KJEM TILBAKE: Highasakite-vokalist Ingrid Helene Håvik gjer comeback på Gjerstad fredag 10. juli 2020. (Foto: Camilla Korsnes)
KJEM TILBAKE: Highasakite-vokalist Ingrid Helene Håvik gjer comeback på Gjerstad fredag 10. juli 2020. (Foto: Camilla Korsnes)

Highasakite returnerer til Gjerstad

Tre nye artistar er stadfesta klare for Tysnesfest 2020.
Publisert 27.11.2019 kl. 20.00.

– Me har lenge vore i full gang med å planleggja neste års festival, men no har det gått litt tid sidan førre slepp, så då er det grådig kjekt å kunna sleppa heile tre artistar i eit jafs, fortel dagleg leiar i Tysnesfest Øystein Vaage.

Frå før er TIX, CC Cowboys og Hellbillies lansert til festivalen, og no er også tre nye artistar lansert. Det største namnet er Highasakite, som har spelt på Tysnesfest to gongar tidlegare, i 2015 og 2017.


Duo

Sidan Highasakite var på Tysnes sist, har det vore store omveltingar i gruppa. Fem medlemer har blitt til to, og gruppa består no av Ingrid Helene Håvik og Trond Bersu. To av dei tidlegare medlemene, Øystein Skar og Marte Eberson, spelte i sommar på Gjerstad med si nye gruppe LÖV.

Bruddet i Highasakite har fått mykje mediomtale, og konflikten enda med rettssak kring retten på bandnamnet.

I februar gjorde Highasakite comeback med albumet «Uranium Heart», som nådde fjerdeplass på VG-lista. I april legg dei ut på turné, og skal innom både England, Danmark og Sverige før dei kjem til Tysnes i juli.

– Me gler me oss til å ta imot dei igjen, seier Vaage.


Realitykarar

I tillegg til Highasakite, kjem også gruppa Stavanger-kameratene til Gjerstad i sommar. Gruppa består av fire artistar med bakgrunn frå songkonkurransar på TV. Kjartan Salvesen og Glenn Lyse er begge tidlegare «Idol»-vinnarar, høvesvis i 2004 og 2007, medan Tommy Fredvang var med i «X Factor» i 2009 og Ole Alexander Mæland var med i «The Voice» i 2012.

Stavangerkameratene blei etablert i 2015, og har gjeve ut to album. Dei mest kjende låtane er «Bare Så Du Vett Det», og den norske Avicii-coveren «Vekk Meg Opp».– Me har lenge prøvd å få tak i dei, og endeleg klaffa det med kalenderen deira, seier Vaage.

Det siste sleppet i denne omgang er den unge artisten Kjell Øverland, kjend under artistnamnet «Kapteinen». Han skal i vinter vera gjesteartist på turnéen til den norske stjerna Arif. Kapteinen er ein allsidig artist med eit breitt spekter av inspirasjonskjelder, alt frå Young Thug og Drake til Michael Jackson og Prince.


POPULÆRE KARAR: Neste sommar speler Stavangerkameratene på Tysnesfest for fyrste gong. (Foto: Rune Sørensen)
POPULÆRE KARAR: Neste sommar speler Stavangerkameratene på Tysnesfest for fyrste gong. (Foto: Rune Sørensen)
KAPTEINEN: Tysnesfest-leiinga er godt fornøgde med å ha booka stjerneskotet Kjell Øverland. (Foto: Jonathan Vivaas Kise)
KAPTEINEN: Tysnesfest-leiinga er godt fornøgde med å ha booka stjerneskotet Kjell Øverland. (Foto: Jonathan Vivaas Kise)

Siste saker Gå til framsida