ULTRALØP: Peter Tubaas spring 150 kilometer i veka. Sist laurdag sprang han rundt Tysnes. Her frå Holmalio, der møtte han ein gamal buss. (Privat foto)
ULTRALØP: Peter Tubaas spring 150 kilometer i veka. Sist laurdag sprang han rundt Tysnes. Her frå Holmalio, der møtte han ein gamal buss. (Privat foto)

– Når eg spring her, er kvar kilometer ei gåve

Peter Tubaas sprang rundt heile øya, sidan han likevel var på Tysnes.
Publisert 20.07.2019 kl. 06.00.

Kanskje såg du ein kar springande langs vegane rundt Tysnes sist laurdag? I så fall kan det ha vore friviljugfotograf under Tysnesfest, Peter Tubaas.

Til vanleg er Peter busett på Bømlo, men frå torsdag til laurdag var han på Tysnes, på dugnad for Tysnesfest.

Når han ikkje er på fotooppdrag, nyttar han fritida til hobbyen sin; å springa. Peter har drive med ultraløp i 15 år, dei seinare åra mest trening og mindre i konkurransar. Nokre konkurransar blir det likevel kvart år.


Nyt naturen

– Eg spring 150 kilometer i veka, forklarar han beskjedent.

Over 50 kilometer blir det berre på denne eine turen rundt øya. I tillegg sprang han til Godøysund på torsdag og til Flatråker på fredag. Det blir kring nitti kilometer på tre dagar på Tysnes.

Laurdag morgon før klokka ni la han i veg frå Uggdal, der han hadde sovebase under festivalen, mot Flatråker og Hodnanes. «Tysnes» møter han langs fylkesvegen forbi Flakkavågen. Då tek han seg tid til ein bolle-pause.

– Norge er eit vakkert land, og Tysnes er eit Norge i miniatyr. Når eg spring her, er kvar kilometer ei gåve, seier han og smiler.

Dei siste fire vekene har han sprunge både på Tysnes, i Kvinnherad, på Stord og på Bømlo.

– Eg har fått med meg indrefileten då, kommenterer austlendingen som flytta til Vestlandet for ti år sidan.

Etter bollepausen i Flakkavågen gjekk turen vidare langs austsida, til Hovland, over Skaret til Lunde, vidare til Våge og tilbake til Uggdal.


Tungt mot slutten

– På Årbakka blei det ein jordbærpause, og utanfor butikken i Lunde var eg heldig og fekk med meg litt grilling, smiler han nøgd i etterkant.

Dagen før hadde han plassert ut ei colaflaske i Godøysundkrysset. Den kom skikkeleg godt med, det begynte å tæra på kreftene mot slutten.

– Turen var litt lenger enn eg hadde rekna ut på førehand, forklarar han.

I år var han dugnadsfotograf for tredje gong. Kanskje kjem han attende, viss festivalen vil ha han med. Då blir han sikkert å sjå springande langs tysnesvegane igjen.

Men før det skal han vera festivalarrangør heime på Bømlo, for Bømlo Ultrafestival. Dei 20 deltakarane skal springa fem etappar fem dagar etter kvarandre, totalt kring 300 kilometer.

– Det er sikkert den minste festivalen i verda. Alle deltakarane skal bu heime hos meg, seier han, og spring lett vidare.


BOLLEPAUSE: Flakkavågen passerte han i halvtolvtida om føremiddagen.
BOLLEPAUSE: Flakkavågen passerte han i halvtolvtida om føremiddagen.
HAR UTSTYRET I ORDEN: Her er Peter i aksjon som fotograf på Gjerstad under Tysnesfest. (Foto: Camilla Korsnes)
HAR UTSTYRET I ORDEN: Her er Peter i aksjon som fotograf på Gjerstad under Tysnesfest. (Foto: Camilla Korsnes)

Siste saker Gå til framsida