Fekk oppleva barndomsbasaren igjen
– Det er akkurat slik som eg hugsar at det var då eg var liten, seier Arild.
Då han var barn, drog mormora han med på bedehusbasar i Lunde. Dette har han mange gode minne frå.
– Ho var herfrå, fortel han.
Kjekt med generasjonsmøte
Arild og familien bur på Jeløy i Moss, men har hytte i Solbakken i Lunde. For tida er dei her på ferie, og då nytta Arild sjansen til eit gjensyn med barndomsminna.
– Det var veldig hyggeleg å komma hit og få med seg ein ekte bedehusbasar igjen, smiler Arild.
– Og det er kjekt at folk frå alle generasjonar møtest slik.
Likar seg i Lunde
Med på basaren var Martha Lindeflaten (12). Ho har vore på basar mange ganger. Men ho har ikkje vunne noko dei åra ho har vore med.
– Men kanskje det er større sjansar her i Lunde, smiler ho håpefullt.
Det kjekkaste med basar synest ho er å eta kake og bollar, og premiane.
– Det er veldig fint her, og me har vore på besøk i Lunde veldig mykje, fortel ho.
Fullt hus
Bedehusbasaren i Lunde bedehus er ei årleg storhending, og inntektene frå arrangementet er den største økonomiske drivkrafta til bedehuslaget. Torsdag var det heilt fullt hus.
– Eg er kjempefornøgd, seier leiar i bedehuslaget, Marit Humlevik.
– Det er dette som held huset i gang, avsluttar ho.
