BLEI KJENDE: Aase Larsen, busett på Sotra; Unni Valdersnes, busett i Bergen; Sissel Storetvedt, busett på Stord og Bente Helland, busett i Bergen likte seg på laksafesten til Alsaker. (Alle foto: Vetle Mikkelsen)
BLEI KJENDE: Aase Larsen, busett på Sotra; Unni Valdersnes, busett i Bergen; Sissel Storetvedt, busett på Stord og Bente Helland, busett i Bergen likte seg på laksafesten til Alsaker. (Alle foto: Vetle Mikkelsen)

Stifta nytt vennskap på laksafesten

Fredag arrangerte Gerhard Alsaker laksafest for 25. gong. Som vanleg vanleg var det god stemning og mange frammøtte på Alsaker brygge.
Publisert 27.07.2019 kl. 15.00.

– Laksafesten er berre ein bonus, smilte Aase Larsen, der ho sat på eit bord på Alsaker brygge.

– Me kom på tysdag, og har lege og nytt sola i det flotte hamneområdet her, la ho til.

På bordet sat ho med tre andre. Praten gjekk lett, og ein kunne tru at dei fire hadde vore venninner lenge. Så feil kan ein ta.

– Me møttest i dag, sa Unni Valdersnes.

Ho kjende rett nok to av dei andre ved bordet, Sissel Storetvedt og Bente Helland, frå før av, men dei tre venninnene møtte Aase Larsen for første gong på laksafesten.

Aase var på festen for første gong, men Unni og dei to andre er nærmast for laksafestveteranar å rekna.

– Me kjem hit kvart år, sa Unni.

Dei fire ved bordet fann raskt ut at dei hadde mykje til felles, og at dei kom godt overeins; eit vennskap blei født på laksafesten fredag.


Besøk frå Litauen

Også Neringa Risakovaite var å finna på Alsaker brygge fredag. Ho tok turen saman med kusina Emile Firsovaite og dottera Liepa Risakoviene.

– Eg har kusina mi her. Ho kjem heilt frå Litauen for å passa på dottera mi, medan eg er på jobb i sommar, fortalde Neringa.

I sine tolv år på Tysnes har ho sjølv aldri vore på laksafesten. Både ho, dottera og kusina fekk dermed sitt første møte med den tradisjonsrike festen.

– Me liker laks, sa Neringa.


Kjærastar på tur

Andreas Bakke (24) frå Årbakka tok med kjærasten Sara Kjær (21) frå Klepp, på det populære etegildet.

– Det er første gongen min her, sa Sara, og presiserte at ho meinte festen; på Tysnes har ho vore fleire gongar.

– Kva gjorde at de ville ta turen hit i dag?

– Eg har ferie, og så er det god stemning her, sa Andreas.

– Det er godt med laks. Laks er favorittfisken min. Og så er det fint vêr, la Sara til.

Til dagleg bur dei to på Klepp på Jæren, men dei trivst godt på Tysnes òg:

– Det er kjempefint her! Eg elskar å vera på Tysnes, sa Sara.

– Det er fin natur og bra folk her, la ho smilande til.


Dronefotograf

– Dette er første gongen eg har deltatt på laksafesten, sa Thomas Leite, som opphaveleg kjem frå Stavanger.

For anledninga var han blitt spurd om å vera fotograf. Det var likevel ikkje eit ordinært kamera han hadde med seg; bileta frå kvelden blei tatt med drone.

– Eg begynte med det (dronefoto, journ.merk) då eg kom hit. Det er kjekt å prøva noko nytt, sa Thomas.

– Kva må du hugsa særskilt på når du tar bilete med drone?

– At eg får med folk, utsikt, vêret og litt av stemninga, sa dronefotografen.

Han jobbar med IT i Alsaker-konsernet.


Gode hjelparar

– Eg held styr på alt av innkjøp. Det har eg gjort i 18 år no, sa Lise Skjåk Dalen, sambuar til laksegünder Alsaker.

– Alt bortsett frå fisken. Fisken er det berre han (Gerhard Alsaker, journ.merk) som har styr på, la ho til.

God hjelp har Gerhard og Lise òg i dottera Malene Kristine Alsaker

– Ho har vore med sidan ho kom til, spøkte Lise.

Ho mimra, og fortalde blant anna at dottera, då ho var lita, sov i sovepose i resepsjonen, under laksafesten.

– Korleis er det å jobba med dette arrangementet kvart år?

– Eg har gjort det så mange gongar at eg har grei styring på det, svarte Lise.


Folk kjem att

– Vegen blir til medan du går, sa Gerhard Alsaker til «Tysnes» fredag.

Han fortalde at då dei først begynte å arrangera den årlege laksafesten, var det snakk om å berre grilla nokre få fisk.

– No er det ein del meir førebuingar, sa han.

– Korleis er det å sjå så mange folk på brygga?

– Det er kjekt å sjå. Dei fleste har vore her før, sa laksegründeren.


LANGVEGSFRÅ: Neringa Risakovaite (i midten) hadde med seg besøk heilt frå Litauen. Til venstre er Emile Firsovaite, og til høgre er Liepa Risakoviene.
LANGVEGSFRÅ: Neringa Risakovaite (i midten) hadde med seg besøk heilt frå Litauen. Til venstre er Emile Firsovaite, og til høgre er Liepa Risakoviene.
BUR PÅ JÆREN: Tysnesing Anders Bakke tok med seg kjærasten Sara Kjær på laksafest.
BUR PÅ JÆREN: Tysnesing Anders Bakke tok med seg kjærasten Sara Kjær på laksafest.
DRONE: Eit vanleg kamera var ikkje godt nok for Thomas Leite.
DRONE: Eit vanleg kamera var ikkje godt nok for Thomas Leite.
MOR OG DOTTER: Lise Skjåk Dalen (til høgre) og dottera Malene Kristine Alsaker hjelper til med ulike ting, for at laksafesten skal gå som den skal.
MOR OG DOTTER: Lise Skjåk Dalen (til høgre) og dottera Malene Kristine Alsaker hjelper til med ulike ting, for at laksafesten skal gå som den skal.
SJEFEN SJØLV: Laksegründer Gerhard Alsaker syntest det var kjekt å sjå så mange frammøtte.
SJEFEN SJØLV: Laksegründer Gerhard Alsaker syntest det var kjekt å sjå så mange frammøtte.

Siste saker Gå til framsida

Mykje vatn over stemma

Regntida har visst innteke Tysnes også. Til tider har det nesten «bøtta» ned enkelte stadar dei siste par vekene.Nedbøren har periodevis vore veldig lokal, og ein har kunna opplevd tørr vegbane enkelte stadar og skikkeleg store vasspølar andre stadar i kommunen.Nedbøren viser godt att i dei lokale vassdraga. Ein tur forbi Onarheimsvatnet tysdag var eit godt døme på det. Då rann...

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.