FANN HUNDEN: Historia enda godt, med at dei to fann igjen hunden, her spela av Nora.
FANN HUNDEN: Historia enda godt, med at dei to fann igjen hunden, her spela av Nora.

Flott show av «verdas minste teatergruppe»

Ein søster-duo frå Nederland imponerte med eit klovne- og teatershow i Lunde ungdomshus på fredag.
Publisert 14.08.2019 kl. 16.18. Oppdatert kl. 16.28.

Dei to søstrene Kari Helena Tysnes Veenstra (10) og Nora Sofie Tysnes Veenstra (14) var sist veke med på eit femdagars klovne- og teaterkurs i Lunde, i regi av sjukehusklovn og teaterlærar Madeleine Straume.

Kurset vart avslutta med eit sjølvlaga show, som dei to jentene synte fram for foreldre og besteforeldre, og ikkje minst heile Lunde barnehage.

– Dei har vore kjempeflinke, skryter kurshaldaren, og held fram:

– Dei er jo søsken, og då kan det fort bli litt krangling. Men dei har jobba kjempebra saman. Eg har kalla dei «verdas minste teatergruppe», seier ho med eit smil.


Frå seks til to deltakarar

Opphavleg var det fire påmelde for heile veka, pluss to som var med på dagskurs på måndagen. Dessverre måtte to av deltakarane som skulle vera med på kurset heile veka melda avbod etter eit par dagar, på grunn av upårekna hendingar, og dermed vart dei to søstrene dei einaste deltakarane dei siste tre dagane. Men det hindra ikkje dei to jentene frå å stella i stand eit spennande show.

– Me fekk vera med og laga historier til showet. Me måtte finna ein plass i huset (ungdomshuset, journ.merk.), og deretter bruka fantasien for å laga ei historie om kva som kan ha skjedd på den plassen, fortel Nora.

– Så det er tre ulike stader i huset, og historiene er delte inn i fleire delar, og handlar om ein hovudperson som har ein draum, men så står det noko i vegen for denne. Deretter vert draumen gradvis oppfylt, forklarar Kari.


Klovning og improvisasjon

I løpet av veka har dei to jentene fått læra om klovning og korleis ein skal vera morosam, og å halda merksemda til publikum.

– Også har me lært å snakka tydeleg, og improvisasjon, fortel Nora.

– Korleis gjekk det til at de vart med på kurset?

– Mormor, som bur på Tysnes, las om det, og spurte meg om eg ville bli med på kurset, fordi eg likar teater, svarar Nora.

– Og då vart eg òg med, skyt Kari inn.

Begge jentene nikkar bekreftande på spørsmål om det har vore kjekt å vera med på kurset.

Jentene har mor frå Tysnes, og vitjar mormora i Vee annakvar jul, og kvar sommar, i seks veker. Då er dei mykje på sjøen, og driv med mellom anna med wakeboarding og vass-ski.

– På laurdag har me vore her i fire veker, fortel dei.

Den nest siste veka av tysnesferien får Nora besøk av ei venninne frå Nederland. Då skal venninna vera med på aktivitetsveka, medan Nora skal vera med og hjelpa til.


Engasjerer publikum

Før showet står mange barnehagebarn utanfor ungdomshuset og ventar på å få koma inn. Jentene verkar meir spente enn nervøse.

– Kva tenker de om å skulla ha show for ein heil barnehage?

– Det er litt spennande, men gøy, svarar Nora.

– Har de gjort liknande før?

– Eg har vore med på ein musikal, fortel eldstesøstera.

Barna bankar på døra og får koma inn. Der står Nora med raud klovnenase og ventar.

– Me har mista hunden vår, vil de vera med og hjelpa oss med å finna den? spør ho, og får ivrige «ja» frå barna.

Showet til jentene engasjerer barnehagebarna med ein gong, og dei vert leidde frå rom til rom, medan historia gradvis utfaldar seg.

I siste del av showet, når dei to klovne-aspirantane finn igjen hunden sin, er det til applaus og smil frå barna, som tydeleg levde seg inn i historia til søsken-duoen.

– Eg er kjempefornøyd, og synest det var kjempekoseleg, seier ei tydeleg stolt mormor, Kari Kjos, etter vel fullført framføring, og legg til:

– Kari syntest det var så kjekt, at ho no har lyst til å melda seg på teaterkurs i Nederland.

Om jentene er heldige, kan dei òg få vera med på nytt kurs på Tysnes neste sommar:

– Eg håpar å ha nytt kurs neste år. Men då blir det nok i Våge, fordi det er enklare for fleire barn å koma seg dit, avsluttar kurshaldar Madeleine Straume.


TEATER: Kari skulle fly til Syden. Då måtte storesøster Nora og kursleiar Madeleine trø til som fly.
TEATER: Kari skulle fly til Syden. Då måtte storesøster Nora og kursleiar Madeleine trø til som fly.
TROLLBATT PUBLIKUM: Barna frå Lunde barnehage følgde ivrig med på showet.
TROLLBATT PUBLIKUM: Barna frå Lunde barnehage følgde ivrig med på showet.
KLOVNE-ASPIRANTAR: Kurshaldar Madeleine Straume hadde berre lovord å koma med om dei to søstrene Nora (t.v.) og Kari Tysnes Veenstra, etter vel gjennomført kursveke og framføring.
KLOVNE-ASPIRANTAR: Kurshaldar Madeleine Straume hadde berre lovord å koma med om dei to søstrene Nora (t.v.) og Kari Tysnes Veenstra, etter vel gjennomført kursveke og framføring.

Siste saker Gå til framsida

Mykje vatn over stemma

Regntida har visst innteke Tysnes også. Til tider har det nesten «bøtta» ned enkelte stadar dei siste par vekene.Nedbøren har periodevis vore veldig lokal, og ein har kunna opplevd tørr vegbane enkelte stadar og skikkeleg store vasspølar andre stadar i kommunen.Nedbøren viser godt att i dei lokale vassdraga. Ein tur forbi Onarheimsvatnet tysdag var eit godt døme på det. Då rann...

Rune Alver kjem til OnarTun

Er du glad i klassisk musikk av den storslegne kaliberen, bør du ikkje gå glipp av konserten med Rune Alver og Lise Skjåk Dalen.