TRASIG: I fleire veker har Benjamin Hagen (12) stått på for å samla nok krabbar til krabbefest med familien. Men krabbefesten blei avlyst då tjuveraddar tømte krabbekassen hans for fangsten. (Foto: Ella Sandra Dahl Berland)
TRASIG: I fleire veker har Benjamin Hagen (12) stått på for å samla nok krabbar til krabbefest med familien. Men krabbefesten blei avlyst då tjuveraddar tømte krabbekassen hans for fangsten. (Foto: Ella Sandra Dahl Berland)

Benjamin (12) fekk fråstole fangsten

Då han endeleg hadde samla nok krabbe og hummar til krabbefest for heile familien, fekk Benjamin Hagen fråstole alt saman.
Publisert 28.11.2019 kl. 15.00.

«Den som ventar på noko godt, ventar ikkje forgjeves», heiter det. Men for Benjamin gjekk fleire veker med arbeid og ventetid til spille, på grunn av tjuveraddar på ferde ved Lunde kai. Benjamin hadde bursdag 9. september, og kjøpte teiner for alle bursdagspengane. Han fekk råd til fire teiner, og storebror Kim Aleksander hjelpte han med å kjøpa den siste.

– Han ville vel helst ha kjøpt tjue teiner. Men eg har sagt at me får byrja forsiktig, seier mamma Hilde Hagen.


Skulle samlast til krabbefest

I fleire veker har tolvåringen samla krabbar i ein sjølvsnikra krabbeboks.

– Det var veldig gøy. Eg synest det er så gøy å fiska, og hadde lyst å prøva meg på krabbeteiner òg. Det synest eg var veldig gøy, fortel han.

Snart fekk han eit mål, nemleg å laga krabbefest med heile familien, når storebror Kim Aleksander endeleg skulle komma på besøk frå Bergen. Men slik blei det ikkje.

– Han har venta på storebroren som bur i by’n. Det var han som hjelpte han med å kjøpa teiner i Bergen. Han skulle komma heim, og me skulle samlast alle saman til krabbefest. No hadde Benjamin endeleg fått nok krabbar, seier Hilde.


Stole

Krabbekassen låg ved båten til Benjamin i Lunde båthamn, og kvar dag var han nede for å mata dei, i påvente av familiesamankomsten. Men på kvelden den 18. november blei forventning snudd til frustrasjon. Då ein av brørne til Benjamin var nede ved kaien for å visa fangsten til ein kompis, oppdaga dei at krabbekassen var broten opp, og at både krabbane og hummaren var vekke.

– Eg trudde først at broren min tulla, seier Benjamin.

– Så eg venta til neste dag, sykla bort og sjekka, og så var alt faktisk vekke. Då blei eg lei meg og ganske sur, fortel han.


Frustrerande

Det har vore noko mindre krabbe i år, men det har teke veldig lang tid å samla opp dei Benjamin hadde.

– Me kjenner ein som er sikker på at nokon går og tømmer teinene medan folk er på jobb. Det er jo enkel fangst, så slepp dei å setja teiner sjølv. Så me lurer litt på om det er folk som har tatt fangsten undervegs òg, held ho fram.

– Ein blir jo så irritert når folk er så frekke, og stel utan samvit. Eg håpar dei set krabbane rett i halsen, eller at den kjem kravlande opp att gjennom magen. Dei fortener ikkje den krabben, seier ho.

– Eg veit ikkje heilt kva eg skal seia, fortel Benjamin.


Uventa gåve

Ingen krabbe, ingen fest. Besøket er over.

– Han har stått på i all slags vêr i desse vekene, og aldri vore skuffa om han har trekt tomme teiner. Då har det berre vore på’an igjen dagen etter, dag ut og dag inn. Då er det trasig når slikt som dette skjer, seier Hilde.

Ein bekjent av familien som fekk med seg tjuveriet gjennom eit Facebook-innlegg frå Hilde, fekk så stor medkjensle med Benjamin at han ga han ein stor kasse med agn. Dermed slapp han å gå ut og fiska etter nytt agn på toppen av det heile.

– Det blei eg veldig glad for, smiler han.

Søndag kveld sette Benjamin teiner på nytt, for han gir ikkje opp. Krabbefesten skal han ha.


Siste saker Gå til framsida