NØGD: Innsatsleiar for politiet under Tysnesfest, Atle Birkeland, fortel om rolege dagar torsdag og fredag og ein hektisk periode laurdag kveld. Han oppsummerer festivalen som godt gjennomført, og rosar Tysnesfest for eit godt tryggleiksmessig opplegg med mange friviljuge vakter.
NØGD: Innsatsleiar for politiet under Tysnesfest, Atle Birkeland, fortel om rolege dagar torsdag og fredag og ein hektisk periode laurdag kveld. Han oppsummerer festivalen som godt gjennomført, og rosar Tysnesfest for eit godt tryggleiksmessig opplegg med mange friviljuge vakter.

Politiet om Tysnesfest: Godt gjennomført nok ein gong

Innsatsleiar Atle Birkeland rosar Tysnesfest for ein godt gjennomført festival, sjølv om det blei ein hektisk laurdag for politiet. Men det var som venta.
Publisert 16.07.2019 kl. 10.00. Oppdatert kl. 10.47.

– Det blei eit veldig bra gjennomført arrangement i år også. Ein del episodar har me hatt, men det er ikkje meir enn venta når det blir arrangert ein festival med så mange menneske på ei øy med mange båtar og med mykje musikk, oppsummerer Birkeland.

Laurdag kveld blei den mest hektiske for politiet. Då var det travelt. Det er naturleg. Det var den kvelden med flest festivaldeltakarar på Gjerstad.

– Torsdag og fredag var ganske rolege, seier innsatsleiaren.


Bortvist frå Norge

Fredag var Utlendingskontrollen til politiet i Våge og kontrollerte då mellom anna salsboder. Ein utanlandsk borgar hadde ikkje papira i orden, og fekk førehandsvarsel om utvising. Det tyder at han får høve til å reisa ut sjølv, og viss han kjem tilbake, må han gjera det på rett måte.

Ein 19-åring blei fredag teken hand om etter å ha sendt opp nødbluss i hamna i Våge. Han blei søkt opp av kystvakta som låg ved kai i Våge under heile festivalen.

– 19-åringen blei forklart alvoret i det han hadde gjort, og blei dimmitert på staden, fortel innsatsleiaren.


To med båtpromille

Birkeland skryter av kystvakta og politibåten.

– Det er veldig bra at desse ressursane er til stades under festivalen. Dei gjer ein formidabel jobb, seier han.

Veldig mange båtar blei kontrollerte, både på veg inn til hamna, og ut frå Våge. Det var svært få båtførarar som ikkje klarte å følgja lover og reglar. To blei tekne med båtpromille.

– Det er to for mange, men det er likevel bra med så mange båtar i hamna, kommenterer politimannen.


Fleire i arresten i Bergen

Fleire personar blei sende til arresten i Bergen under festivalen. Dei blei frakta med politibåt til Os og med bil derifrå til Bergen.

Ein tydeleg rusa person på konsertområdet på Gjerstad blei i 23.00-tida torsdag kveld teken hand om av politiet og sendt til Bergen.

Lensmann Terje Sperrevik fortalde til «Tysnes» fredag at vedkomande laga bråk og spetakkel inne på konsertområdet. Han blei tilsnakka, men høyrde ikkje på det øyra. Då politiet snakka til han, sette han seg opp mot politiet. Saka blir meldt.

Fredag kveld måtte politiet trø til på campen i Uggdal, der ein svært rusa og hissig 21-åring var vanskeleg med vaktene i 19.30-tida.

– Han blei vist vekk frå campen, men han var ikkje samarbeidsvillig og politiet blei tilkalla. Vedkomande sette seg også opp mot politiet, og kom både med truslar og forsøkte å skalla til politiet, kommenterer Birkeland.

Mannen blei sendt til arresten i Bergen, og blei avhøyrt der laurdag. Saka vil få ei rettsleg oppfølging.


Fleire narkosaker

Alt torsdag kveld tok politiet hand om to narkotikasaker. Det blei gjort funn av narkotika på ein person som var på veg inn på området. Han vil bli meldt for det, og blei bortvist frå området. Ein annan person som og blei mistenkt for narkotika, kom heller ikkje inn på området. Den saka vil og bli meldt.

Ifølgje innsatsleiaren var det eit par narkosaker kvar kveld.

– Det blir oppretta sak på dei, og dei aktuelle personane blei bortviste og utestengde frå festivalen, seier innsatsleiaren.


Til legevakta for å sy

To kjenningar kom laurdag kveld i eit basketak som enda med at den eine beit den andre så pass mykje i øyra at vedkomande måtte til legevakta for å sy. Gjerningsmannen blei sendt til arresten i Bergen, og vil bli meldt for forholdet. Hendinga skjedde i båthamna. Begge dei to mennene var i 35-40-årsalderen og frå Sunnhordland.

Politiet melder elles om eit par episodar med krangling og slåssing. Totalt er det registrert seks saker på legemskrenking og kroppsskadar etter valdsepisodar.

Birkeland karakteriserer dette nokolunde på det jamne med tidlegare festivalar.


Fleire bortvisingar

Ein person blei torsdag bortvist etter å ha vist falsk legitimasjon. Totalt melder politiet om seks-sju bortvisingar frå ulike stadar, mellom anna frå konsertområdet. Dei fleste var personar som var fulle og vanskelege.

Natt til torsdag hamna ein person i sjøen etter eit mindre slagsmål i Våge. Natt til søndag, klokka 03.45, måtte mannskapet i politibåten roa ned festdeltakarar etter at det hadde kome klage på høg musikk frå ein båt i hamneområdet.


Godt organisert vakthald

Innsatsleiar Atle Birkeland rosar Tysnesfest for eit godt planlagt arrangement tryggleiksmessig.

– Tysnesfest framstår som ein seriøs arrangør som ynskjer at alle skal ha det så bra som mogeleg. Alle dei synlege vaktene og vertane i kombinasjon med Røde Kors, både på konsertarenaen og i båthamna gjer ein veldig bra jobb, og gjer det enklare for politiet, rosar han.


Siste saker Gå til framsida

Mykje vatn over stemma

Regntida har visst innteke Tysnes også. Til tider har det nesten «bøtta» ned enkelte stadar dei siste par vekene.Nedbøren har periodevis vore veldig lokal, og ein har kunna opplevd tørr vegbane enkelte stadar og skikkeleg store vasspølar andre stadar i kommunen.Nedbøren viser godt att i dei lokale vassdraga. Ein tur forbi Onarheimsvatnet tysdag var eit godt døme på det. Då rann...

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.