TRENG POENG: Njardar har hatt ei tøff veke med berre eitt poeng på tre kampar. Her er Fahri Akyüz i duell med to Trane-spelarar under kampen laurdag. (Foto: Camilla Korsnes)
TRENG POENG: Njardar har hatt ei tøff veke med berre eitt poeng på tre kampar. Her er Fahri Akyüz i duell med to Trane-spelarar under kampen laurdag. (Foto: Camilla Korsnes)

Kjempar for å unngå nedrykk

Med tre kampar på éi veke kunne a-laget til Njardar/Tysnes ta viktige poeng i kampen mot nedrykk. Det enda derimot berre med ein uavgjort og to tap.
Publisert 17.09.2019 kl. 07.02. Oppdatert kl. 13.43.

Med éin månad igjen av sesongen har Njardar/Tysnes sitt a-lag ein jobb å gjera for å behalda plassen i 6. divisjon. Måndag i førre veke starta ei intens veke med tre kampar som kunne ført laget opp på trygg grunn på tabellen.


To bortekampar

Fyrst reiste tysnesingane til Os for å møta Nore Neset/Lysekloster 2, som er eit av laga Njardar kjempar mot i nedrykkstriden. To tidlege mål av Didrik Milde Thorbjørnsen gav gultrøyene ein knallstart, men osingane kom tilbake, og innan timen spelt var det dei som leia 3–2. Eit utlikningsmål av kaptein Aksel Lande sikra eitt poeng for Njardar.

To dagar seinare gjekk turen til Nymark i Bergen, der Viggo stod på motsett banehalvdel. Viggo er med i kampen om å rykka opp til 5. divisjon, og viste seg tydeleg eit hakk betre enn Njardar. Bergensarane klarte likevel ikkje å skapa mange store sjansar, men viste seg effektive framfor mål, og vann 2–0.


Topp mot botn

Laurdag var det duka for ny heimekamp på Reiso, og det var serieleiaren Trane som kom på besøk. I eit heftig haustvêr vart det ein jamnspelt kamp, men det var bortelaget som trekte det lengste strået.

Etter ti minutt kom ein Trane-spelar seg fri på høgrekanten, og i staden for å avslutta sjølv frå skrått hald, fann han ein lagkamerat som dytta ballen enkelt i mål frå fem meter.

Begge laga fortsette å kjempa, utan at nokon klarte å skapa dei heilt store sjansane. I det 70. minutt dobla Trane leiinga på liknande vis som det fyrste målet. Denne gongen kom ein spelar seg fri på venstrekanten, og i staden for å skyta sjølv, sentra han på tvers til ein lagkamerat som enkelt sette ballen i det opne målet.


Njardar svarte

Heimelaget gav likevel ikkje opp, og fem minutt seinare var det ny spenning i kampen då Lasse Aarland Skulstad reduserte.

Det var likevel Trane som fekk utteljing mot slutten av kampen. Ti minutt før slutt fekk dei straffe, som sikkert vart sett i mål. Trane fastsette sluttresultatet til 1–4 fem minutt seinare.

Slutten av kampen vart også prega av høg temperatur, spesielt retta mot dommaren. Det enda med at dommar Süleyman Kilic såg seg nøydd til å dela ut raude kort til to Trane-spelarar etter kampslutt, noko som er sjeldan kost på ein fotballbane.


Kan sikra plassen

Medan Njardar tapte mot Trane, slo tabelljumbo Bergkrystall til med siger mot Laksevåg, og sende dermed Njardar ned igjen til botnen av tabellen. Njardar har éin kamp mindre spelt enn dei andre laga på nedre halvdel av tabellen, men den utsette vårkampen mot Trane har endå ikkje fått ny dato.

Njardar har utanom denne fire kampar igjen av sesongen, og skal i helga møta Rosendal på bortebane. Deretter ventar Søre Neset på Reiso, før sesongen vert avslutta med bortekamp mot botnrival Bergkrystall og heimekamp mot Viggo.


Slik ser tabellen ut i 6. divisjon avdeling 3: (Spelte kampar i parentes)

1. Trane, 31 poeng (13)

2. Viggo, 27 poeng (14)

3. Søre Neset, 27 poeng (13)

4. Halsnøy, 23 poeng (13)

5. Laksevåg, 17 poeng (14)

6. Rosendal, 15 poeng (14)

7. Nore Neset/Lysekloster 2, 15 poeng (14)

8. Eikelandsfjorden, 13 poeng (14)

9. Bergkrystall, 13 poeng (14)

10. Njardar/Tysnes, 11 poeng (13)

(Til opplysning: Journalisten speler sjølv på Njardar/Tysnes sitt a-lag)


Siste saker Gå til framsida

Dei nye ferjerutene er klare

I formiddag lanserte Skyss dei nye ferjerutene på sambanda Våge-Halhjem og Jektavik-Nordhuglo-Hodnanes, som trer i kraft 1. januar.

Byggjer utvendig toalett

Det er vanskeleg å nå fram i tide for dei unge som treng rask veg til nødvendige ærend. Slik det er no, er ikkje tilhøva tilfredsstillande, skriv styrar i Stjernereiso barnehage.– Me har mykje toalettuhell. Det er dårleg for barna sin meistringsfølelse, og det går mykje ekstra tid der me er for få vaksne ute, argumenterer styraren.Rådmannen har lytta til ønsket frå barnehagen,...