PÅ SJØ: Tysdag 26. november blei brønnbåten til Alsaker Fjordbruk, «Kristoffer Tronds», sjøsett ved verftet i Spania. (Foto: Al.Fj.)
PÅ SJØ: Tysdag 26. november blei brønnbåten til Alsaker Fjordbruk, «Kristoffer Tronds», sjøsett ved verftet i Spania. (Foto: Al.Fj.)

Brønnbåten til Alsaker Fjordbruk sjøsett i Spania

Tysdag 26. november er ein historisk dag for Alsaker Fjordbruk. I dag blei den nye brønnbåten «Kristoffer Tronds» sjøsett ved verftet i Spania.
Publisert 26.11.2019 kl. 20.34.

– Alt gjekk som planlagt, seier Gerhard Meidell Alsaker, på telefon frå verftet i Bilbao.

No blir det ein lengre periode med innreiingsarbeid om bord på den rekordstore brønnbåten.

– Me er omlag halvferdige med innreiinga. Alt arbeidet som står att skal gjerast når båten ligg på sjø, forklarar Gerhard Alsaker, før han gjer seg klar til middag og ei høgtideleg markering.

På sjøsetjinga tidlegare i dag fekk Malene Kristine Meidell Alsaker det ærefulle oppdraget med å knusa champagneflaska.

Dåpen av brønnbåten skal skje når den kjem til Norge neste år. Båten skal leverast frå verftet i andre halvår 2020.

Tysdag kveld er det seremoni på verftet. Der stiller Alsaker Fjordbruk med 20-30 personar som er eigne tilsette og selskapet sine gjester. Verftet har om lag dobbelt så mange med på middagen. Det er ein stor dag også for verftet.

– I morgon blir det heim att til Norge, seier reiaren og lakseoppdrettaren før han hastar inn til middagen.

Med ei lengd på 91 meter blir «Kristoffer Tronds» den største brønnbåten så langt som skal operera i Norge. Båten skal ha toskiftsordning, og vil få kring 20 tilsette.


Siste saker Gå til framsida