøster-tittelen har ho dette å seia:

– Det nyttar ikkje å legga seg bakpå i livet. Ein må lena seg framover.

Agnes meiner førebyggande arbeid retta mot ungdom er alfa og omega. Ho fortel at der ein tidlegare har fokusert på behandling etter at noko har skjedd, får fleire no augo opp for kor viktig det er å arbeida førebyggande.

– I år er det val. Eg ønsker meg kloke og modige politikarar, som satsar på førebygging, seier Agnes.


NATURSKJØNT: Hytta er bygd midt mellom to  små øyer, og er omringa av tre på begge sider.
NATURSKJØNT: Hytta er bygd midt mellom to små øyer, og er omringa av tre på begge sider.
FIRE TIÅR: Agnes og familien har feriert på Godøysund i ei årrekke. Ho har mange minne og historier frå staden.
FIRE TIÅR: Agnes og familien har feriert på Godøysund i ei årrekke. Ho har mange minne og historier frå staden.
TAR SJØVEGEN: Familien har fast båtplass i Våge, for å gjera handleturar og liknande enklare.
TAR SJØVEGEN: Familien har fast båtplass i Våge, for å gjera handleturar og liknande enklare.
BADENYMFE: Agnes er glad i å bada. På øya er det sett opp skilt for nakenbading for både damer og herrer; viss du ser nøye etter, ser du at skilta leiar same veg.
BADENYMFE: Agnes er glad i å bada. På øya er det sett opp skilt for nakenbading for både damer og herrer; viss du ser nøye etter, ser du at skilta leiar same veg.

Siste saker Gå til framsida

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.

– Det finst ikkje liknande

Forfattar og lokalhistoriker Knut Rage reiser kvart år frå Tysnes til Hatlestrand for å få med seg Mytologifestivalen. I år skulle ikkje vera eit unntak.

Vel blåst på Tysnessåto

Søndag var det friluftsgudsteneste på Tysnessåta i skiftande seinsommarvêr. Initiativtakar til denne gudstenesta var tysnesingen Arne Nesse. Døveprest Inge Sørheim hadde ansvar for gudstenesta, og dei hadde med eigen tolk. Det bles friskt på toppen, så den vesle kyrkjelyden søkte ly litt nedom toppen. Der vart det preike, bøn og salmesong med eit fantastisk skue over...

Lesarbrev: Innfør gratis skulemat

Eit gratis skulemåltid kvar dag til alle elevar i den norske skulen kan vera blant dei viktigaste tiltaka for folkehelse og sosial utjamning. Vil politikarane jobba for å innføra skulematordning i vår kommune?Det er få stader sosiale skilnader kjem tydelegare til syne enn blant matpakkane til elevar i den norske skulen. Diverre er det slik at langt ifrå alle born får med seg god og sunn...