TIL ONARHEIM: Laurdag kjem skodespelar Svein Tindberg (innfelt) til kulturkyrkja på Onarheim. (Foto: Ole Skaten/Finn Bakke)
TIL ONARHEIM: Laurdag kjem skodespelar Svein Tindberg (innfelt) til kulturkyrkja på Onarheim. (Foto: Ole Skaten/Finn Bakke)

Skodespelar Svein Tindberg til Onarheim kyrkje

Den kjende skodespelaren Svein Tindberg kjem til Tysnes. Laurdag skal han snakka om bibelen i kulturkyrkja.
Publisert 06.09.2019 kl. 08.00.

– Eg gler meg veldig. Dette blir kjempespennande, seier sokneprest Marit I. Espedalen.

Svein Tindberg er eit kjent ansikt i den norske teaterverda. Det er mange som har sett og høyrt han, både på fjernsynet og på Det Norske Teateret. Mange har og sett og høyrt han på Mostraspelet.

Tindberg jobbar i dag ved Det Norske Teateret, der han dei siste 20 åra har arbeidd med teaterstykke med religiøs tematikk. Eit av desse, «Abrahams barn» som hadde premiere i 2011, har fleire framsyningar denne hausten. Han har også gitt ut boka «Bibelfortellinger for barn».


Samarbeid med publikum

– Temakvelden på Tysnes blir ein kveld for vaksne, men vaksne toler godt å høyra barneforteljingar. Eigentleg er det ingen forskjell på barn og vaksne. Alle likar å bli fortalt for, seier Svein Tindberg om føredraget i kulturkyrkja når «Tysnes» snakkar med han måndag.

Planen for temakvelden har han klar. Det blir litt «som skrevet står», som han uttrykkjer seg. Litt leik med bibeltekstar blir det også, som han vil ta publikum med på.

– Eg kjem til å føla meg litt fram, føla litt på spenninga. Det blir reelt samarbeid mellom meg og publikum, forklarar han.

Han lovar mykje humor og litt laus jakke, som han sjølv seier, i Onarheimskyrkja komande laurdag.

Tindberg fortel at boka hans, «Bibelfortellinger for barn», blir brukt av mange kyrkjelydar.

Det var forlaget som spurde om han kunne tenkja seg å skriva ein barnebibel. Sjølv sa han fyrst nei. Han torde ikkje.

– Eg følte det var vanskeleg korleis eg skulle kommunisera med barn utan å mista innhaldet, fortel han.

Men forlaget gav seg ikkje, og ein barnebokvariant blei det, om møtet mellom Adam og Eva og slangen. Forlaget likte det dei fekk.


Soknepresten sin idé

Det var Marit I. Espedalen som sjølv hadde idéen til å få Svein Tindberg til kulturkyrkja.

– Eg opplever at det er mange som synest det er flott at han skal koma til Onarheim. Sjølv er eg veldig glad for at han sa ja, seier Marit.

Tema for kvelden er Bibelen i populærkulturen.

– Me har ei kyrkje med ei bibelutstilling. Eg tenkjer at det er ei fin ramme for å snakka om Bibelen i bokåret 2019, seier soknepresten.

Idéen kom etter at Marit såg at Kirkerådet hadde midlar å dela ut for å gjera noko ut av at det er boka sitt år i år.

– Eg var frimodig nok og søkte. No har me fått midlar både frå Nasjonalbiblioteket. Det gjev oss anledning til å gjennomføra eit prosjekt som dette, seier ho nøgd.

Det er Onarheim sokneråd i samarbeid med kulturkyrkja som er arrangør for temakvelden.

– Kven er dette arrangementet for? Kven kjem?

– Eg håpar alle kjem. Eg håpar på full kyrkje. Eg trur dette blir ein kjekk kveld, seier ein optimistisk sokneprest.


Siste saker Gå til framsida

Leiar: Lokale entusiastar sikrar framtida for Spelet om Olavsgildet

Spelet om Olavsgildet kan bli ført vidare. Det er gull verdt for Tysnes.Det var i fjor sommar, i samband med markeringa av Johannes Heggland sin hundreårsdag i slutten av juni, at Spelet om Olavsgildet blei framført for fyrste gong. Urframføringa blei ei storslått markering, som på ny sette Tysnes på...