JUBEL: Jentene som spelar for Njardar/Tysnes J13/14 har all grunn til å jubla, etter ein god debut på Norway Cup. Dei vann den første kampen 7-0. (Foto: Lena Vermedal)
JUBEL: Jentene som spelar for Njardar/Tysnes J13/14 har all grunn til å jubla, etter ein god debut på Norway Cup. Dei vann den første kampen 7-0. (Foto: Lena Vermedal)

God stemning på Norway Cup

Norway Cup er inne i sin fjerde dag, og dei to jentelaga frå Tysnes har hatt både opp- og nedturar på fotballbanen så langt.
Publisert 30.07.2019 kl. 14.06. Oppdatert kl. 14.10.

– Jentene har det gøy og synest det er kjekt. Eg trur dei trivst og har dei greitt; dei badar og shoppar og spelar litt fotball, oppsummerer Geir Austvik.

Han er trenar for J15/16, som ikkje har hatt hellet med seg på fotballbanen dei siste dagane:

– Dei har tapt to kampar, den første 7-1 og den andre 5-1. Så det vert B-sluttspel for dei i morgon, opplyser Austvik.

Jentene har framleis ein kamp igjen i dag, klokka 16.15. Då møter dei Rival, som ligg rett over dei på tabellen, med eitt poeng.


Uavgjort mot tabelltopp

For det andre jentelaget, J13/14, er statistikken noko lysare. Dei vann den første kampen 7-0.

– Det gjekk veldig bra i den første kampen. Då var det god stemning. Det var fine forhold – varmt – men dei drakk godt og åt godt og koste seg, fortel trenar Knut Nesse.

Den andre kampen var mot heimelaget Lyn, som Nesse skildrar som eit mykje betre lag. Men jentene frå Tysnes spela uavgjort 1-1, mot laget som toppar gruppetabellen.

– Eg er stolt over jentene for det resultatet. Det er bra gjort å spela uavgjort mot Lyn, og Lyn-spelarane var skikkeleg irriterte over at dei ikkje greidde å vinna. Dei hadde sett på oss då me spelte tidlegare, og skrive ned kven som var gode, og liknande, seier Nesse, og legg til at Tysnes-jentene ikkje hadde spionert på Lyn på førehand.


Kan bli A- eller B-sluttspel

Den neste kampen gjekk av stabelen tysdag morgon, og då møtte jentene Hødd. Kampen enda igjen 1-1.

– Me trudde me skulle vinna den, men me er fornøgde med uavgjort, konstaterer Nesse.

No ligg J13/14 som nummer tre av fem på tabellen, berre to poeng bak Gaular. Dei skal dei møta på banen i ettermiddag, klokka 16.15.

– Vinn me den kampen, går me vidare til A-sluttspelet. Blir det uavgjort eller tap, går me til B-sluttspelet, fortel trenaren.

Han har ingen spådomar for utfallet av kampen, men peikar på at Gaular òg er eit veldig godt lag, som spela uavgjort mot Lyn tidlegare i dag.

– Men me går alltid for siger, og håper på A-sluttspelet, slår han fast.


Betre fotballvêr i dag

Norway Cup er verdas største fotballturnering, som kvart år går av stabelen på Ekeberg i utkanten av Oslo, og varer ei veke.

Dei seinare åra har berre gutelag frå Tysnes vore med på turneringa. At to jentelag får prøva seg i år, er ei spennande utvikling.

– Me er veldig fornøgde, og alle ser ut til å kosa seg. Jentene har bada to av dagane, og me har hatt ein flott tur til no, fortel Nesse, og legg til:

– Det var tøft dei første dagane, med temperaturar på over 30 grader. No har temperaturen falle med om lag 15 grader, så i dag har me litt betre vêr for å spela fotball.

Det er mogleg å sjå den siste innleiande kampen til J15/16 live på heimesida til Norway Cup (NB: Dags- eller vekespass er naudsynt).

• Les også: «Klare for cup-eventyr»


Siste saker Gå til framsida

Mykje vatn over stemma

Regntida har visst innteke Tysnes også. Til tider har det nesten «bøtta» ned enkelte stadar dei siste par vekene.Nedbøren har periodevis vore veldig lokal, og ein har kunna opplevd tørr vegbane enkelte stadar og skikkeleg store vasspølar andre stadar i kommunen.Nedbøren viser godt att i dei lokale vassdraga. Ein tur forbi Onarheimsvatnet tysdag var eit godt døme på det. Då rann...

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.