PÅ HAUSTFEST: Utflytta tysnesingar Torborg Onarheim Vaage og Bjørn Vaage var for fyrste på Onarheim bygdalag sin haustfest. Der fekk dei mellom anna med seg premiering av 20/30 turar til Blåbærhaugen.
PÅ HAUSTFEST: Utflytta tysnesingar Torborg Onarheim Vaage og Bjørn Vaage var for fyrste på Onarheim bygdalag sin haustfest. Der fekk dei mellom anna med seg premiering av 20/30 turar til Blåbærhaugen.

På bygdalagsfest på Onarheim for fyrste gong

– Det er greitt å følgja med på kva som skjer på heimplassen, seier utflytta tysnesingar Torborg Onarheim Vaage og Bjørn Vaage.
Publisert 17.11.2019 kl. 22.15. Oppdatert kl. 22.39.

Laurdag kveld var dei gjester i lag med 50-60 andre på Onarheim bygdalag sine årlege haustfest. Der fekk dei med seg både betasuppe, premieutdeling for 20/30 turar til Blåbærhaugen i september og oktober og dans i OnarTun.


– Blåbærhaugen er ein flott tur

– Same kor mykje me er vekke, så er Tysnes den tilbakevendande plassen, seier dei to som i dag har Kvinnherad som buplass.

Men med ei familiehytte på Tysnes blir det likevel mange turar til Tysnes i løpet av året.

Denne helga var dei invitert av vener til Onarheim. Dermed blei det også ein tur til Blåbærhaugen.

– Me er ofte på tur til Blåbærhaugen når me er på Tysnes. Det er ein utruleg flott tur, seier dei og smiler.

– Me har ein tilsvarande tur i Rosendal også, men der er det ingen som betalar lagslivet ti kroner for turen. Det er kjempeflott av Gerhard Alsaker og Alsaker Fjordbruk å sponsa idrettslaget på den måten. Det er hardt å driva lagsarbeid berre på basarpengar, seier Bjørn.

Han legg til at Rosendal har ein fordel som ein ikkje har på Blåbærhaugen enno, og det er ei hytte på toppen.

– I dag blæs det mykje. Då hadde det vore kjekt å ha ei hytte å setja seg inn i, seier han.


Passerte imponerande 60.000 turar

Å registrera seg i loggboka på toppen av Blåbærhaugen er blitt svært så attraktivt etter at den fyrste registreringsboka blei lagt ut i mai 2014. I loggbøkene finn ein både fastbuande, utflyttarar, hytteturistar og andre tilreisande.

På haustfesten til Onarheim bygdalag laurdag kveld kunne Magne Storesætre fortelja at tur nummer 60.000 blei registert i sist veke. Det var Ragnhild Storesætre på ein av sine mange turar som fekk æra av å notera seg for den sekstitusende turen, som ho blei heidra med jubel for på festen.

Året med flest registreringar er frå 2017, med 12.929. Men 2019 kan bli eit nytt rekordår; ved utgangen av oktober var det loggført 12.143 på toppen.

– Det teiknar til at det går mot rekord, dersom entusiasmen held seg fram til nyttår, meinte premieutdelar på haustfesten, Magne Storesætre.

I september og oktober i år var det 2.681 som skreiv seg inn i boka.

60.000 turar tyder 600.000 kroner i sponsing frå Gerhard Alsaker og Alsaker Fjordbruk til Onarheim idrettslag.


Trekte gåvekort

Laurdag kveld var det premiering for 20/30 turar til toppen i september og oktober. I alt var det 43 personar som deltok i konkurransen, nokre med eitt kort på 20 turar, dei ivrigaste med opptil fire og fem kort. Totalt var det levert inn 66 kort; 28 kort med 30 turar og 38 kort med 20 turar.

Dei som hadde gått flest turar i desse to månadene var Olav Storesætre (150), Ragnhild Storesætre (120), Solveig Onarheim (110), Helen Skaten Hystad (80), Hildegunn D. Flakke (70) og Lise Skjåk Dalen (60). Men ingen av dei ivrigaste vann premiane som blei trekt blant deltakarane.

Gåvekortet på 2.000 kroner blei vunne av Bjørn Ove Meland Tjelta, medan Magne Storesætre vann gåvekort på 1.000 kroner. Lakseside og drikkeflasker blei vunne av Arild Storesætre, Anne Britt Onarheim og Hans Tore Brekke.


Siste saker Gå til framsida