SEL MANGE KAKER: – Det vert nok selt 10-12 kaker kvar dag, så det er ikkje mykje daudtid. Heldigvis er eg ikkje aleine om dette, men travelt er det; stort sett åtte til ti-timars dagar, sju dagar i veka, og eg tullar ikkje viss eg seier at me ikkje er nedpå ein stol i løpet av dagen, fortel Kjersti Marita Skaten, som her er i full sving med å baka fem ostekaker. (Foto: Privat)
SEL MANGE KAKER: – Det vert nok selt 10-12 kaker kvar dag, så det er ikkje mykje daudtid. Heldigvis er eg ikkje aleine om dette, men travelt er det; stort sett åtte til ti-timars dagar, sju dagar i veka, og eg tullar ikkje viss eg seier at me ikkje er nedpå ein stol i løpet av dagen, fortel Kjersti Marita Skaten, som her er i full sving med å baka fem ostekaker. (Foto: Privat)

Travle kakebakedagar på Island

For andre året på rad har tysnesing Kjersti Marita Skaten sommarjobb på Island.
Publisert 07.08.2019 kl. 06.00.

– Korleis eg enda opp her? Nei, eg er gift med ein mann frå Island, og har ei vikariatstilling heime, så eg treng sommarjobb. Også er jo naturen her oppe heilt fantastisk, fortel ho entusiastisk, når «Tysnes» slår på tråden.


Tre månader på Island

Sommarjobbinga på Island tok til med ei stilling på ein kafé i fjor sommar, og det treivst ho så godt med at ho hoppa på høvet til å gjera det same i år.

– Den kaféen eg jobbar på no ligg i Djúpivogur, heilt aust i landet. Der kokar eg suppe, bakar kaker og brød, og tek imot turistar. Det er heilt enormt med turistar her, fortel Kjersti.

Ho begynte i sommarjobben den 10. juni, og skal halda fram til den 10. august. Dei siste vekene saman med yngstedottera Oda Skaten Aarbakke, som òg jobbar på kaféen fram til den 10. august.

– Det er veldig kjekt. Det er reine familietreffet, seier Kjersti spøkefullt.


Alltid meir å sjå

Ho fortel om lange og travle dagar på jobb, og seier at ho difor ikkje har fått reist så mykje rundt som ho skulle ha ønskt. Men tidlegare i sommar fekk ho besøk av nokre venner heimanfrå, og då tok ho seg tid til å sjå seg litt rundt saman med dei.

– Då reiste me nordover, mellom anna til Mývatn. Det betyr Myggvatn, og ein forstår kvifor, når ein er der.

Ho held fram med å forklara kva det er med den islandske naturen som er så unikt:

– Du kan nok sjå same type natur over heile verda, men ikkje så mykje på så liten plass. Det er store skilnadar på naturen over korte avstandar, og den eine augneblinken kan ein vera i noko som liknar eit månelandskap, og det neste er ein i eit irrgrønt landskap, seier ho oppglødd, og legg til:

– Eg trudde eg hadde sett alt, men der tok eg feil. Det er alltid noko nytt å sjå. Eg har sett mykje, men ikkje nok, poengterer ho.


Kaldt i sjøen

– Du sel Island ganske bra!

Kjersti ler, og svarar:

– Ja, kanskje eg skulle starta som turguide her. Det er altså så fantastisk natur her, og det er ein flott plass å reisa rundt.

Sjølv om ho tydelegvis er veldig glad i Island, er det éin ting ho plutseleg kjem på som er betre i heimlandet:

– Eg saknar badetemperaturar i sjøen, konstaterer ho.– Men Island har varme kjelder?– Ja, me har nokre varme kjelder fem minutt unna, der det er 42 grader i vatnet. Så me er der borte og kokar oss av og til, avsluttar Kjersti.


Siste saker Gå til framsida

Mykje vatn over stemma

Regntida har visst innteke Tysnes også. Til tider har det nesten «bøtta» ned enkelte stadar dei siste par vekene.Nedbøren har periodevis vore veldig lokal, og ein har kunna opplevd tørr vegbane enkelte stadar og skikkeleg store vasspølar andre stadar i kommunen.Nedbøren viser godt att i dei lokale vassdraga. Ein tur forbi Onarheimsvatnet tysdag var eit godt døme på det. Då rann...

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.