FÅR HJELP: Kriseteamet i kommunen tek hand om familien på fem, som måtte rømma frå bustadhuset sitt i Uggdalsvegen då det stod i brann i natt. Her ser me brannmannskap og rådmann Steinar Dalland ved huset i morgontimane laurdag. (Foto: Camilla Korsnes)
FÅR HJELP: Kriseteamet i kommunen tek hand om familien på fem, som måtte rømma frå bustadhuset sitt i Uggdalsvegen då det stod i brann i natt. Her ser me brannmannskap og rådmann Steinar Dalland ved huset i morgontimane laurdag. (Foto: Camilla Korsnes)

– Dei har det nok veldig tøft

Ein småbarnsfamilie i Uggdalsvegen måtte rømma då bustadhuset deira tok full fyr i natt. Familien er teken hand om av det lokale kriseteamet.
Publisert 14.09.2019 kl. 13.44. Oppdatert kl. 13.57.

Familien vakna til svilukt litt før halv fire i natt, og kom seg ut av huset med éin gong. Mor i huset varsla brannvesenet klokka 03.23, og brannvesenet var på staden eitt kvarter etter.

– Det er vanskeleg å forestilla seg kva dei går gjennom, og dei har det nok veldig tøft. Men etter forholda verkar det som at det går bra med dei, seier Steinar Dalland i kriseteamet i kommunen.

Det er ingen personskadar etter brannen.

– Det har ikkje vore behov for legehjelp, og familien er i god fysisk form. Dei har gjort utruleg gode vurderingar, og gjorde det rette i å komma seg ut med éin gong, seier Dalland.

Han rosar brann- og ambulansetenesta for å ha gjort ein formidabel innsats under vanskelege forhold.


Suveren innsats

Familien på fem blei innkvartert på Haaheim gard i natt. Det minste barnet i familien er berre halvannan månad gamal.

– På Haaheim fekk me veldig god hjelp av Torstein Hatlevik. Og Morten Christensen i Coop Extra opna butikken midt på natta så me fekk handla naudsynte ting, fortel Dalland.

– Me har òg funne ei løysing på husvære til familien gjennom Lars og Åse Enes.

Dalland vil retta ein stor takk til alle som har stilt opp i lokalsamfunnet.

– Folk gjer det dei kan når det oppstår slike situasjonar. Dei har vore heilt suverene, avsluttar Dalland.


Kalla inn forsterkingar

Det var full overtenning i første etasje då brannvernet kom til staden like før kvart på fire i natt.

– Me starta umiddelbart med utvendig slokking. Etter kvart gjekk me over til ein innvendig innsats, for å sjekka at det ikkje var spredning opp i andre etasje, opplyser utrykkingsleiar Vidar Lid i Tysnes brannvesen.

Grunna låg bemanning på Tysnes, valte Lid å kalla inn brannmannskap frå Kvinnherad kommune umiddelbart. Involvert i slokkingsarbeidet var det i alt seks mannskap frå Tysnes brannvesen, og fem mannskap frå Ølve.


Små marginar

– Brannmannskapet har gjort ein fantastisk jobb, og me har fått god hjelp frå mannskapet i Ølve, seier brannsjef Torfinn Kongsvik i Tysnes brannvesen.

Han rosar òg familien for å ha vore snar med å komma seg ut av huset.

– Det er veldig bra at alle kom uskadd frå det. Marginane var veldig små, fortel han.

Bustadhuset har betydelege røyk- og brannskadar.

– Det er ingen brannskader i andre etasje. Kjellaren har òg sluppe unna flammane, men har ein del vasskadar, opplyser Kongsvik.

Brannvernet meldte at dei hadde kontroll på brannen klokka 04:06. I skrivande stund har brannvernet framleis vakt på staden for å sikra at brannen ikkje startar opp att. Årsaka til brannen er førebels ukjent.


Siste saker Gå til framsida

Leiar: Kor lang tid skal det gå før undervass-skjera ved Horso blir merka?

I sist veke skjedde det igjen, for n’te gong. Ein fritidsbåt grunnstøytte på skjeret Horso, ved Gjerslingane, nord for ferjekaien i Våge. Fritidsbåten Risøy frå Varaldsøy med tre familiemedlemer Årvik om bord var dei uheldige denne gongen. Dei skulle frå Varaldsøy til Fitjar, og var innom Våge éi natt. Smellen førte...

Har fått 100 år gamle draktdelar

Synnøve Hodneland i Tysnes Husflidslag kan fortelja at laget har fått mange gamle draktdelar i gåve frå ein privatperson. Plagga skal vera om lag 100 år gamle, og kjem mellom anna frå Bergsvåg og Solheimsdalen. – Det er blant anna bunadsbelte, brystdukar, bunadsliv, silkeforkle, barnehuer og bunadshuer, fortel Hodneland. På lagskvelden i Husflidstova komande måndag vil Britt Kjellesvik...