GODE PØLSER: Nils og Åsta (t.h.) Thorsheim åt sør-afrikansk hotdog til lunsj i Våge i dag. Her saman med Marit Midtbø. (Alle foto: Randi Kleppe)
GODE PØLSER: Nils og Åsta (t.h.) Thorsheim åt sør-afrikansk hotdog til lunsj i Våge i dag. Her saman med Marit Midtbø. (Alle foto: Randi Kleppe)

Spennande smakar på matmarknad

Ein intim setting lokka mange til å prøva nye smakar på matmarknaden i Våge i dag.
Publisert 03.08.2019 kl. 15.05.

Dei tre bodane opna for handel klokka tolv, og folk var ikkje vanskelege å be. Både båtfolk, syklande, andre turistar og dei som venta på ferja, stakk innom den vesle marknaden for å sjå kva som fanst.

Der kunne dei få smaka (og kjøpa) oster og andre geitemjølkprodukt frå Tveitakjerring; oliven, olivenolje, mandlar, sjokolade og meir frå Evas mat; og grillpølser av svine- og oksekjøt frå Gourmet Grill, Bjørnefjorden.


På Tysnes for første gong

– Det vart ost på meg, ja, smiler John Henning Låstad, etter at han har vore innom boden til Lucianne Rijpkema, som driv Tveitakjerring - det vesle ysteriet på Tveit.

– Eg kjem frå Sola, og er på besøk hos nokre gode venner her på Tysnes. Dei bur i eit nydeleg hus heilt nede ved sjøen, fortel han, og peikar innover mot Gjerstad.

Han og kona, Vanja Låstad, vitjar Tysns for første gong, og ville ut og sjå kva som rørte seg på øya.

– Me er her på marknaden og luftar oss. Og når eg kjem her og ser ostar og slikt, då blir eg glad. Men det som hadde vore fantastisk, var om dei stod og steikte fersk, lokal fisk på ei takke, seier han engasjert.

Førsteinntrykket av Tysnes var uansett positivt for både han og kona.– Det er ein kjempeplass. Eg kan forstå at folk trivst her, seier Vanja med eit smil.


Hemmeleg kryddermiks

På eine enden av bodrekka står Yolandi Carr og grillar pølser. Ho har laga dei etter ein tradisjonell, sør-afrikansk oppskrift, med ein hemmeleg kryddermiks.

– Det var eit spesielt krydder, seier Åsta Thorsheim.

Ho sit saman med tre andre ved eitt av borda, og nyt ein litt annleis hotdog-lunsj enn Gilde sine grillpølsar.

– Me er båtturistar, fortel mannen hennar, Nils Thorsheim.

Han og Åsta kjem frå Nordhordland, medan dei to andre, Marit og Per Ragnar Midtbø, kjem frå Sula ved Sognefjorden.

– Me har vore på tur i fleire veker. Me kom til Våge frå Onarheim i dag, og overnattar her til i morgon. Det er alltid kjekt å komma til Våge, seier Nils, og legg til at dette er første Våge-turen i år, og at dei difor ser det nye kaianlegget for første gong.

– Det var jo blitt veldig stort og flott. Det trekker nok mykje båtar, kan eg tenka meg.


Kosemodus

Sjølv om marknaden vart av den mindre sorten, synest ikkje dei i bodene at det trong å vera negativt.

– Det er koseleg med berre oss tre. Me kjenner kvarandre, og får nok seld litt meir varer sidan det ikkje er så mange å konkurrera om merksemda med, seier Lucianne Rijpkema.

Ho fortel at dei satsar på å bli utselde i løpet av dagen, så viss ein enno ikkje har vore innom marknaden, lyt ein skynda seg.

– Me skulle eigentleg ha vore fleire, men folk er på ferie, og det byrjar kanskje bli litt tomt for varer hos enkelte. Difor vart det berre oss tre i dag. Men eg trur det kan vera bra å vera litt færre. Og det kjem stadig vekk innom folk frå fergekøen, frå båtane og andre stader, seier Eva Størksen, som driv Evas mat, og legg til:

– Og folk er i skikkeleg kosemodus for tida. Det er så deilig!


SMAKSPRØVAR: Ostane til Tveitakjerring fekk bein å gå på.
SMAKSPRØVAR: Ostane til Tveitakjerring fekk bein å gå på.
GODT INNTRYKK: John Henning og Vanja Låstad kjem frå Sola, og vitjar Tysnes for første gong. Dei likte det dei såg.
GODT INNTRYKK: John Henning og Vanja Låstad kjem frå Sola, og vitjar Tysnes for første gong. Dei likte det dei såg.
EKSOTISKE VARER: – Eg sel ikkje lokale produkt, men eg har til dømes honning som passar godt saman med ostane til Tveitakjerring, og olivenolje som passar til Villa Lunde sine brød, fortel Eva Størksen frå Os.
EKSOTISKE VARER: – Eg sel ikkje lokale produkt, men eg har til dømes honning som passar godt saman med ostane til Tveitakjerring, og olivenolje som passar til Villa Lunde sine brød, fortel Eva Størksen frå Os.

Siste saker Gå til framsida

Leiar: God dialog med grunneigarane er nødvendig

Over 90 personar på folkemøte om E39-planane viser at det er heilt nødvendig at vegvesenet stiller på Tysnes for å informera om status for den nye stamvegen.Store delar av Tysnes har vore samde om at ein ny E39 bør gå gjennom kommunen vår. Kommunestyret i Tysnes har vore samrøystes på dette. Politikarane var og...