SOLID: Med sju scoringar blei Kristin van der Meeren toppscorar i kampen på søndag.
SOLID: Med sju scoringar blei Kristin van der Meeren toppscorar i kampen på søndag.

– Det var ein slitesiger

Søndag tok Tysnes IL sitt damelag to poeng mot Sandviken, men målskilnaden kunne godt ha vore større. Stillinga blei 24-22.
Publisert 16.09.2019 kl. 16.00. Oppdatert 17.09.2019 kl. 08.48.

Kampen byrja med ei tidleg 3–0-leiing til Tysnes. Så fann gjestene nettmaskene dei også, og etter ti minutt var stillinga blitt 5-4.

Sandviken jakta utlikning, men i Tysnes-målet var Ragnhild Dalland heilt suveren i 1. omgang, og stoppa det aller meste som kom imot henne.


Gira opp publikum

Og det var ikkje berre keeperen som spelte godt. Framme i angrep varta Tysnes-spelarane opp med flott kryssingsspel og mange lure pasningar. Dei hadde rett og slett god ballkontroll, og gjorde heiagjengen på tribunen meir og meir gira.

Rimeleg god kontroll var det også i forsvar, der tysnesdamene viste mykje styrke og uthald. Til pause hadde dei opparbeidd seg ei fin 12–7-leiing.

Men så skulle det bli litt andre takter i kampen. Andre omgang opna nemleg med to reduseringar frå gjestene, og eit meir ustrukturert Tysnes-lag.

– No må me skjerpa oss jenter, ropa Renathe Hagen-Lunde.

Heimelaget var heile tida i tet målmessig, men hadde ikkje like god flyt i spelet som tidlegare.


Litt for spennande

Etter kvart som det minka på tida, steig spenninga i Tysneshallen. Med fem minutt igjen, og 23-20 på tavla, augna Sandviken eit lite håp om poeng. Så blei det 23-21, 24-21, og til slutt 24-22. Tysnes sine to fyrste poeng for hausten var i boks, etter nokre litt nervepirrande sluttminutt.

– Det var unødvendig spennande, kommenterte trenar Sveinung Halvorsen etter kampslutt.

– Me vinn, men det er eitt eller anna som skurrar. Det er litt for lite fokus, og me lyfter hovuda for lite, la han til.

Med det sagt, var trenaren sjølvsagt glad for at det var hans lag som gjekk sigrande ut av kampen.

– Me treng dei poenga me kan få. Men det var ein slitesiger, slutta Halvorsen.


Desse var med:

Kristin van der Meeren (7), Signe Pettersen Opdal (5), Maria Lillesletten Hagen (2), Ragnhild Dalland, Sara Reimdal Vee (4), Norunn Ebbesvik (1), Julie Bakke (1), Renathe Hagen-Lunde (4), Linda Flornes og Emma Marie Elgsås Bruntveit.


Siste saker Gå til framsida

Leiar: Lokale entusiastar sikrar framtida for Spelet om Olavsgildet

Spelet om Olavsgildet kan bli ført vidare. Det er gull verdt for Tysnes.Det var i fjor sommar, i samband med markeringa av Johannes Heggland sin hundreårsdag i slutten av juni, at Spelet om Olavsgildet blei framført for fyrste gong. Urframføringa blei ei storslått markering, som på ny sette Tysnes på...