KORKONSERT: Stordkoret skapte ei lun og god stemning då dei framførte klassisk musikk i Uggdal kyrkje laurdag.
KORKONSERT: Stordkoret skapte ei lun og god stemning då dei framførte klassisk musikk i Uggdal kyrkje laurdag.

– Me må prøva å koma tilbake

Kvile, forsoning og frigjering var stikkorda då Stordkoret hadde konsert i Uggdal kyrkje laurdag.
Publisert 06.11.2019 kl. 06.00. Oppdatert kl. 10.39.

– Det er koseleg å framføra på Tysnes. Ein må yta litt ekstra då, seier ein smilande Alf Terje Myklebust.

Laurdag var Stordkoret på besøk på Tysnes med framsyning i Uggdal kyrkje. Tysnesingen Alf Terje er ein av dei verkelege veteranane i koret, og har vore med sidan stiftinga i 1978.

– Dei andre har vore på meg og spurt om det ville koma mykje folk, seier han.


Behageleg stemning

Og det var ein god del tysnesingar som møtte fram i kyrkja laurdag kveld. Stordkoret kom med eit spesialsydd program basert på allehelgenshøgtida, og hadde fyrst framsyning på Tysnes, før dei hadde konsert på Stord søndag.

Programmet var todelt. Den fyrste delen bestod av ulike stykke av Felix Mendelssohn, Knut Nystedt, Edvard Grieg, Gabriel Fauré og Johann Sebastian Bach, medan del to var ei komplett framføring av Gabriel Fauré sin «Requiem». Fauré var ein fransk komponist som levde på slutten av 1800- og byrjinga av 1900-talet. Han skreiv sitt rekviem mellom 1887 og 1890.

– Me har framført Fauré sin «Requiem» med to ulike dirigentar tidlegare, så det er eit stykke me kjenner godt til, fortel Alf Terje.

Han forklarar at for å fylla ut konsertprogrammet, har dirigent Liv Kari Bru, som har leia koret sidan 2017, plukka ut dei andre songane som vart framført.

– Dirigenten har plukka ut nye songar, så dei har me brukt ein god del tid på å læra, fortel Alf Terje.

Programmet er sett saman for å setja stemninga for allehelgenshøgtida, og koret lokka på førehand med at tema for konserten var kvile, forsoning og frigjering.


Nesten Tysnes-debut

Stordkoret har eit trufast publikum på Stord, men har ikkje vore mange gongar over Nuen til Tysnes.

– Eg meiner å hugsa at me var i Vonheim ein gong for lenge sidan, seier Alf Terje, som fortel at dei den gongen hadde ei annleis og meir lettbeint framsyning.

– Dette vart ein slags Tysnes-debut, fortel han.

Men det er godt mogleg at Stordkoret har funne ein ny arena. Dirigent Liv Kari var godt nøgd med framføringa i Uggdal kyrkje.

– Det var eit godt publikum med gode ansikt, og så likte eg akustikken her i kyrkja. Me må prøva å koma tilbake, fortel ho.


PUBLIKUM: Dirigent Liv Kari Bru var godt nøgd med mottakinga frå Tysnes-publikummet i kyrkja.
PUBLIKUM: Dirigent Liv Kari Bru var godt nøgd med mottakinga frå Tysnes-publikummet i kyrkja.
ALLEHELGENSKONSERT: Koret framførte eit variert program, mellom anna med innslag av Gabriel Fauré, Johann Sebastian Bach og Edvard Grieg.
ALLEHELGENSKONSERT: Koret framførte eit variert program, mellom anna med innslag av Gabriel Fauré, Johann Sebastian Bach og Edvard Grieg.

Siste saker Gå til framsida

Dei nye ferjerutene er klare

I formiddag lanserte Skyss dei nye ferjerutene på sambanda Våge-Halhjem og Jektavik-Nordhuglo-Hodnanes, som trer i kraft 1. januar.

Byggjer utvendig toalett

Det er vanskeleg å nå fram i tide for dei unge som treng rask veg til nødvendige ærend. Slik det er no, er ikkje tilhøva tilfredsstillande, skriv styrar i Stjernereiso barnehage.– Me har mykje toalettuhell. Det er dårleg for barna sin meistringsfølelse, og det går mykje ekstra tid der me er for få vaksne ute, argumenterer styraren.Rådmannen har lytta til ønsket frå barnehagen,...