NY BUTIKKSJEF: – Butikken har mykje å seia for lokalsamfunnet, seier Marit Høviskeland, som har bretta opp erma og er klar for rolla som butikksjef ved Joker Uggdal. (Foto: Ella Sandra Dahl Berland)
NY BUTIKKSJEF: – Butikken har mykje å seia for lokalsamfunnet, seier Marit Høviskeland, som har bretta opp erma og er klar for rolla som butikksjef ved Joker Uggdal. (Foto: Ella Sandra Dahl Berland)

Marit er Joker sitt nye ansikt

Marit Høviskeland er tilsett som ny butikksjef ved Joker Uggdal.
Publisert 21.09.2019 kl. 06.00.

Ho nølte ikkje med å søkja då ho såg stillingsutlysninga om assisterande butikksjef.

– Det har vore veldig kjekt så langt. Det har vore travelt, og mykje å setja seg inn i, men det er veldig hyggeleg, smiler ho.


Interessant utfordring

Marit byrja i stillinga den 9. september. No går ho gjennom ei periode i opplæring, før ho tek heilt over stillinga som butikksjef utpå hausten, og Henrik Holm Sylta tek over butikkdrifta etter Lars Sorknes.

– Kvifor søkte du?

– Eg syntest dette verka spanande. Eg har vore jobbsøkjande, og då eg kom over denne stillinga tenkte eg at det å jobba som butikksjef høyrdest ut som ei interessant utfordring, fortel ho.


Likar det travelt

Marit har utdanning som barne- og ungdomsarbeidar, og har tatt allmenn påbygg. Ho har jobba i barnehage, og har sju års fartstid frå produksjonsarbeid på Windsor.

Mellom utdanning og jobb har ho fått tre ungar, og har dermed god erfaring med å ha mange ballar i lufta på same tid.

– Eg likar at det er noko som skjer heile tida, seier ho.

Og akkurat det trengst, når ein skal vera butikksjef.

– Med butikk er det alltid noko å gjera, og det likar eg. Alt frå å ekspedera kundar til å få kontroll på varer, fortel ho.


Glad i Jokeren

Marit hadde arbeidsveke ved Joker Uggdal då ho gjekk på ungdomsskulen. Etter det jobba ho ein del i butikken i helgar og i feriar, heilt fram til 2002.

– Det byrjar å bli nokre år sidan. Eg fann ut at det er 17 år sidan eg jobba i butikken. Men eg kjenner butikken godt, smiler ho.

– Eg likte godt å jobba her, og det var alltid her me var og handla. Lokalbutikken har mykje å seia for samfunnet. Eg trur folk har vore redd for at butikken skulle bli nedlagt. Eg ser no at dei er glad for at den skal få bli, held ho fram.

Ho har gode forventningar til drifta vidare.

– No har eg ikkje kome heilt i gang med sjefsdelen endå. Først skal eg læra meg kassen, læra å bestilla varer og slikt, og så byggjer me på med meir og meir etter kvart. Eg ser fram til å driva butikken framover, avsluttar ho.


Siste saker Gå til framsida

Har fått 100 år gamle draktdelar

Synnøve Hodneland i Tysnes Husflidslag kan fortelja at laget har fått mange gamle draktdelar i gåve frå ein privatperson. Plagga skal vera om lag 100 år gamle, og kjem mellom anna frå Bergsvåg og Solheimsdalen. – Det er blant anna bunadsbelte, brystdukar, bunadsliv, silkeforkle, barnehuer og bunadshuer, fortel Hodneland. På lagskvelden i Husflidstova komande måndag vil Britt Kjellesvik...

Lesarbrev: God søndagstur

På søndag skal Norge nok ein gong gjennomføra verdas største dugnad. 100.000 bøsseberarar går på tur i heile Norge, og samlar inn pengar til velgjerande organisasjonar. Kvart år blir det lagt ned ein stor innsats på Tysnes, og det er kjekt å sjå at gjevargleda til oss tysnesingar er stor kvart einaste år. Skular, lag og organisasjonar, kyrkja, privatpersonar og bedrifter har bidrege for å få...