HADDE FORMA: Pernilla Epland var uslåeleg i halvmaratonen i Stavanger i helga. (Foto: Hans Petter Støre)
HADDE FORMA: Pernilla Epland var uslåeleg i halvmaratonen i Stavanger i helga. (Foto: Hans Petter Støre)

Beste kvinne i 3-sjøersløpet

Med tida 1.14.35, tok Pernilla Epland ein overlegen siger i Stavanger på laurdag.
Publisert 11.11.2019 kl. 13.09.

Tysnesingen kom i mål eitt minutt og 43 sekund før Vienna Søyland Dahle, som kom på andreplass også i fjor, og på fyrsteplass i 2017. Tredje raskaste kvinne i 3-sjøersløpet i år vart Rebecca Hilland, to minutt og 25 sekund bak Pernilla.

– Eg hadde forventningar om å springa eit godt løp, men løypa er relativt hard og stort sett på grus, så eg hadde ikkje trudd at eg skulle springa så fort som eg gjorde. Men då min kanskje største utfordrar (Vienna Søyland Dahle, red. merk) sleppte etter fire kilometer, blei eg ekstra motivert for å ta sigeren, seier Pernilla til «Tysnes».

I tillegg til den imponerande sigeren, kan Pernilla no smykka seg med å vera løyperekordhaldar i 3-sjøersløpet. Ingen kvinner har nokon gong sprunge dei 21 kilometrane så raskt som ho gjorde på laurdag, og tida hennar er dessutan ny årsbeste på denne distansen.

– Det var veldig gøy med så god tid, og knusing av løyperekorden med over eitt minutt, strålar Pernilla.

Med i 3-sjøersløpet var også Pernilla sin veslebror, Henrik Sebastian Epland. Han kom i mål på tida 1.22.10, berre 16 minutt bak raskaste mann.

Meir enn 2200 sprekingar fullførte løpet.


I MÅL: Tysnesingen fekk løn for strevet, og var soleklar vinnar i kvinneklassen. (Foto: 3-sjøersløpet)
I MÅL: Tysnesingen fekk løn for strevet, og var soleklar vinnar i kvinneklassen. (Foto: 3-sjøersløpet)

Siste saker Gå til framsida