FORNØGD: Øystein Vaage kan pusta letta ut. Årets Tysnesfest var ein suksess. (Foto: Ole Skaten)
FORNØGD: Øystein Vaage kan pusta letta ut. Årets Tysnesfest var ein suksess. (Foto: Ole Skaten)

Festivalsjefen har grunn til å smila

I fjor på denne tida var det litt tungt å vera Øystein Vaage. I år kan han, etter alt å dømma, glisa med godt samvit.
Publisert 18.07.2019 kl. 15.00.

– Me har ikkje alle tala inne endå. Me har Gjerstad-tala, som på ein måte er dei som har noko å seia økonomisk, seier Øystein Vaage, dagleg leiar i Tysnesfest.

Festivalsjefen fortel blant anna om ein rekordtorsdag, med 4.995 publikummarar; ein ikkje fullt så bra fredag, med 4.280 frammøtte; og ein laurdag som gjekk betre enn forventa, med eit besøkstal på 6.196.

– Totaltala på Gjerstad ligg vel på over 15.000, og me hadde budsjettert med 14.700. Det er me veldig fornøgde med, seier Vaage.


Mykje utselt

Han fortel vidare at både dei to bluescruisa og dei to sjørøvarcruisa var utselde; det same gjaldt konserten med Ausekarane. I Kjevikjo var 363 publikummarar innom for å høyra og sjå Helge Jordal.

– Me hadde nesten 550 som kjøpte billettar til Tysnesfest Ung. Det var 1.700 på Såto, omtrent 60 på Finns blomstershow og 105 på Naboen min. Det er dei tala eg har til no, fortel Vaage.

– Generelt sett var det kjempebra besøkstal. Podtown var utseld, campen var utseld, hamna var utseld. Då er det jo ikkje plass til så mykje meir folk, smiler festivalsjefen.

• Les også: Var tidleg ute med å sikra seg båtplass


Plassmangel i festivalhamna

– Etter seiande var det plasstrøbbel i hamna?

– Ja, det var problem. Spesielt torsdagen var det mykje styr, seier Vaage.

Då dei skulle rekna ut kor mange plassar det var i festivalhamna, gjekk dei ut ifrå gjennomsnittsstørrelsen på båtar frå tidlegare år; denne låg på omtrent 30 fot for kvar båt.

– Allereie laurdagen før festivalen begynte, kom det mange svære beist av nokon båtar. Då blei det ikkje plass til så mange, forklarer han.

– Kor mange som har snudd, det veit me ikkje, men mange la seg i Uggdal, blant anna. Sigvard Madsen og kompani har drive på og herja i hamna heile festivalen, og hamnuestuarane fekk plass til nesten alle, legg han til.

– Det var snakk om at ein del som hadde betalt ikkje fekk plass?

– Eg trur ikkje det talet er høgt no lenger. Då «Ta sjansen» var ferdig på fredagen begynte dei å fylla båtar inni der, seier Vaage.

– Det er eit veldig lite fåtal som faktisk snudde og reiste heim. Dei fleste kom seg til på eitt eller anna vis, held han fram.


Mykje nytt

I år prøvde festivalen ut fleire nye ting, blant anna «dødsing» og gratis inngang til marknaden.

– Korleis syntest du dødsinga gjekk?

– Dødsinga fekk eg heldigvis med meg. Det er ein av dei få tinga eg faktisk har sett under festivalen i år. Det var heilt vanvitig bra, svarer Vaage.

Han fortel vidare at fleire av dødsarane meinte dette var det beste dødse-arrangementet dei hadde vore med på. Dødsinga tiltrekte seg òg ei mengde publikummarar:

– Heile hamneanlegget var fullt av folk som stod og såg på, seier Vaage.

At marknadsdagane var gratis, gjorde at festivalen mista inntektene frå marknaden. Vaage trur likevel at det blei sett stor pris på av festivalgjengarane:

– Folk har eigentleg håpt på at det skal bli sånn i nokon år no. Me merka det veldig godt at det var mykje folk i Våge, seier Vaage.

– Eg trur det må vera ein rekord i antal menneske som var innom marknaden fredag og laurdag, legg han til.

Marknadskonserten, som tidlegare har blitt halden på Lekteren, blei flytta opp i Bermudateltet i år. Også dette var ein suksess, ifølge festivalsjefen.

– Det var nesten sånn at me burde hatt eit større telt, men eg trur alle som ville koma og sjå på fekk koma inn, seier han.

Han trekker òg fram nysatsinga Tysnesfest Ung, som noko som slo an i år.

– Det var veldig mange gøye, nye program som funka skikkeleg, rett og slett, seier Vaage.


Lite bråk

– Har det vore mykje bråk frå festivalgjestene?

– Mitt inntrykk er at det har vore veldig lite bråk. Eg har snakka med politiet, og eg har snakka med sikkerheitsleiinga i festivalen, seier Vaage.

Han fortel at det har vore nokre enkelthendingar, men at det stort sett har gått roleg for seg.

– Torsdagen las eg på Twitter at det einaste Vest politidistrikt hadde å melda om torsdagsnatta, var noko uro i Bergen sentrum. Det var meir folk på Tysnes enn i Bergen sentrum på den tida, seier Vaage, med glimt i auga.


Lett til sinns

– Eg har ikkje begynt å trykka på nokon tal endå, men eg blir veldig overraska viss ikkje dette har gått bra, seier Vaage.

Han er med andre ord lettare til sinns, enn han var på denne tida i fjor.

– Søndagen i fjor var ikkje kjekk. Me visste jo at det kom til å gå gale økonomisk, og i tillegg hadde me brannen i den eine vogna, seier Vaage.

– I år er det ein heilt annan følelse, legg han til.

Frå tysdag til søndag budde han i Tysneshallen, og han har i gjennomsnitt fått mellom ein halv og ein time søvn kvar natt. No kan han sova med godt samvit, men heilt fri har han ikkje likevel; festivalen har allereie begynt å booka artistar for 2020.

– Å booka tre artistar før festivalen er ferdig, det er spennande. Artistane tar kontakt med oss, fordi dei har lyst til å spela her, seier Vaage.

No ventar to veker med rydding etter Tysnesfest, før Vaage tar seg ein vel unnt Island-ferie i slutten av månaden.


Siste saker Gå til framsida

Skal tilsetja to nye sjukepleiarar

Tysdag vedtok formannskapet eit endeleg budsjettframlegg. Framlegget inkluderte mellom anna at kommunen opprettar to nye faste sjukepleiarstillingar.