GOD MUSIKK: – Gamaldans og trekkspelmusikk er flott musikk, seier Bjørg og Hans Eivind Lande.
GOD MUSIKK: – Gamaldans og trekkspelmusikk er flott musikk, seier Bjørg og Hans Eivind Lande.

– Dette er musikk som me blir i godt humør av

Bjørg og Hans Eivind Lande strålar over trekkspelmusikk på Mandelhuset.
– Ja, me dansar og, seier Bjørg, og smiler.
Publisert 28.10.2019 kl. 13.38.

«Tysnes» møter dei to i ein av få pausar under trekkspelkvelden på Mandelhuset laurdag kveld.

– Dette er kjempefin musikk, seier Hans Eivind.

– Ja, dette er veldig kjekt for oss som er vaksne ungdomar, legg kona Bjørg til.


Måtte ta turen

Dei to var ikkje i tvil om at dei ville ta turen då dei såg kunngjeringa i «Tysnes» om «Gammaldans med Masfjorden Trekkspelklubb». Kvelden opna med betasuppe og heimelaga eplekake. I halvannan time kunne folk kosa seg med suppe og dessert, før trekkspelmusikarane sette i gang i halvåttetida.

– Det har vore ein veldig kjekk kveld, seier Bjørg og Hans Eivind.

– Her er det passeleg høg musikk slik at det er råd å prata med folk.

– Og så dansar me litt også, kommenterer Bjørg.

På dansegolvet finn me og 95-åringen Kirsten Aarvik og sonen Nils Bjarne Aarvik. Familien har feira 95-årsdagen til Kirsten på Mandelhuset denne kvelden, og dei to «kastar» seg ut i ein vals.

Innimellom dansinga mimrar Hans Eivind om «gamledagar» og om ei tid då gamaldans og leikarring var veldig populært. Han var i si tid sjølv med i leikarring som opptredde på Godøysund med framsyningar for tilreisande gjester i hotellet si glanstid.

Bjørg og Hans Eivind er litt skuffa over at ikkje endå fleire har teke turen til Mandelhuset denne kvelden. Men dei har ikkje svaret på kva som skal til for å få fleire ut av godstolen.

– Det er ikkje så ofte det er denne typen arrangement på Tysnes, som høver for vår aldersgruppe. Fleire burde teke turen. Det ligg trass alt ein del arbeid bak eit arrangement som dette, og trekkspelmusikarane har jo teke turen heilt frå Masfjorden, seier dei.


– Flott tiltak

Nina Iversen og Brit Marit Høgestøl har fått med seg heile kvelden så langt. Dei nyt musikken når «Tysnes» bryt inn.

– Eg synest dette er eit flott tiltak. Det er skikkeleg gamaldans med noko attåt. Me fekk god suppe og heimelaga eplekake og heimelaga is, skryter dei.

Dei er imponert over trekkspelarane som har spelt i halvannan time før dei tek ein pause.

– Det kunne vore endå kjekkare om fleire hadde teke turen, og endå fleire hadde vore på dansegolvet. seier Nina.

– Ja, det er alltid kjekkast når det er folk som dansar, seier Olav Høgestøl, som sjølv spelar trekkspel i lag med Bjarte Nerhus frå Ølve og Gunnar Teigland på toradar.

– Kanskje det burde vore kurs i gamaldans på Tysnes, slik at endå fleire tok turen på slike tilstellingar, seier Nina.


Er nøgd

Dagleg leiar på Mandelhuset, Patrick Madsen, er likevel nøgd med oppslutnaden.

– Så lenge det kjem folk, så er me nøgde, seier han, og smiler.

– Det viktigaste for oss er å skapa tilbod for alle generasjonar, legg han til.

Han lovar at det blir fleire trekkspelkveldar seinare, utan at datoen så langt er bestemt.

– Me kjem gjerne tilbake, seier Gjert Rune Daae, som bur i Masfjorden og er leiar av Masfjorden Trekkspelklubb.

I dag er dei seks medlemer i klubben, og alle er med til Tysnes.

– Me spelar variert musikk, både vals, reinlender, pols, tango og swing. Det ser ut som dei fleste som er her i kveld likar best vals, seier han.

Han synest det er kjekt å koma til Tysnes.

– Det er kjekt å byta speleplass, seier han.

Til vanleg spelar dei mest i eigen kommune, elles plar dei å ha speleoppdrag for pensjonistlaget på Brekkestranda. Dei øver kvar tysdag gjennom heile skuleåret.

Det er klubbmedlem Oddrun Kvamsdal som har knytt kontakten til Tysnes. Ho er mor til kjøkkensjefen på Mandelhuset.


FIN KVELD: Nina Iversen (t.h.) og Brit Marit Høgestøl skryter over trekkspelkvelden. – Eit flott tiltak, seier dei, og får støtte av Olav Høgestøl som sjølv spelar trekkspel.
FIN KVELD: Nina Iversen (t.h.) og Brit Marit Høgestøl skryter over trekkspelkvelden. – Eit flott tiltak, seier dei, og får støtte av Olav Høgestøl som sjølv spelar trekkspel.
FEIRA 95-ÅRSDAG: Kirsten Aarvik feira 95-årsdag på Mandelhuset på laurdag. Då blei det og ein vals med sonen Nils Bjarne Aarvik.
FEIRA 95-ÅRSDAG: Kirsten Aarvik feira 95-årsdag på Mandelhuset på laurdag. Då blei det og ein vals med sonen Nils Bjarne Aarvik.
SPELTE OPP: Dei seks medlemene i Masfjorden Trekkspelklubb som tok turen til Tysnes. Klubbleiar Gjert Rune Daae er nummmer tre frå høgre.
SPELTE OPP: Dei seks medlemene i Masfjorden Trekkspelklubb som tok turen til Tysnes. Klubbleiar Gjert Rune Daae er nummmer tre frå høgre.

Siste saker Gå til framsida

Dei nye ferjerutene er klare

I formiddag lanserte Skyss dei nye ferjerutene på sambanda Våge-Halhjem og Jektavik-Nordhuglo-Hodnanes, som trer i kraft 1. januar.

Byggjer utvendig toalett

Det er vanskeleg å nå fram i tide for dei unge som treng rask veg til nødvendige ærend. Slik det er no, er ikkje tilhøva tilfredsstillande, skriv styrar i Stjernereiso barnehage.– Me har mykje toalettuhell. Det er dårleg for barna sin meistringsfølelse, og det går mykje ekstra tid der me er for få vaksne ute, argumenterer styraren.Rådmannen har lytta til ønsket frå barnehagen,...