• Ella Sandra Dahl Berland
  ella@tysnesbladet.no

TV-aksjonen til NRK går av stabelen søndag 20. oktober, og inntektene i år går til organisasjonen CARE. Organisasjonen jobbar for kvinner sine rettar på verdsbasis. TV-aksjonen skal vera eit bidrag i arbeidet for å styrka kvinner sine moglegheiter for å tena sine eigne pengar, rett til å delta i samfunnet og rett til å bestemma over sin eigen kropp.

I fleire år har Tysnes kommune støtta TV-aksjonen med 1 krone per innbyggjar. I fjor løyvde formannskapet 1.50 kroner per innbyggjar til TV-aksjonen, som gjekk til Kirkens Bymisjon sitt arbeid med å skapa eit varmare og meir inkluderande samfunn.

I innstillinga frå rådmannen til formannskapet blei det i år løyvt 1.50 kroner per innbyggjar. Varaordførar Kristin T. Gjerstad Kleppe kom med framlegg til vedtak om å auka bidraget frå 1.50 kroner til 2 kroner.

– Det er små summar sjølv om me vel å auka beløpet, med det innbyggjartalet me har, sa ordføraren i sin kommentar til framlegget.

Han opplyste om at beløpet varierer frå kommune til kommune. Tysnes er ikkje blant kommunane som ligg høgst.

Framlegget blei einstemmig vedtatt av formannskapet.