SCORA FIRE MÅL: Ingvil Vermedal og dei andre tysnesjentene kjempa hardt mot Kjøkkelvik, men greidde aldri å utlikna.
SCORA FIRE MÅL: Ingvil Vermedal og dei andre tysnesjentene kjempa hardt mot Kjøkkelvik, men greidde aldri å utlikna.

Måler krefter mot gode lag

Tysnes Jenter 13 var nærme å slå Kjøkkelvik i helga.
Publisert 17.09.2019 kl. 14.06.

I vår var tysnesjentene det mestvinnande laget i si b-pulje. No speler dei kvalifiseringskampar mot a-serie-lag, og må kjempa hardare for poenga enn dei er vane med. Så langt i haust har det blitt tre tap og ein siger, men nesten alle på laget er travle fotballspelarar som treng litt tid på å finna tilbake til handballforma. Søndag viste dei mange gode tendensar på heimebane mot Kjøkkelvik, sjølv om det ikkje heldt til siger.


Treig start

Det var gjestene som sette inn dei fyrste måla i kampen. Om lag sju minutt gjekk før heimelaget kom med si fyrste redusering, og stillinga var 1-4 då Tysnes-trenar Geir Austvik bad om timeout, ti minutt ut i kampen. Etter dette kom det ganske jamt med scoringar frå begge laga.

Tysnesjentene stod på som berre det i forsvar, noko som førte til at dei fekk ein del straffer imot seg. Kjøkkelvik hadde treffsikre spelarar, og Louise Vermedal Lunde fekk ingen enkel dag i mål.

Til pause var stillinga 7-10.


Intense sluttminutt

Sjølv om Kjøkkelvik var i tet gjennom heile kampen, var det aldri mange mål som skilde laga. Tysnes var berre to mål unna utlikning (11-13) då det stod att fem minutt, og endå meir spennande vart det då Maria Andronikidu reduserte til 12-13. Kort tid etter stod det 13-14 på tavla, og i ein ny timeout fekk tysnesjentene beskjed om å ikkje la det koka i hovudet.

– De må venta på sjansen, og vera rolege og lure, sa Austvik.

Men det blei dessverre ikkje fleire mål til Tysnes, og kampen enda 13-15.


Lærerik haust

– Det var ikkje langt unna, slo Geir Austvik fast då «Tysnes» prata med han etter kampen.

Han meiner det er sunt både for laget og han sjølv å få brynt seg i a-serien. I førre sesong kom sigrane litt for lett.

– Du må ha motstand for at du skal kunna utvikla deg. Det er utruleg gøy å vera med på dette, eg som trenar lærer mykje meir når me speler mot så gode lag, sa Austvik.

– Me har ikkje fått øvt så mykje enno, men dei er veldig «på», la han til.

Ifølgje terminlista har Tysnes Jenter 13 sine siste to kvalifiseringskampar komande laurdag. Den ordinære serien tek til etter haustferien.


Desse var med:

Maria Andronikidu (5), Ronja Sløgedal, Camilla Matre Rosseland, Malene Lygre Kongsvik, Tora Nødland Austvik (2), Elise Sørhus Dalen, Louise Vermedal Lunde, Ingvil Vermedal (4), Alma Vermedal (2) og Yosan Ghirmay Ngusse.


Siste saker Gå til framsida

Leiar: God dialog med grunneigarane er nødvendig

Over 90 personar på folkemøte om E39-planane viser at det er heilt nødvendig at vegvesenet stiller på Tysnes for å informera om status for den nye stamvegen.Store delar av Tysnes har vore samde om at ein ny E39 bør gå gjennom kommunen vår. Kommunestyret i Tysnes har vore samrøystes på dette. Politikarane var og...