KLAR FOR BOKFEST: Ingelin Røssland har fordjupa seg i både hår og blod, og gler seg til å dela artige fakta med tysnesingane på søndag. (Privat foto)
KLAR FOR BOKFEST: Ingelin Røssland har fordjupa seg i både hår og blod, og gler seg til å dela artige fakta med tysnesingane på søndag. (Privat foto)

Kjem til Tysnes med sprøe fakta

Biblioteket er staden å vera på søndag om du vil møta forfattar Ingelin Røssland.
Publisert 30.10.2019 kl. 06.00.

Dei to lettlesne bøkene hennar «Hårete fakta» og «Blodige fakta» er mykje lånt og kjøpt, og fortener rett og slett ei lita feiring. Søndag vert det difor invitert til «hårete og blodig bokfest» på Tysnes folkebibliotek.

Det er aller fyrste gong Røssland skipar til eit slikt arrangement på Tysnes, og ho må vedgå at ho er litt nervøs.

– Eg håpar det kjem minst fem-seks personar, seier ho forsiktig, og legg til at ho blir glad for alle som tek turen.


Høgtlesing

På bokfesten vil Røssland ha høgtlesing frå begge bøkene.

– Det blir rare fakta om alt som er gøy om hår og blod. Visste du til dømes at om ein lagar eit tau av alt håret som er på hovudet, så kan det tola tyngda av to elefantar?

Dei frammøtte kan også få greie på om det er nokon som faktisk har blått blod, og høyra om kvifor folk har drukke blod opp gjennom tidene, heilt utan å vera vampyr.

«Hårete fakta» og «Blodige fakta» er skrivne for born frå 1. klasse og oppover, men også vaksne kan ha glede av alt det artige som Røssland og illustratør Jenny Jordahl formidlar.


Blodig servering

Forfattaren frå Tysnes håpar at både små og store har lyst til å møta opp i kostyme på bokfesten. Her er det berre å finna fram sin raraste parykk, eller kle seg ut som ein blodtørstig vampyr.

– Beste kostyme blir premiert. Det skal løna seg å kasta seg utpå med utkledning, seier ho.

Men ein kan sjølvsagt også koma som ein er. Det viktigaste er at folk skal ha det morosamt, kanskje læra noko nytt, og ha ei sosial og triveleg stund på biblioteket. Arrangementet er gratis, og det er lova blodig servering.

– Bibliotekaren har nokre planar. Ein må nesten berre møta opp og sjå, seier Røssland lurt.


Bokbad på skulen

Allereie neste onsdag skal ho tilbake til Gjerstad igjen. Då får heile ungdomstrinnet besøk av henne og Terje Torkildsen, og den rykande ferske ungdomsromanen «OMG» skal under lupa.

– Boka har handling frå Tysnes, så det blir veldig kjekt å fortelja om den der, strålar ho.

Terje Torkildsen sin «Stavanger Stories» skal også diskuterast.

Bokbadet er ein del av årets Falturiltu-festival, og vert arrangert i samarbeid med Bokåret 2019 og Framtida.no.


Siste saker Gå til framsida

Skuletime i flytenaustet

Også denne hausten har 6. klassingane i kommunen fått høyra og læra om alle tysnesingane som var mannskap og offiserar på amerikanske yachter (jåttar på tysnesdialekta) i perioden 1900-1940. I fleire år har 6. klassingane vore inviterte til omvising og «skuletime» i flytenaustet om jåttseglarane. Elevane syner interesse for denne viktige brikka i Tysnes si nyare soge. Dei får...