PÅ HAUSTTREFF: Glade motoryachteigarar på båttreff på Onarheim. F.v. Sverke Haavik, Sølvi Løberg, Henning Worren (bak), Aud Kleiven, Tor Ole Husebø, Lars Bernhard Bertelsen og Nina Bertelsen.
PÅ HAUSTTREFF: Glade motoryachteigarar på båttreff på Onarheim. F.v. Sverke Haavik, Sølvi Løberg, Henning Worren (bak), Aud Kleiven, Tor Ole Husebø, Lars Bernhard Bertelsen og Nina Bertelsen.

Dei er eigarar av stilfulle motoryachtar

Classic Motorbåtforening (CMB) avdeling Vestlandet la hausttreffet sitt til Onarheim.
Publisert 12.09.2019 kl. 12.00.

Dei var ikkje så mange i talet, berre fem-seks båtar, men dei merkte seg godt ut i båthamna, dei stilfulle motoryachtane som som vitja OnarHamn i helga.

Lars Bernhard Bertelsen frå Bønes i Bergen er leiar i vestlandsavdelinga.

– Hardanger Trebåtfestival i Norheimsund i juni er det største årlege treffet vårt, men det plar vera mange fine båtar som er med på hausttreffet også. I år er det seks båtar som har meldt seg på, seier Bertelsen.


– Dette er livet

På landsbasis er det over hundre medlemer i CMB, i vestlandsavdelinga som strekkjer seg frå Stavanger i sør til Kristiansund i nord, er dei kring 30. I OnarHamn har dei besøk av eit ektepar frå Tysnes som nyleg har meldt seg inn.

– Me håpar å rekruttera fleire, og fleire yngre, no som det er masse fine og billege trebåtar for sal, seier Lars Bernhard Bertselsen.

Saman med kona Nina og dei andre deltakarane på hausttreffet kosar dei seg i fint haustver i OnarHamn.

– Me kom fredag, og blir her til søndag, seier Nina og Lars.

Dei viser stolt fram MY Ina frå 1938. Båten er bygd av bestefar til Lars Bernhard, Lars Hausberg, som var konstruktør og båtbyggjar i Forlandsvågen på Sotra.

Den fyrste eigaren var Biger von der Fehr. Nina og Lars har eigd båten sidan 2003.

På 1950-talet var båten eigd av kraftlaget i Masfjorden i samband med kraftutbygginga. Ein kan framleis sjå at det i si tid var ishud på båten.

– Me brukar båten for det meste på turar kringom i Hordaland, frå inst i fjordane til ytst på kysten. Det er alltid noko nytt å sjå, seier den stolte eigaren.

Trebåtfestivalen i Norheimsund er eit fast innslag for ekteparet Bertelsen, det same er hausttreffet, som har vore på mange ulike stadar. Dei ramsar opp hamner der dei har vore; Våge, Sagvåg, Stolmen, Skånevik, Leirvik og Glesvær.

Ekteparet brukar også båten til ferieturar om sommaren. I år gjekk turen inn Sognefjorden.

– Me tok for oss dei fleste fjordarmar. Me var innom både Årdal og Skjolden, einaste staden me hoppa over var Flåm. I to og ei halv veke var me på tur på Sognefjorden i fantastisk fint ver. Dette er livet, strålar ekteparet.

På det lengste har dei vore forbi Stadt og til Ulsteinvik med MY Ina.


Frå Fusa

Blenkjer i lakken gjer det og frå MY Eliana. Eigarane Sølvi Løberg og Sverke Haavik frå Strandvik røper at det har gått med fleire tusen arbeidstimar til pussing og vedlikehald for å få båten i den stand den har i dag, sidan dei kjøpte den i 2008. Den fyrste trebåten kjøpte dei i 2003.

– Ei tid hadde me begge to, men det blei for mykje. Det var vanskeleg å kvitta seg med den fyrste, seier dei og smiler.

Dei brukar båten veldig mykje.

– Me har korkje bubil eller campingvogn. Sydentur blir det heller ikkje om sommaren. Somrane brukar me i båten, på kryss og tvers i det store distriktet mellom Stavanger og Selje, fortel paret frå Strandvik, som har kortast veg til treffet på Onarheim.

– Me likar oss veldig godt i dette miljøet, det er sosialt og me er alltid tilsnakkande, seier Sølvi.

MY Eliana blei bygd i 1964 av Brødrene Aa i Hyen, for Braathen Safe-grunnleggjaren Braathen.

På treffet på Onarheim er også Ivar Litland, han også frå Strandvik. Båten hans, MY Pia II, er større, heile 45 fot. Båten blei bygd i Tønsberg i 1960 for ein direktør i eit forsikringsselskap.


Frå Stavanger til OnarHamn

For Tor Ole Husebø er hausttreffet så viktig at han har teke fri frå arbeid både fredag og måndag.

Den stolte båteigaren viser fram MY Mil på 46 fot, bygd av Brødrene Aa i 1965.

– Eg vaks opp med flotte båtar i nabolaget. Det var heilt fantastisk å kunna kjøpa denne båten då den kom for sal. Ein draum gjekk i oppfylling, seier Tor Ole på ekte stavangerdialekt.

Han har eigd MY Mil i 25 år.

– Det blir denne båten resten av livet. Dette er ein livsstil, seier han og smiler nøgd.


– Du må lika luft under kjølen

R-5 er registreringsnummeret til MY Bellina. Det tyder at det er ein av dei fyrste båtane som er registrert i Hordaland.

Henning Worren og Aud Kleiven frå Os kjøpte MY Bellina i 2007. Det er den tredje trebåten deira.

Bellina blei konstruert i 1939 og bygd i 1946 til direktøren for Oslo Flaggfabrikk. I 1953 kom den til Vestlandet, då kjøpt av skipsreiar Hans Westfal Larsen.

– Når me er rundt på turar, treffer me stadig på folk som har vore om bord i denne, seier Aud og Henning.

Henning er oppteken av å ta vare på og vedlikehalda båten mest mogeleg originalt.

– Byssa er heilt original, det same er toalettet om bord. Alle beslag på båten er også dei opphavelege, forklarar han.

Dei brukar båten til helgeturar, og gjerne ei ferieveke om sommaren.

– Alle dei som er her er entusiastar som brukar mykje tid og pengar på hobbyen, seier han.

– Det er ein hobby å eiga ein slik båt?

– Ja, du må lika den tida me går inn i no, med luft under kjølen, seier han, og smiler lurt.


FRÅ BERGEN: Nina og Lars Bertelsen kosar seg om bord i MY Ina. Dei tok turen frå Bønes fredag. Då var det ikkje så fint vêr over Bjørnafjorden, som det var i OnarHamn på laurdag.
FRÅ BERGEN: Nina og Lars Bertelsen kosar seg om bord i MY Ina. Dei tok turen frå Bønes fredag. Då var det ikkje så fint vêr over Bjørnafjorden, som det var i OnarHamn på laurdag.
FRÅ FUSA: Sverke Haavik og Sølvi Løberg om bord på Elyana.
FRÅ FUSA: Sverke Haavik og Sølvi Løberg om bord på Elyana.
FRÅ FUSA (II): Ivar Litland med MY Pia II har også teke turen frå Strandvik i Fusa.
FRÅ FUSA (II): Ivar Litland med MY Pia II har også teke turen frå Strandvik i Fusa.
FRÅ STAVANGER: – Det var ein draum å få kjøpa denne, seier Tor Ole Husebø frå Stavanger, med båten MY Mil.
FRÅ STAVANGER: – Det var ein draum å få kjøpa denne, seier Tor Ole Husebø frå Stavanger, med båten MY Mil.
FRÅ OS: MY Bellina er den eldste båten på treffet. Aud Kleiven og Henning Worren har ofte turklede og fjellsko med seg når dei er på båttur.
FRÅ OS: MY Bellina er den eldste båten på treffet. Aud Kleiven og Henning Worren har ofte turklede og fjellsko med seg når dei er på båttur.

Siste saker Gå til framsida

– Humor er snarvegen inn i følelsane våre

Dei alvorlege poenga til føredragshaldar, motivator og psykolog Trond Haukedal var mange i Tysneshallen fredag kveld. Måten han blanda alvor med humoristiske innslag gjorde arrangementet «Gje deg sjølv tid» til ein vellukka kveld.