LANG DAG: Brannsjef i Tysnes kommune, Torfinn Kongsvik (i midten), var til stades onsdag for å bistå krimteknikarar med mannskap så lenge det var naudsynt. (Foto: Ella Sandra Dahl Berland)
LANG DAG: Brannsjef i Tysnes kommune, Torfinn Kongsvik (i midten), var til stades onsdag for å bistå krimteknikarar med mannskap så lenge det var naudsynt. (Foto: Ella Sandra Dahl Berland)

Dramatiske timar for brannmannskapet

– Mannskapet har gjort ein veldig god jobb ut ifrå situasjonen som var då dei kom fram, seier Torfinn Kongsvik.
Publisert 10.10.2019 kl. 13.30.

Brannsjefen i Tysnes kommune rosar mannskapet som har stått på i sløkkingsarbeidet av eit hus som stod i brann på Malkenes natt til onsdag, der ein mann i 70-åra omkom.

Grunna overtenning av huset blei det sendt forsterkingar frå Kvinnherad, og i alt ti personar frå Tysnes brannvesen og ti frå Ølve brannstasjon var i oppdrag.

– På det mest hektiske var det 20 mann i sving, opplyser Kongsvik.


Måtte henta vatn frå sjøen

Fordi det ikkje er tilgang på vassverk-kummar for påkopling til brannbil, måtte mannskapet leggja ut slange kring 800 meter frå bustadhuset og ned til sjøen.

– Etter kvart fekk dei opp vatn frå sjøen, seier Kongsvik, og fortel at målet var å sløkkja brannen så raskt som mogleg for å kunna driva ettersøk.

Det var ikkje nokon fare for spreiing av brannen til husa som ligg i nær omkrins. I etterkant av sløkkingsarbeidet heldt brannmannskapet fram med vakthald ved bustaden fram til krimteknikarar kom til staden i 11-tida onsdag føremiddag. Krimteknikarane gjorde undersøkingar av staden, fotograferte, og henta ut den omkomne.

– Me bistod dei med mannskap så lenge dei trengte det, før me køyrte tilbake til stasjonen, seier han.


To utrykkingar

Klokka 15.01 måtte brannvesenet igjen rykkja ut til bustadhuset.

– Krimteknikarane ringte inn og sa det var glødande takbjelkar på huset, så me sendte tre bilar fordi det var uklart kor omfattande dette var, fortel Kongsvik.

Første bil som var framme på staden klokka 15.17 kunne konstatera at situasjonen viste seg å vera udramatisk, og dei to andre bilane avbraut utrykkinga.

– Det var snakk om litt røyk og glør frå eit hulrom, opplyser han.

Mannskapet dynka bjelka med litt vatn, og gjekk gjennom huset med varmesøkjande kamera igjen. Sløkkingsarbeidet var avslutta i 16-tida onsdag ettermiddag.

Årsaka til brannen er førebels ukjend, og saka vil bli etterforska av Kvam, Fusa og Tysnes lensmannsdistrikt.


Siste saker Gå til framsida

Leiar: Kor lang tid skal det gå før undervass-skjera ved Horso blir merka?

I sist veke skjedde det igjen, for n’te gong. Ein fritidsbåt grunnstøytte på skjeret Horso, ved Gjerslingane, nord for ferjekaien i Våge. Fritidsbåten Risøy frå Varaldsøy med tre familiemedlemer Årvik om bord var dei uheldige denne gongen. Dei skulle frå Varaldsøy til Fitjar, og var innom Våge éi natt. Smellen førte...

Har fått 100 år gamle draktdelar

Synnøve Hodneland i Tysnes Husflidslag kan fortelja at laget har fått mange gamle draktdelar i gåve frå ein privatperson. Plagga skal vera om lag 100 år gamle, og kjem mellom anna frå Bergsvåg og Solheimsdalen. – Det er blant anna bunadsbelte, brystdukar, bunadsliv, silkeforkle, barnehuer og bunadshuer, fortel Hodneland. På lagskvelden i Husflidstova komande måndag vil Britt Kjellesvik...