TATT GODT IMOT: Både Alexandra Kongsvik (fremst) og Helena Dale (t.h) ga avkall på Bergen og å jobba i større frisørsalongar, for å jobba på Carisma Frisør i Våge. Marit Gunn Dalland (i midten) og dottera Yvonne Flatråker (t.v) har teke godt imot dei. (Begge foto: Ella Sandra Dahl Berland)
TATT GODT IMOT: Både Alexandra Kongsvik (fremst) og Helena Dale (t.h) ga avkall på Bergen og å jobba i større frisørsalongar, for å jobba på Carisma Frisør i Våge. Marit Gunn Dalland (i midten) og dottera Yvonne Flatråker (t.v) har teke godt imot dei. (Begge foto: Ella Sandra Dahl Berland)

Dyktige frisørar tilbake til Tysnes

– At det kjem to tysnesingar tilbake til Tysnes for å jobba her, er ein sensasjon.
Publisert 05.10.2019 kl. 14.00.

Det seier Marit Gunn Dalland, som er innehavar av Carisma Frisør. Ho driv salongen i lag med dottera Yvonne Flatråker, og har nyleg tilsett to nye frisørar i full stilling.

Begge har erfaring og inntrykk frå større frisørsalongar i Bergen, men fann ut at storbyen ikkje var noko for dei i lengda. Ein vinn-vinn-situasjon, både for håret til tysnesingane, for Marit Gunn og for jentene.


Lengta tilbake

Helena Dale (21) har jobba tre år i Dada hårstudio i Bergen. Ho budde i ei sliten gamal leilegheit på Danmarksplass, med støy frå folk og bilar. Den 30. juni flytta ho til Ølve i lag med kjærasten. Der stod det eit ledig hus på garden til mora. Helena har mykje familie på Tysnes, og fortel at det er godt å ha flytta nærare familien igjen.

– Eg treivst aldri noko særleg i Bergen, og eg lengta tilbake. Det har ikkje vore nok tid med familien då eg budde i Bergen, seier ho.

Ho er oppvaksen på Flatråker, og blei utplassert hjå Carisma som 16-åring, noko som balla på seg til fleire år med sommarjobb og ekstravakter. Den 1. juli var ho tilbake på Carisma Frisør.


Spent på å starta

Alexandra Kongsvik (28) kom til Våge den 17. august. Ho skal starta i jobben den første veka i november.

– Eg gler meg veldig til å byrja å jobba med nye kollegaer, smiler ho.

Det siste året har ho jobba i ein privat frisørsalong på Haakonsvern. Før det har ho jobba tre år som frisør på Sundt. Storbylivet var ikkje heilt det Alexandra såg for seg i lengda.

– Eg er van til å bu landleg til ved sjøen, og vil heller at barnet mitt skal veksa opp her i landlege omgjevnader, fortel ho.


Treng fleire fulle stillingar

Sjefen sjølv seier seg veldig fornøgd med å ha tilsett to unge kvinner med erfaring frå større miljø.

– At me har frisørar i alle aldrar, og kundar i alle aldrar, gir ein fin variasjon på arbeidsplassen. Det er veldig kjekt å få to faglærte frisørar tilbake til ein så liten stad som dette, smiler ho.

Ho ønskjer å vektleggja kor viktig det er å tilsetja folk i fulle stillingar for å skapa vekst i kommunen.

– Det er faste tilflyttarar kommunen treng. Dei hadde ikkje kunna flytta heim att til Tysnes utan ein 100 prosent stilling, seier ho.


Meir enn berre ein jobb

No som ho har fått på plass to nye frisørar, har Marit Gunn planar om å trappa litt ned. Men ho vil framleis jobba i salongen.

– Det er viktig å la dei yngre få sleppa til. Dei har eit fagbrev, og det er viktig å gje dei ein god arbeidsplass, seier ho.

– Men eg elskar jobben min. Den har gitt meg mykje energi i 36 år. Det er mykje meir enn ein jobb, det er ein livsstil.


Vende heim

Marit Gunn har drifta frisørsalongen i ei årrekkje, og dei siste åra har ho hatt dottera Yvonne med på laget.

– Me har ein veldig god salong, med kundar som har støtta oss i 36 år, smiler mora.

Dottera tok fagbrev som frisør i 2001, og gjekk to år i lære før det. Ho har jobba både i Bergen, på Stord og tre år på Lagunen, før ho vende nasen tilbake mot Tysnes for 14 år sidan.

– Eg trivst godt på Tysnes, og gler meg til å få fleire nye kollegaer. Det skal bli veldig kjekt, og eg trur at Tysnes treng dette, smiler ho.


FRAM MED SAKSA: Helena Dale starta hjå Carisma Frisør i starten av juli, etter å ha jobba tre år i Dada hårstudio i Bergen sentrum. Her får Odd Bjarne Haugsgjerd ein klipp.
FRAM MED SAKSA: Helena Dale starta hjå Carisma Frisør i starten av juli, etter å ha jobba tre år i Dada hårstudio i Bergen sentrum. Her får Odd Bjarne Haugsgjerd ein klipp.

Siste saker Gå til framsida

Vil låna ut gratis sportsutstyr

Frivilligsentralen har sendt inn søknad om midlar til innkjøp av sportsutstyr, og har planar om å starta opp gratistilbodet «Bua Tysnes», forhåpentlegvis til sommaren.

Alex Lunde blir ny regiondirektør i Norconsult

Etter ein prosess med mange gode søknadar, frå både interne og eksterne kandidatar, er det no klart at Alex Lunde får jobben som direktør for region vest i Norconsult. Han er eit kjent fjes for mange tysnesingar ettersom han har slektsrøter her, og ofte legg turen til Tysnes når han har fri. Alex Lunde tek over direktørjobben etter Jens Kvarekvål, som skal fortsetja med andre spennande...