LØPESTJERNE: Pernilla Eugenie Epland sprang 5.000-meteren i NM på Hamar førre helg, og enda på tredjeplass etter ein god sluttspurt, trass trøblete bein. (Foto: Kondis/Arne Dag Myking)
LØPESTJERNE: Pernilla Eugenie Epland sprang 5.000-meteren i NM på Hamar førre helg, og enda på tredjeplass etter ein god sluttspurt, trass trøblete bein. (Foto: Kondis/Arne Dag Myking)

Vann bronse i NM, men trekker seg frå lag-EM

Trøbbel med beina setter ein stoppar for Pernilla Eugenie Epland sin draum om å representera Norge i European Team Champion-ships i Sandnes i helga. Ho klarte likevel å kjempa seg til ein bronsemedalje på 5.000 meter i NM sist helg.
Publisert 08.08.2019 kl. 13.00.

– Det hadde vore den største konkurransen i min karriere som eg hadde fått representert Norge i, fortel ein skuffa Pernilla Eugenie Epland.

Til helga reiser Norge sine største friidrettsatletar til Sandnes for å delta i European Team Championships. Dette er ein internasjonal lagkonkurranse der nasjonane i Europa konkurrerer mot kvarandre om å vera den beste friidrettsnasjonen. Medan dei tolv beste nasjonane reiser til Polen for å konkurrera om å verta krona til meister, skal Norge og dei elleve andre nest beste nasjonane konkurrera på nivå to, der dei tre beste laga rykker opp til øverste nivå til neste meisterskap i 2021.


Måtte trekka seg

Saman med namn som Karsten Warholm, Karoline Bjerkeli Grøvdal, Amalie Iuel, Ezinne Okparaebo og dei tre Ingebrigtsen-brørne, var Pernilla teken ut til meisterskapen, og skulle representera Norge på 5.000 meter. Derimot skapar trøbbel med beina utfordringar for Tysnes-løparen, noko som også sette sitt preg på NM på Hamar som vart arrangert førre helg.

Det var på European 10.000m Cup i London i juli at ho fyrst merka problema, som enda med at ho måtte bryta løpet.

– Det går fint å ligga på terskelfart, men så fort eg aukar farten og begynner å produsera melkesyre, knyter det seg i beina, fortel ho.10.000-meteren i London vart opna i eit høgt tempo, og då Pernilla i tillegg til beinproblema fekk krampe i låret, måtte ho kasta inn handkledet.


Vann likevel bronse

Sidan den gong har problema halde fram, og dei hindra Pernilla frå å yta maksimalt i norgesmeisterskapen førre helg. Det enda likevel med ein bronsemedalje på 5.000 meter, før ho valde å stå over den avsluttande 10.000-meteren, der ho var regjerande norsk meister.

– Eg stod over 10.000-meter for å auka sjansen for å få kroppen på plass til lag-EM, fortel ho.

Ho er likevel nøgd med at ho under dei gjeldande forholda klarte å dra i land ein medalje på 5.000-meteren.– Planen var å legga meg bak frå starten av løpet, og sjå kva det kunne halda til. Dei fyrste 3.000 metrane gjekk greitt, men så vart farten sett opp og beina begynte å knyta seg.

Maria Sagnes Wågan og Runa Skrove Falch fekk ein luke til resten av feltet og sprang saman inn til mål, der Sagnes Wågan vann eitt sekund framfor Skrove Falch. Lenger bak klarte Pernilla å vera med i kampen om den siste pallplassen.

– Undervegs tenkte eg at alt handla om å fullføra, men så såg eg at eg begynte å ta innpå bronseplassen. Med 200 meter igjen låg eg berre ti meter bak, og eg klarte akkurat å mobilisera til ein spurt, fortel Pernilla.

Ho kapra dermed bronsen 17 sekund bak duoen i tet, og to sekund framfor Eli Anne Dvergsdal som måtte ta til takke med fjerdeplassen.


God form

– Med tanke på dei problema eg opplever, så var nok tredjeplassen det beste eg kunne håpa på, seier Pernilla.

Tida hennar på 5.000-meteren vart 17.00,80. Det er nesten 40 sekund bak bronsetida hennar for eitt år sidan, og nesten 50 sekund bak den personlege rekorden på 16.11,92, som ho sette i England i midten av juni i år.

– Hadde eg hatt ein optimal dag, så skulle eg nok tatt gullet. Formen er der, men beina svarer ikkje.


Testa beina

Pernilla hadde framleis håp om at ting skulle ordna seg til European Team Championships, og valde dermed å stå over 10.000-meteren på Hamar. Distansen vart vunne i overlegen stil av langrennsløpar Therese Johaug.

– Eg hadde nok ikkje slått ho uansett, fortel Pernilla.

Måndag var ho tilbake frå Hamar, og testa beina igjen. Då vart det heilt tydeleg at ting ikkje stemmer, og ho skjønte kva avgjerd som måtte takast med tanke på lag-EM.

– Eg prata lenge med trenaren min i går, og me kom fram til at det einaste rette var å trekka seg frå EM. Sjølv om det er kjipt, så føler eg meg trygg på at det er den riktige avgjerda, seier Pernilla.

Ho har også vore til behandling, men har endå ikkje funne ut kva som skaper problema.

– Det er ingen som kan seia nøyaktig kva som er galt, så eg er litt på jakt etter svar. Men rådet frå legen er å berre trena roleg i tida som kjem, og helst ikkje springa på asfalt.


Ser framover

Neste år går den individuelle europameisterskapen i friidrett av stabelen i Paris, ein meisterskap Pernilla lenge har hatt som mål å kvalifisera seg til. Ho har i år tatt nye grep i satsinga mot Paris.

– Eg har auka treningsmengda, og eg har vore på høgdeopphald. Og så har eg i utgangspunktet vald å stå over terrengsesongen i år, fortel ho.

No ser ho fram til slutten av oktober, der ho etter planen skal springa halvmaraton. Halvmaraton er ein av øvingane, saman med 5.000 meter og 10.000 meter, der Pernilla har moglegheit til å springa seg inn på EM-laget neste sommar. Ho håpar at løpet i oktober vil gje ein peikepinn på korleis ho ligg an med tanke på å kunna delta på halvmaraton i Paris.

– Litt av grunnen til at eg tok avgjerda med å ikkje delta i Sandnes i helga, er at eg skal få ein god haustsesong. Viss eg hadde stilt opp og pressa kroppen for hardt, kunne eg risikert å berre ha gjort det verre.

For sjølv om ho er skuffa over å ikkje få delta på lag med resten av dei norske stjernene i Sandnes i helga, er ho tydeleg på kva som er det prioriterte målet.

– Det hadde sjølvsagt vore utruleg gøy å vera med i helga, men viss eg klarar å koma med til EM neste år, så vil det heilt klart vera større, avsluttar Pernilla.


PÅ PALLEN: Trass bronsemedaljen i NM har Pernilla vald å trekka seg frå lag-EM i Sandnes til helga. – Så fort eg aukar farten og begynner å produsera melkesyre, knyter det seg i beina, fortel ho. (Foto: Ellinor Epland)
PÅ PALLEN: Trass bronsemedaljen i NM har Pernilla vald å trekka seg frå lag-EM i Sandnes til helga. – Så fort eg aukar farten og begynner å produsera melkesyre, knyter det seg i beina, fortel ho. (Foto: Ellinor Epland)

Siste saker Gå til framsida

– Veldig skummelt

Hanne Sofie (11) og Milla (9) spelte heilt åleine for ein fullsett kulturkyrkje på den årlege julekonserten til Onarheim Musikklag.

Leiar: Skulesatsing er viktig for lokal optimisme

Tysnes kommune satsar 70 millionar på eit flunkande nytt mellomtrinn på Tysnes skule. Det er ei offensiv og positiv satsing på skulen i Tysnes.I sist veke blei det kjent at det er det byggjefirmaet Leigland Bygg frå nabokommunen Fusa som får oppdraget. Kontrakten skal skrivast under i komande veke. Då skal alt...

Starta ein ny tradisjon

Då Maren (10) skulle opptre på julekonserten i Tysnes kyrkje i kveld, blei ein ny tradisjon skapt for familien Lunde.