BINGO!: Tobias Alvheim spring opp frå bordet for å henta premien, etter at han fekk fullt brett og vann første runde av bingoen. (Alle foto: Randi Kleppe)
BINGO!: Tobias Alvheim spring opp frå bordet for å henta premien, etter at han fekk fullt brett og vann første runde av bingoen. (Alle foto: Randi Kleppe)

– Eg har eigentleg ikkje så veldig vinnarflaks

Tobias Alvheim spelar ikkje bingo så ofte, men i helga vart det full klaff for trettenåringen.
Publisert 06.08.2019 kl. 16.00.

– Eg har eigentleg ikkje så veldig vinnarflaks, sa Tobias, etter at han stakk av med hovudpremien i første runde av hamnebingoen laurdag ettermiddag.


Godt oppmøte

Tysnes Ungdomslag står bak arrangementet, som vart arrangert for første gong i fjor sommar. Våge Hamn ønskte meir aktivitet i hamna, og gjekk til ungdomslaget for å få hjelp.

– Våge Hamn spurte om me ville laga til nokre aktivitetar. Det har vore eit godt samarbeid, kunne leiar for ungdomslaget, Hans Christian Haaland, fortelja i fjor.

Han debuterte då som bingovert. I år hadde ordførar Kåre Martin Kleppe teke over rolla som bingovert, og med seg hadde han Steffen Sleire Opdal, som er kasserar for ungdomslaget.

– Det er vesentleg fleire med på bingoen i år, kunne Steffen konstatera.


Sikra laurdagsmiddagen

Då bingoen starta, var hamna allereie ganske full av folk. Mange hadde nok vore innom matmarknaden som òg vart arrangert den dagen, før dei vart med på bingoen. Før den første runden var alle borda fulle, og mange ivrige spelarar i alle aldrar kryssa ivrig av for kvart tal som vart ropt opp. Det vart delt ut premiar for fire ulike nivå av «bingo»: førstemann til å få fire hjørne og ei rad; så to rader, og til slutt fullt brett.

Tobias Alvheim kunne jubla då han fekk det siste talet han trong for å få fullt brett. Premien var eit gåvekort på Mandelhuset.

– Eg kjem frå Tananger i Stavanger. Me er her på båtferie, fortel han.

Faren hans, Frode Alvheim, har tanter og onklar her, og Frode fortel at det er grunnen til at dei vitjar nettopp Tysnes.

– Me tøffar opp og ned langs kysten i båt. No skal me vera her til i morgon, før me leverer båten attende i Bergen og reiser heim. Så me rekk akkurat å nytta oss av gåvekortet, smiler han.


Fekk bingo samstundes

Litt færre vert med på andre runde av bingoen, men spenninga vert ikkje mindre av den grunn.

På den nest siste premien får to «bingo» samstundes; til alt hell er dei to mann og kone, og premien er ei eske full av potetgull.

– Heldigvis er det ein premie som er lett å dela, seier Steffen Sleire Opdal spøkefullt.

– Mannen min og borna et mykje potetgull, så dette kom godt med, seier May-Christin Fjærestad, som fekk bingo samstundes som mannen, Geir.

Familien har hytte på Tysnes, og May-Christin fortel at bingoen gav meirsmak:

– Dette var kjekt. Me blir nok med neste gong òg, viss det blir arrangert fleire gongar.


Jamn avslutning

Før den siste «bingoen» var eit faktum, var det fleire personar som hadde reist seg, for å visa at dei mangla berre eitt tal. Til slutt vart Kari Lande den heldige vinnaren av eit kunstverk frå Galleri Elisabeth G.

– Svigerinna mi mangla same tal som meg, så det handla om å ropa «bingo» først. Men det var kjekt, dette, smiler Kari nøgd.


GOD STEMNING: Det var fullt av folk og god stemning rundt borda, då det i helga vart arrangert hamnebingo i Våge.
GOD STEMNING: Det var fullt av folk og god stemning rundt borda, då det i helga vart arrangert hamnebingo i Våge.
KONSENTRERT: Ordførar Kåre Martin Kleppe gjorde ein god jobb som bingovert.
KONSENTRERT: Ordførar Kåre Martin Kleppe gjorde ein god jobb som bingovert.
KUNST: Kari Lande vann andre runde av bingoen, og fekk med seg heim eit måleri frå Galleri Elisabeth G.
KUNST: Kari Lande vann andre runde av bingoen, og fekk med seg heim eit måleri frå Galleri Elisabeth G.
FERIESNACKS: May-Christin og Geir Fjærestad fekk bingo samstundes. Dermed må ekteparet dela på potetgull-premien. Truleg vil borna og få litt. Her med to av dei: Nicolas og Ella Fjærestad.
FERIESNACKS: May-Christin og Geir Fjærestad fekk bingo samstundes. Dermed må ekteparet dela på potetgull-premien. Truleg vil borna og få litt. Her med to av dei: Nicolas og Ella Fjærestad.

Siste saker Gå til framsida

Lesarbrev: Bli kjent-fest

Frå tida i skule og utdanning hugsa eg at det ved starten av skulen vart arrangert bli kjent-fest. Intensjonen var at elevane skulle møtast for å bli kjent med kvarandre. Etter å ha budd på Reksteren no dei siste åtte åra, har tanken streifa meg om me skulle ha arrangert slike festar iblant på Reksteren. Eg observerer at det som før var eit fenomen i byar og tettstader – at folk kan bu tett...

Høsttur med Tysnes reiselag

Tradisjonen tro dro Tysnes reiselag innover mot Hardanger for å teste årets smalahove. Det vil si, noen ville teste dette som noen kaller en delikatesse.