SPENTE: Det neste året skal Samuel Trå vera assisterande direktør på Haaheim, før søskenbarnet Malene Rogdaberg Trå tar over stillinga. (Alle foto: Vetle Mikkelsen)
SPENTE: Det neste året skal Samuel Trå vera assisterande direktør på Haaheim, før søskenbarnet Malene Rogdaberg Trå tar over stillinga. (Alle foto: Vetle Mikkelsen)

– Torstein har gjort det eg har drøymt om heile vegen

Malene Rogdaberg Trå (20) skal bli ny assisterande direktør på Haaheim. Men først skal fetteren Samuel Trå (23) ha jobben i eitt år.
Publisert 06.08.2019 kl. 12.00. Oppdatert kl. 12.01.

– Eg har alltid hatt lyst til å ha praksis her. Då Lea (Qvistgaard, journ.merk) slutta var eg så heldig å få jobb her, seier Malene Rogdaberg Trå (20).

Ho kjem opphaveleg frå Strandebarm i Kvam, og studerer bachelor i hotelleiing i Bergen. Sidan februar har ho vore i praksis på Haaheim. No skal ho altså òg bli assisterande direktør ved det storslegne hotellet, men først skal ho i permisjon eitt år, ettersom ho skal skriva bacheloroppgåve.

– Då trong ho eigentleg ein vikar, eller nokon som kunne vera ho, i eitt år. Då tok eg pause frå masterstudia mine i Oslo, seier Samuel Trå (23), som kjem frå Lindås.

Han har ein bachelor i HR og personalleiing, og driv på med ein mastergrad i IT og informasjonssystem. No får han grundig opplæring av kusina Malene, før han for fullt går inn i vikariatet som assisterande direktør.


Spennande stilling

– Det er ei krevjande og utfordrande stilling. Det er mykje ansvar, og eg får brukt utdanninga mi veldig mykje, seier Samuel.

– Det er ikkje så mange tilsette her, så då blir det litt sånn at ein må steppa inn der det krevst. Eg har høyrt at eg for eksempel vil bli nøydd til å vera litt servitør her og der òg. Det har ikkje skjedd endå, men det kan fort skje.

Malene fortel at ho set pris på kor fleksibel stillinga er. I tillegg trivst ho godt på Tysnes.

– Eg har alltid likt sånne små plassar. Eg er veldig bygdejente, seier ho.

– Her får eg kombinert alle interessene mine. Eg får jobba med hotell, som er kjempekjekt for meg, samtidig som eg får driva med musikk. Eg får òg vera på kjøkkenet når eg har lyst til det. Eg har fått lært veldig mykje, både gastronomisk, musikalsk og historisk, legg den engasjerte kvemmingen til.

Ho deler den musikalske interessa si med Haaheim-husfar Torstein Hatlevik; til liks med han, har ho vore å sjå på konsertane på Haaheim i sommar.


Unikt konsept

Både Malene og Samuel har mange lovord å koma med, når det gjeld konseptet Haaheim Gaard.

– Torstein har gjort det eg har drøymt om heile vegen. Det som er det finaste og viktigaste for min del, er at alt er veldig ekte. Gjesteopplevinga blir veldig ektefølt, og Torstein speler veldig mykje på humor og sjarm, seier Malene.

– Eg er veldig nasjonalromantisk, så eg elskar denne plassen, legg ho til.

For Samuel, som, fram til juli i år, budde og studerte midt i Oslo, var kontrasten til Haaheim stor.

– Eg flytta jo frå Oslo for ei veke sidan. Då budde eg i ei blokk med utsikt til E18. Så køyrde eg hit på ein dag, tok ferja frå Os, og plutseleg var eg i Våge. Så køyrde eg endå lenger, og så var eg langt oppe i skogen. Plutseleg skulle eg opp denne grusvegen til hotellet, og då lurte eg på kva eg hadde gjort no, ler han.

Etter at den første overraskinga hadde lagt seg, blei inntrykket hans av plassen betrakteleg betre.

– Det er jo ekstremt fint. Eg hadde ikkje eigentleg eit bilete av kva eit historisk hotell var. No ser eg at heile konseptet er gjennomført frå ende til annan, smiler Samuel.

– Me serverer mat som er ei god blanding av historisk, klassisk og moderne, og me har eksperimenterande kokkar. Og så er det heile følelsen av å bu på ein stad som denne, med stor hage og alt. Det er eit veldig nytt konsept for meg.


Inspirerande sjef

– Korleis er det å jobba under Torstein Hatlevik?

– Han er ein veldig inspirerande fyr. Han har fått til masse, seier Malene.

– Han har gjort veldig mykje riktig med denne staden. Det er kult å sjå kva han har fått til, legg Samuel til.

Dei skryter begge av merkevarebygginga til den profilerte hotellsjefen.

– Det er veldig kjekt for meg å sjå, for me har jo hatt om dette på skulen, korleis han har bygd opp hotellet som ein eigen destinasjon. Det er jo langt oppe i gokk, og mange kjem hit for å besøka Haaheim, og ikkje nødvendigvis for å besøka Tysnes.


Blir eit bra team

– Kva bringar de til jobben?

– Det er mykje av det teoretiske. Me har mykje skule begge to, seier Samuel.

Han trur Torstein vil setta pris på å ha nokon som tar seg av det teoretiske, som har med rutinar og protokollar å gjera.

– Og så trur eg at me, på ulike måtar, er kreative sjeler, som kan koma med mange smarte idear til alt mogleg, legg Samuel til.

Malene har tru på at dei tre vil jobba godt saman.

– Eg håper at me kan vera nye augo, og prøva å sjå ting på andre måtar og finna andre løysingar, slik at me alltid kan veksa, seier ho.

– Eg trur kombinasjonen av Samuel sin personalkunnskap, min hotellkunnskap og Torstein si erfaring kjem til å gjera oss til eit veldig bra team, og at me kan veksa på kvarandre, held Malene fram.


Store sko

Stillinga som Samuel og Malene skal inn i, tilhøyrde tidlegare Lea Rehling Qvistgaard, som no skal til som dagleg leiar ved Onarheim Landhandel AS.

– Det er jo veldig store sko å fylla. Alle seier «ja, er det du som er den nye Lea?», for Lea er jo vidgjeten for å ha gjort ein veldig god jobb. Dette blir spennande og kjekt, men utfordrande, seier Malene.

Samuel seier seg einig.

– Det blir jo litt skummelt, for Lea har sett sine spor her. Det er litt utfordrande å finna ein balansegang mellom å vera «den nye Lea», og å finna på nye ting sjølv, seier han.

Dei to har likevel moglegheita til å ringa forgjengaren, dersom dei lurer på noko. Malene har framleis god kontakt med den tidlegare sjefen sin:

– Eg og Lea blei veldig nære. Me jobba tett frå februar til juni, seier Malene.


– Ei moglegheit

Husfar Torstein Hatlevik har berre godord om dei to nykomarane på Haaheim.

– Dei verkar veldig hyggelege begge to. Dette blir kjempespennande, seier han.Han understrekar at det er viktig å sjå endringar i personalgruppa som ei moglegheit, og ikkje berre ei utfordring.

– Dette er ei moglegheit for oss, til å få nye impulsar og å utvikla oss vidare. Alle medarbeidarar tar med seg erfaring. Dei kjem med nye idear, så dei løftar produktet, seier Torstein.Torstein trur òg det kjem gjestene til gode at Malene deler interessa hans for musikk.– Det er sjølvsagt veldig kjekt for gjestene at det er fleire som syng til dei, seier han.

– Alle kjem med sine sterke og svake sider. Så blir det ein symbiose, for at ein sånn plass skal fungera best mogleg.


GODT SKULERTE: Malene og Samuel kjem til å ha nytte av utdanningane sine i den nye jobben.
GODT SKULERTE: Malene og Samuel kjem til å ha nytte av utdanningane sine i den nye jobben.
HUSFAR: Torstein Hatlevik har tru på dei to nykomarane. (Arkivfoto: Vetle Mikkelsen)
HUSFAR: Torstein Hatlevik har tru på dei to nykomarane. (Arkivfoto: Vetle Mikkelsen)

Siste saker Gå til framsida