GODT SAMSPEL: Tysnes skulekorps fekk tredjeplass på Bømloblåsen i helga, der fleire sunnhordlandskorps konkurrerte mot kvarandre. (Foto: Lena E. Sløgedal)
GODT SAMSPEL: Tysnes skulekorps fekk tredjeplass på Bømloblåsen i helga, der fleire sunnhordlandskorps konkurrerte mot kvarandre. (Foto: Lena E. Sløgedal)

Tredjeplass til Tysnes skulekorps

Tysnes skulekorps fekk ei solid plassering på Bømloblåsen i helga.
Publisert 11.11.2019 kl. 11.19.

– Me er veldig fornøgde, seier korpsleiar Else Marit Særsten om tredjeplassen.

Det som gjekk igjen blant dommarkommentarane er at Tysnes skulekorps har ein veldig god klang, og spelar godt saman.

– God klang og musisering er dei gode på, seier korpsleiaren.


Viktigast å ha det kjekt

Ho meiner det er greitt å vera med i lokale konkurransar som Bømloblåsen, der fleire sunnhordlandskorps er med. I år stilte éin divisjon, med blanding av brass og janitsjar.

– Jamnt over var det eit bra nivå på alle korpsa som deltok, seier ho.

Då var det sjølvsagt kjekt å dra heim att med pokal og god plassering.

– Dei har jobba jamnt og godt sidan me starta opp i august. Men det viktigaste for oss var å spela ein bra konsert, seier Særsten.

– Me er ikkje så fokusert på plassering. Det viktige er å prestera saman og å ha det kjekt i lag.


Ser fram mot NM

Tysnes skulekorps består av medlemar mellom ti og 19 år, og frå i fjor til no har korpset fått ei overvekt av yngre medlemar.

– Ein del av dei eldste som har vore med, har blitt for gamle, og i fjor fekk me inn fleire nye. Det er veldig kjekt å sjå at yngre i skulekorpset tek ei større rolle, seier Særsten.

– På hausten får me nye medlemar som ikkje har vore i konkurranse endå, og det er spanande å vera med i konkurranse for første gong. Då er det alltid kjekt å få ei slik utteljing som dette, seier Særsten.

Bømloblåsen reknar dei likevel som ein treningskonkurranse. Det store hovudmålet, som dei no skal jobba fram mot, er NM i brass i juni.


POKAL: Skulekorpset hadde fokus på å ha det kjekt i lag, men gjekk ikkje tomhendt heim av den grunn. F.v. Ingrid Belt med pokal, og Hilda Særsten Stien med diplom. (Foto: Else Marit Særsten)
POKAL: Skulekorpset hadde fokus på å ha det kjekt i lag, men gjekk ikkje tomhendt heim av den grunn. F.v. Ingrid Belt med pokal, og Hilda Særsten Stien med diplom. (Foto: Else Marit Særsten)

Siste saker Gå til framsida