TAP: Halsnøy vart for tøffe for Emre Hagen og resten av Njardar sitt a-lag laurdag. (Alle foto: Camilla Korsnes)
TAP: Halsnøy vart for tøffe for Emre Hagen og resten av Njardar sitt a-lag laurdag. (Alle foto: Camilla Korsnes)

Fekk bank av Halsnøy

Etter å ha opna haustsesongen med to strake sigrar, kom a-laget til Njardar/Tysnes ned på landjorda igjen mot Halsnøy laurdag.
Publisert 01.09.2019 kl. 10.55. Oppdatert 04.09.2019 kl. 11.58.

Det var to formlag i 6. divisjon som møttest på Reiso laurdag. Heimelaget opna hausten med å vinna borte mot Eikelandsfjorden og heime mot Laksevåg, medan Halsnøy også opna haustsesongen med to sigrar. Fyrst ein bortesiger mot Bergkrystall, følgd av ein heimesiger mot Eikelandsfjorden.


Opna jamt

Oppgjeret laurdag opna jamspelt, og det vart ein kamp mellom laga om å få det fyrste målet. Og det tok ein halvtime før målet kom. Halsnøy kom på ein farleg overgang, og eit innlegg frå høgresida trefte ein umarkert Halsnøy-spiss, som sikkert sette ballen i mål frå åtte meter.

Deretter gjekk det berre ein veg. Njardar hadde riktignok nokre store sjansar, mellom anna ved Emre Hagen som fekk krangla ballen forbi keeper, men ikkje forbi siste forsvarsspelar. Det vart dermed berre bortelaget som fekk oppleva nettsus på Reiso.

Eit drygt kvarter inn i andre omgang rakna alt for Njardar. Fyrst kom ein Halsnøy-spelar aleine med keeper Kjartan Hagen og sette ballen sikkert i mål, og før heimelaget fekk summa seg gjekk bortelaget i angrep på nytt og auka leiinga til 0–3. Vondt vart nesten verre då Halsnøy putta sitt tredje mål på tre minutt, men målet vart annullert for offside.


Halsnøy avgjorde

Njardar fortsette å kjempa, men Halsnøy var fleire hakk betre i dei avgjerande situasjonane. I løpet av dei ti siste minutta fekk bortelaget to nye mål, i tillegg til nok eit annulert mål. Ei lita trøyst for gultrøyene var at keeper Hagen redda eit straffespark på overtid.

Bortelaget kunne dermed reisa tilbake til Halsnøy med ein sterk 0–5-siger, og tre poeng i bagasjen. Dei klatrar til fjerdeplass på tabellen, medan Njardar ligg på delt sisteplass med Bergkrystall, men med to kampar mindre spelt enn resten av laga på nedre halvdel av tabellen. I neste runde reiser Njardar til Os for å møta Nore Neset/Lysekloster 2, eit lag gultrøyene spelte uavgjort mot på Reiso i vår.

(Til opplysning: Journalisten speler sjølv på Njardar/Tysnes sitt a-lag)


Kampfakta:

Njardar/Tysnes – Halsnøy, 31.08.19 - 15:30, Reiso kunstgras

Resultat: 0 – 5 (0 – 1)

Startoppstilling Njardar: Kjartan Hagen – Sjurd Sandvik Pedersen, Birger Gilje, Didrik Milde Thorbjørnsen, Fahri Akyüz – Børge Pedersen, Lasse Aarland Skulstad, Aksel Lande, Vidar Storesætre – Emre Hagen, Alexander Gjerstad Kleppe

Innbyttarar: Heine Sandvik Henanger, Oddvar Thuen

Øyvind Bjerkestrand


HANG LENGE MED: Heimelaget hang med til pause, men i andre omgang gjekk Halsnøy frå å leia 0–1 til å vinna 0–5.
HANG LENGE MED: Heimelaget hang med til pause, men i andre omgang gjekk Halsnøy frå å leia 0–1 til å vinna 0–5.
FANN IKKJE NETTMASKENE: Njardar skapte ein del trøbbel for Halsnøy-keeperen, men fekk aldri ballen i mål.
FANN IKKJE NETTMASKENE: Njardar skapte ein del trøbbel for Halsnøy-keeperen, men fekk aldri ballen i mål.
VETERAN: Trass stortapet var Børge Pedersen ein av dei beste for heimelaget laurdag, og skapte mykje trøbbel for Halsnøy sin venstreback.
VETERAN: Trass stortapet var Børge Pedersen ein av dei beste for heimelaget laurdag, og skapte mykje trøbbel for Halsnøy sin venstreback.

Siste saker Gå til framsida

Fjord1 vil møta tysnespolitikarane

Prosjektdirektør Nils Kristian Berge i Fjord1 set si lit til at politikarane i Tysnes godkjenner søknaden om nytt teknisk bygg på ferjekaien i Våge på neste møte i utval for landbruk/teknisk.