STORFINT BESØK: Stortingsrepresentant Nils T. Bjørke vitja nyleg Tysnes. Då diskuterte han mellom anna vindkraftutbygging med listetopp for Tysnes Sp, Arne Leite.
STORFINT BESØK: Stortingsrepresentant Nils T. Bjørke vitja nyleg Tysnes. Då diskuterte han mellom anna vindkraftutbygging med listetopp for Tysnes Sp, Arne Leite.

Drøfta vindkraftutbygging

Laurdag 3. august vitja stortingsrepresentant Nils T. Bjørke Tysnes, der han diskuterte viktige saker med ordførarkandidat for Tysnes Sp, Arne Leite.
Publisert 13.08.2019 kl. 06.00.

Bjørke kjem frå Voss, og har lang fartstid som bonde og politikar. Han har mellom anna tidlegare vore leiar i Hordaland Bondelag, Norges Bondelag og Voss Bondelag, og er fjerde visepresident i Stortinget, samt andre nestleiar i kontroll- og konstitusjonskomiteen.


Vasskraft først

På Tysnes var det vindkraftutbygging som var det dominerande temaet. Bjørke og Senterpartiet er imot at kommunane ikkje kan få legga ned veto mot ei eventuell vindkraftutbygging,

– Me vil at kommunane skal få den tryggleiken som vetorett gjev. Og me vil at kommunane skal få noko tilbake for å stilla areal til disposisjon, sa stortingsrepresentanten.

Både Bjørke og Arne Leite understreka at dei prinsipielt er imot å bygga ut store område til vindkraft, før ein har utnytta den vasskrafta som allereie eksisterer.

– Eg trur det er omtrent like mykje energi å henta ut ved å rusta opp eksisterande vasskraftverk, som det er ved å bygga ut dei planlagde vindkraftverka, sa Bjørke.


Høyringsfrist i oktober

Det som kanskje talar mest imot vindkraftutbygging, ifølgje dei to Senterparti-kollegaene, er det store inngrepet som vert gjort i naturen når ein skal bygga vindmøller. Ikkje berre fysisk, men òg visuelt:

– Ein må bygga reine autostradaen for å koma fram med dei store køyretøya som trengst for å bygga vindmøller. Det er omfattande, irreversible inngrep i naturen. Og det er store installasjonar; vindmøllene kan vera 250 meter høge, sa Bjørke.

– Det er om lag like høgt som Ramnanuten, skaut Leite inn.

NVE held i desse dagar på med ei vurdering av ulike område som kan eigna seg til vindkraftutbygging. Nokre få område på Tysnes er framleis aktuelle, etter ein runde med innspel i fjor.

Den generelle høyringsfristen for dei resterande områda i den nasjonale ramma for vindkraft er 1. oktober 2019.

– Eg har bede kommunestyret om å senda ei felles høyringsfråsegn, fordi det er det beste. Men Tysnes Sp kjem nok og til å senda inn. Alle kan gjera det, avslutta Leite.


Siste saker Gå til framsida

Søkte om meir pengar

Etter underskotet i fjor er Tysnesfest i år tilbake på pluss-sida. Samtidig er kommunepolitikarane innstilte på å auka støtten til festivalen.