GODT MOTTEKEN: Torstein Hatlevik, eigar og vert på Haaheim Gaard, var konferansier på «Det endå litt større Bjørnefjordenmåltidet» laurdag kveld. Her helste han på ein fan. (Alle foto: Anne Marie Aarøen Vangsnes/Os & Fusaposten)
GODT MOTTEKEN: Torstein Hatlevik, eigar og vert på Haaheim Gaard, var konferansier på «Det endå litt større Bjørnefjordenmåltidet» laurdag kveld. Her helste han på ein fan. (Alle foto: Anne Marie Aarøen Vangsnes/Os & Fusaposten)

Fekk servert det beste frå Bjørnefjorden

Irene Dalland var med å servera gjestane på «Det endå litt større Bjørnefjordenmåltidet» i Oseana laurdag kveld.
Publisert 07.10.2019 kl. 14.55.

Lokale matvareprodusentar frå kommunane rundt Bjørnefjorden var samla for å gje dei 270 gjestane ei kortreist gastronomisk oppleving dei seint vil gløyma. Både Myrdal gard, Haaheim Gaard og Garden på Dalland var representert på menyen.

– Me ønskjer å framheva råvarene me har tilgjengeleg etter kva sesong det er, og me ønskjer å løfta lokalmaten endå høgare. Det er blitt veldig i vinden dei siste åra, seier Irene Dalland.

Ho driv Garden på Dalland i lag med Anders Dalland, og er styremedlem i foreininga «Bjørnefjorden Matkultur», som arrangerte måltidet for tredje år på rad.


Bevisstheit rundt lokale råvarer

Nytt av året var matmarknaden på dagtid i vognhallen, tillegg til måltidet i Oseana.

– Det blei ein kjempesuksess. Me var spente på korleis det ville gå, og me var heilt overvelda over kor mange som kom på marknaden. Responsen var god, og mange syntest det var kjekt å få tilgang til kvalitetsmat på denne måten, fortel Irene.

Ho trur folk har blitt mykje meir bevisst på å velja lokalprodusert mat i dag. – Folk er meir nysgjerrige på korleis mat blir produsert, og dei vil ha sunn mat. I tillegg er folk blitt meir interesserte i kva belastning maten har på klimaet og miljøet, seier ho.

Her kjem foreininga «Bjørnefjorden Matkultur» inn.

– Hensikten med «Bjørnefjorden Matkultur» er at folk kan bli meir bevisst på dei gode råvarene me har i området rundt Bjørnefjorden, fortel ho.


Unikt i Norge

Dei 270 plassane til måltidet blei tidleg utselde, slik det har vore kvart år sidan starten for tre år sidan. Irene syntest det var synd at dei ikkje såg fleire tysnesingar på arrangementet, og oppmodar difor alle til å hiva seg rundt og prøva å få tak i billettar når dei blir lagt ut til våren.

– Dette er eit heilt spesielt opplegg. Det er ingen andre i Norge som serverer så mange rettar på éin kveld, basert på lokale råvarer. Det er unikt, spesielt og kjempegøy, seier ho.

Ekstra spesielt var det at kvelden blei ein hyllest til Gunnar Nagell-Dahl, som var med å starta opp måltidet. Han gjekk bort i juni.

– Han har vore mentoren vår og ein raud tråd for måltidet, så denne kvelden var ein heider for han, seier Irene.

Etter planen var det Gunnar som skulle presentera den siste hovudretten. Det blei i staden konferansier Torstein Hatlevik som presenterte denne. Det var heilgrilla gris; «Fifty Shades of Pig».


Suksess

Irene syntest det var gøy å vera med og servera maten på kveldstid.

– Det er noko med det å få fram den viktige jobben som vestlandsbøndene gjer, og ikkje minst dei som lagar maten. Her blir både produsenten, råvarene og kokkane framheva, smiler ho.

– Men ein må vera mange menneske til å servera når 270 fat skal ut på kort tid, held ho fram, og fortel at det var både kokkar og bønder i sving i tillegg til proffe servitørar.

Garden på Dalland leverte ytrefilet av grasfòra vestlandsk fjordfe. Kjøtet blei tilberedt av kokk Siw B. Gjerdevik Kolstad, som driv catering på Os.

– Alt i alt var det ein stor suksess, avsluttar Irene.


UNDERHALDNING: Torstein sytte for å underhalda dei 270 gjestane med kulturelle innslag i form av lur og kved.
UNDERHALDNING: Torstein sytte for å underhalda dei 270 gjestane med kulturelle innslag i form av lur og kved.
FRÅ PRODUKSJON TIL SERVERING: Anders og Irene Dalland frå Garden på Dalland fekk vera med å servera dei lokale råvarene på «Det endå litt større Bjørnefjordenmåltidet».
FRÅ PRODUKSJON TIL SERVERING: Anders og Irene Dalland frå Garden på Dalland fekk vera med å servera dei lokale råvarene på «Det endå litt større Bjørnefjordenmåltidet».

Siste saker Gå til framsida

Fekk ordførarbesøk på 100-årsdagen

I helga var det stor feiring på Reiso då Herborg Dalen feira sin hundrede fødselsdag. Med ope hus på søndag var det mange som tok turen innom for å gratulera den spreke jubilanten, inkludert ordførar Kåre Martin Kleppe.– På vegner av Tysnes kommune ynskjer eg å gratulera med dagen, og eg håpar at åra du har hatt på Tysnes har vore fine, sa ordføraren då han møtte 100-åringen.Han...

Inviterer til ei annleis gudsteneste

Tradisjonen tru vert det temagudsteneste i Onarheim kyrkje i samband med TV-aksjonen, som i år handlar om å skapa eit betre liv for kvinner i nokre av dei mest sårbare områda i verda. – Slik som i fjor prøver me oss på ei litt annleis gudsteneste med både perler, strikketøy og songinnslag. Begge deler kan symbolisera verdigheit i møte med livet sine utfordringar. Nokre gonger mister me...

Ny ungdomsroman frå Ingelin Røssland

Ingelin Røssland si nye ungdomsbok OMG kom frå trykken for få dagar sidan, og Det Norske Samlaget skildrar romanen slik: «For Maria er livet ein grenselaus fest. Men festen tek bra°tt slutt då ho blir skyssa heim i politibil. Mora orkar ikkje meir, og Maria blir send til mormor med totalt mobilforbod. Hos mormor blir Maria fascinert av prestesonen Johannes, samtidig som ho har ein...