VINTERBADARAR: Dei ti fyrste gjer seg klare. – Klar, ferdig, hopp!
VINTERBADARAR: Dei ti fyrste gjer seg klare. – Klar, ferdig, hopp!

Ti vinterbadarar hoppa uti samstundes

Elleve vinterbadarar stilte på den fyrste offisielle badinga for sesongen 2019-2020. Ti av dei hoppa uti samstundes.
Publisert 26.10.2019 kl. 13.16. Oppdatert 28.10.2019 kl. 10.32.

Initiativtakar Christian Nome Lepsøe gler seg over frammøtet.

– Eg håpar de kjem att neste gong og at de då tek med ein person til. Då blir me over tjue, seier han smilande til badarane etter at alle har fått på seg tørre, gode kle.


– Kjempeartig

– Dette var kjempeartig. Me blir med, kjem det kjapt frå Monica Hoff Utne.

Monica er på vinterbading for fyrste gong. Ho har ikkje drive med vinterbading tidlegare.

– Me må ha det litt artig. Dette er gøy på landet, seier ho med glimt i auga.

Rita Teigland var og blant dei som hoppa uti frå kaianlegget ved Mandelhuset. Ho har drive med vinterbading i lag med Blå skule.

– Fyrste gongen var i desember i fjor, forklarar ho og smiler.

Sidan heldt dei fram utover vinteren, ein gong i månaden. Sist gong ho bada var i september.

Terje Sløgedal var ein av dei mannlege deltakarane som stilte ved Mandelhuset laurdag. Han har og drive med vinterbading på Blå skule.

– Me starta opp i august i fjor og bada heile førre skuleår. Fleire elevar var og med, dei tøffaste var med heile året, seier han.

Snart ti år gamle Lola Linda Poder var den yngste badaren ved Mandelhuset.

– Dette var kjekt, eg blir med neste gong, seier ho smilande.


50 medlemer

Facebookgruppa som hytteeigar og tysnesentusiast Christian Nome Lepsøe har oppretta, har så langt 50 medlemer.

– Berre etter at «Tysnes» skreiv om saka, har det kome mange nye medlemer, fortel han.

Han trur det vil koma endå fleire etter kvart.

– Eg har fått informasjon om at det er fleire på Tysnes som driv med vinterbading, som ikkje er her i dag, seier han, og ser seg rundt.

Planen til initiativtakaraen er å halda det gåande ut mars månad, den siste laurdagen i månaden.

– Det er det sosiale som er viktig for meg. Eg er eit sosialt vesen som likar å bli kjent med nye folk. Det er litt av poenget med å ha samling med suppe etterpå, forklarar han.

Og så skryt han av at Patrick Madsen stiller opp, med ope Mandelhuset.

– Du er alltid grei Patrick og er med på alt som er gale, seier Christian med glimt i auga.

Patrick Madsen fortel om naustplanane ved sida av Mandelhuset. Då kan dei ha samling i naustet etterpå når prosjektet er klart utpå vinteren.


Veksande interesse

I Bergen er det veksande interesse for vinterbading. Christian Nome Lepsøe fortel at hundrevis tek turen til Nordnes Sjøbad kvar torsdag. Der er det rett nok badeanlegg med badstu også.

– På nyårsafta i fjor var det over tusen personar som var med på vinterbading på Nordnes Sjøbad, fortel Christian.

– Eg kunne sjølvsagt hadde eit fellesopplegg med kompisar i Bergen, men eg synest det er ekstra stas å få det til på Tysnes, legg han til, i det badarane får servert varm kakao på Mandelhuset.

Etterpå er det varm suppe å få kjøpa.

Terje Sløgedal får suppa gratis. Det er premien for å ha det mest korrekte svaret på tippekonkurransen på badetemperaturen.

– Det var elleve grader i vatnet, informerer Christian.

Terje tippa 11,1 grader.



VINTERBADING: Dei ti fyrste deltakarane hoppa uti samstundes, på vinterbadinga ved Mandelhuset laurdag.
VINTERBADING: Dei ti fyrste deltakarane hoppa uti samstundes, på vinterbadinga ved Mandelhuset laurdag.
SPREK GJENG: Dei fleste hadde eit prøvehopp fyrst. Her er dei i sjøen for andre gong.
SPREK GJENG: Dei fleste hadde eit prøvehopp fyrst. Her er dei i sjøen for andre gong.
SOLGLIMT: Etter nokre kraftige regnbyger laurdag føremiddag, blei det solglimt då badarane hoppa uti, og steig på land att.
SOLGLIMT: Etter nokre kraftige regnbyger laurdag føremiddag, blei det solglimt då badarane hoppa uti, og steig på land att.
INITIATIVTAKAR: Hytteeigar og tysnesentusiast Christian Nome Lepsøe håpar endå fleire tek turen neste gong, den siste laurdagen i november.
INITIATIVTAKAR: Hytteeigar og tysnesentusiast Christian Nome Lepsøe håpar endå fleire tek turen neste gong, den siste laurdagen i november.
SMAKTE GODT: Rita Teigland testar var kakao. – Den var god, seier ho.
SMAKTE GODT: Rita Teigland testar var kakao. – Den var god, seier ho.

Siste saker Gå til framsida