LANGVEGSFRÅ: Fredag og laurdag under Tysnesfest stod Patricia Perales i baren på Gjerstad. Ho har kome heilt frå New York for å vera frivillig under festivalen.
LANGVEGSFRÅ: Fredag og laurdag under Tysnesfest stod Patricia Perales i baren på Gjerstad. Ho har kome heilt frå New York for å vera frivillig under festivalen.

Kryssa Atlanterhavet for å vera Tysnesfest-frivillig

Amerikanske Patricia Perales har forelska seg i Norge, og bestemte seg like godt for å delta som frivillig under Tysnesfest.
Publisert 19.07.2019 kl. 12.00.

– Eg tenkte berre: Kvifor ikkje?

Patricia Perales er ein av dei mange hundre frivillige som fekk Tysnesfest til å gå rundt også dette året. Det som derimot skil Patricia frå dei fleste andre frivillige, er at ho har reist heilt frå New York for å gjera ein innsats for Tysnesfest.


Tett på festivalen

– Eg vart plukka ut til å stå i baren, fortel Patricia.

Fredag og laurdag var ho med og sløkte tørsten til dei mange tusen festivaldeltakarane på arenaen på Gjerstad. Då kom ho tett på både festivallivet, musikken og Tysnesfest-publikummet.

– Det er ein fantastisk festival som skapar mykje lykke og god stemning.


Kjennskap til Tysnes

Patricia har meksikanske anar, men er fødd og oppvaksen i Texas i USA. No held ho til i storbyen New York, der ho har budd i fleire år. For to år sidan var ho i Norge for fyrste gong.

– Eg hadde lyst til å besøka Norge og oppleva fjordane, og eg syntest det var heilt fantastisk her på Tysnes. Eg var her i november månad, og eg fekk meg nokre lokale venar som sa at eg måtte ta turen om sommaren også, fortel Patricia.

Og denne sommaren bestemte ho seg for å reisa tilbake, og då tidspunket klaffa med Tysnesfest, valde ho å melda seg som frivillig.

– Det er kjekt å kunna vera med og bidra, fortel ho.

Patricia avviser ikkje at det kan verta fleire turar til Tysnesfest som frivillig.

– Eg kjem gjerne tilbake neste år. Kanskje eg skal ta med meg nokre venar også, seier ho.

Festivalopplevingar

Sjølv om det er travelt bak bardisken i drikketeltet på Gjerstad, får ho også tid til å sjølv vera festivalgjest. Kveldane i baren går ikkje berre til jobbing. Dei frivillige får også ta seg pauser frå arbeidet.

– Me har eit område bakerst i matteltet med benker der me kan sitja og ta ein matbit, og eg har også tatt meg nokre turar ut til scenane og dansa til musikken.

Ho har også fått med seg andre festivalopplevingar enn berre konsertane på Gjerstad.

– Eg tok meg ein tur til Våge for å oppleva folkelivet, og så var eg ein tur innom Mandelhuset. I tillegg såg eg litt på døds-konkurransen. Det var ordentleg spektakulært, fortel Patricia.


Norsk musikk

Sjølv om ho har lært seg ei og anna norsk glose, sit ikkje språket heilt endå. Men kommunikasjonen med tørste festivaldeltakarar har vorte betre og betre undervegs i arbeidet.

– Eg har funne ut av «øl» og «sider», og elles så skjønner folk at eg ikkje pratar norsk, og då går kommunikasjonen greitt.

Ho har også fått eit positivt inntrykk av musikken som vart spelt. Det har stort sett vore norske band og artistar på scenen under Tysnesfest i år, og Patricia er i ferd med å få seg nokre nye favorittar.

– Eg likte Staut veldig godt. Det er litt country-aktig musikk som eg er van med frå Texas, seier ho.


Glad i Norge

Patricia har vorte kjend med folk på begge sidar av bardisken, og fortel at den sosiale sida av frivilligarbeidet var ein viktig grunn for å melda seg til dugnad.

– Det er enklare å koma i kontakt med andre når ein jobbar som frivillig, samanlikna med å berre vera til stades som festivalgjest.

Ho har fått eit godt inntrykk av nordmenn og norsk kultur.

– Det verkar som de verkeleg liker å vera utandørs, og eg har sett mange som har bada i løpet av helga.

Journalisten opplyser om at den temperaturen det har vore på Tysnes i helga, vert sett på som normal sommartemperatur, og det er tydeleg at Patricia er van med hakket varmare klima frå New York og Texas.

– Men det er veldig flott her, og det er heilt annleis natur enn eg er van med, spesielt frå Texas.

Ho har vore fleire stader på Vestlandet, og er full av lovord om plassane ho har besøkt.

– Uansett kvar eg er, så er det heilt nydeleg. Både her og i byane, fortel ho.


Siste saker Gå til framsida

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.

– Det finst ikkje liknande

Forfattar og lokalhistoriker Knut Rage reiser kvart år frå Tysnes til Hatlestrand for å få med seg Mytologifestivalen. I år skulle ikkje vera eit unntak.

Vel blåst på Tysnessåto

Søndag var det friluftsgudsteneste på Tysnessåta i skiftande seinsommarvêr. Initiativtakar til denne gudstenesta var tysnesingen Arne Nesse. Døveprest Inge Sørheim hadde ansvar for gudstenesta, og dei hadde med eigen tolk. Det bles friskt på toppen, så den vesle kyrkjelyden søkte ly litt nedom toppen. Der vart det preike, bøn og salmesong med eit fantastisk skue over...

Lesarbrev: Innfør gratis skulemat

Eit gratis skulemåltid kvar dag til alle elevar i den norske skulen kan vera blant dei viktigaste tiltaka for folkehelse og sosial utjamning. Vil politikarane jobba for å innføra skulematordning i vår kommune?Det er få stader sosiale skilnader kjem tydelegare til syne enn blant matpakkane til elevar i den norske skulen. Diverre er det slik at langt ifrå alle born får med seg god og sunn...