Vêret har variert ein del under årets LS. Gaute Eide Bergstø opplevde regnbyger under baneskytinga. Medan sol og glede prega feltrunden.
Vêret har variert ein del under årets LS. Gaute Eide Bergstø opplevde regnbyger under baneskytinga. Medan sol og glede prega feltrunden.

God skyting på Landsskyttarstemnet

Alle som har prøvd veit at det er veldig vanskeleg å levere toppresultat på eit lands-skyttarstemne. Slik også på Evje denne veka. Fleire skyttarar frå Tysnes har like fullt prestert veldig bra.
Publisert 07.08.2019 kl. 15.55. Oppdatert kl. 16.24.

Tysnes skyttarlag er ikkje representert på LS. Men tysnesingar som skyt for andre klubbar i nabolandskapet, har vore svært stødige på avtrekkaren.

Heine Nes har lenge vore den einaste klasse 5-skyttaren på øya. Før denne sesongen melde han overgang til Stord. Ein klubb som i alle år har hatt ein stor og slagkraftig gjeng. Med alt frå talentfulle rekruttar til svært så meritterte seniorar.


Dårleg betalt

– Sjølv om eg altfor sjeldan er over på treningar, har det løfta meg å kome inn eit konkurranse-miljø. På Vestlandsstemnet oppnådde eg 246 poeng, og då fekk eg for alvor ei kjensle av at dette går rette vegen.

På LS var Nes i aksjon tysdag ettermiddag. Lag etter lag med klasse 5-skyttarar gjekk på standplass. Veldig mange med eit mål om ei skive i Kongelaget. Dei aller, aller fleste vart skuffa.

Heine hadde nok ingen konge-planar, men skaut veldig bra.

– Det er mest litt rart å stå her etterpå og seia at eg hadde mykje stang ut. Hadde nemleg god kontroll på ståande, men fekk dårleg betalt. Tre av skota var 8,9, 9,8 og 9,9. Det forsvann nokre poeng der. Klarte også å skyta ein 9,9 på eitt av dei siste liggjande-skota på grunnlaget. Men 241 poeng er jo eit veldig bra resultat. Eg er best av alle frå Stord, og får skyta finale for aller første gong. Dette har definitivt gjeve meirsmak, smiler Nes.


Seksar på bane

Gaute Eide Bergstø er osingen som flytta med familien til Borgjo, attende i 2013. I tillegg til å mekka på bil og vera programleiar under Tysnesfest, har han alltid vore ein habil skyttar. I Os skyttarlag.

– Det har vore ei veldig kjekk veke på Evje. Både sosialt og til dels sportsleg. Baneskytinga gjekk litt skeis, men det var jo ikkje så rart når eg av ein eller annan uforklarleg grunn klarte å sende i veg ein seksar. Då var det heller ikkje mykje til hjelp at eg avslutta med hundre poeng på dei siste ti skota (som i skytesamanheng heiter grunnlaget), fortel friskusen på 16, som er med på sitt fjerde LS. Og som har noko veldig spennande å sjå fram til på fredag.

– Feltrunden min gjekk veldig bra. Eg kom gjennom alle fem halda med treff, og dermed finale. Då skal me skyta seks skot kneståande og seks skot liggjande mot ein prismefigur. Håpar det blir eit flott LS-punktum, smiler Bergstø.


I kjempeslag

I ein reportasje frå årets LS er det ikkje mogeleg å koma utanom Knut Dalland. Han er som god vin, og vert berre betre og betre med åra. På samlagsskytinga opna han ballet for Sunnhordland med noko nær ein perfekt serie. 100 poeng og ni innertreff. Berre legenda Odd Kolsrud klarte det betre.

– Jau takk, det var god skyting. Men det kjente eg også. Og ei fin oppreising etter den innleiande baneskytinga. Der var eg ukonsentrert på ein serie, og kjente at to skot nappa litt ut. Eg håpa likevel at dei var på den rette sida av tiaren. Men begge hamna rett på utsida. Det var litt nedtur, seier bussjåføren på 69. Som kom til Evje og årets LS med litt ambisjonar. Ikkje minst etter at han skaut eit stemne inne i Sørfjorden for tre veker sidan.

– Då fekk eg 350 poeng med 31 innertreff. Det var kjempebra.

Kjempebra skaut han også i furuskogen kring skytebana, langt nede i Setesdalen. 30/21. Dermed skal også han ut i finale på fredag. Der det er lov å ha forventningar.


Heine Nes skaut 241 på bane i klasse 5. Dermed blir det finaleskyting onsdag ettermiddag.
Heine Nes skaut 241 på bane i klasse 5. Dermed blir det finaleskyting onsdag ettermiddag.
Knut Dalland, Hatlestrand og Ølve skyt betre og betre med åra. På LS har han kvalifisert seg til feltfinalen på fredag. I tillegg til at han leverte ein knallstart til Sunnhordland på samlagsskytinga.
Knut Dalland, Hatlestrand og Ølve skyt betre og betre med åra. På LS har han kvalifisert seg til feltfinalen på fredag. I tillegg til at han leverte ein knallstart til Sunnhordland på samlagsskytinga.

Siste saker Gå til framsida

Mykje vatn over stemma

Regntida har visst innteke Tysnes også. Til tider har det nesten «bøtta» ned enkelte stadar dei siste par vekene.Nedbøren har periodevis vore veldig lokal, og ein har kunna opplevd tørr vegbane enkelte stadar og skikkeleg store vasspølar andre stadar i kommunen.Nedbøren viser godt att i dei lokale vassdraga. Ein tur forbi Onarheimsvatnet tysdag var eit godt døme på det. Då rann...

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.