OG DER STARTA JULA:  Jula kunne endeleg starta i kveld, meiner niåringane Ole Hauge Hansen og Adrian Dale Hauge Hansen, som var med på julegateopninga i Lunde. (Alle foto: Ella Sandra Dahl Berland)
OG DER STARTA JULA: Jula kunne endeleg starta i kveld, meiner niåringane Ole Hauge Hansen og Adrian Dale Hauge Hansen, som var med på julegateopninga i Lunde. (Alle foto: Ella Sandra Dahl Berland)

– Det er i dag me startar jula

No er ventetida over for Adrian og Ole (9), som var med på julegateopninga i Lunde i kveld.
Publisert 29.11.2019 kl. 21.09.

– Det er i dag me startar jula! smiler dei.

Gutane var blant mange, store og små, som dukka opp i Lunde for å få med seg julegateopninga med alt som høyrer med; varm gløgg, peparkaker, stjerneskot og bålpanne. Og ikkje minst julesongar.

– Og me fekk snop av nissen, seier dei.

– Me fann faktisk nissen først, så då fekk me godteri først. Det var gøy, smiler dei lurt.


Gler seg til søndag

Men endå har Adrian og Ole mykje meir å sjå fram til.

– Ja, søndag! For då er det den 1. desember, og då kan me endeleg opna julekalenderen, seier Adrian. – Dette har de gledd dykk til altså?

– Ja! Eg har fått sjokolade- og godterikalender i år, held Adrian fram.

Ole har fått ein legokalender og ein gåvekalender. Dei synest det er stas å ha noko å gle seg til kvar dag fram til jul.

– Eg er veldig glad i jula, kjem det frå Ole. – Kvifor det?

– For då et me god mat, og alle me kjenner kjem på besøk, og me får gåver, smiler han.

– Det beste med jula er at alle er i lag, avsluttar Adrian.


Endå meir julestemning

Ein juleglad dame som tok turen frå Våge til Lunde var Andrea Skår Hagen (22), som har vore med på julegateopninga i Lunde heilt sidan ho var lita.

– Det er god stemning, ein kan leika med stjerneskot, og så er det fint å vera med familien, smiler ho.

– Julegateopning gjer meg glad, og i dag kjem eg meir i julestemning. – Meir?

– Eg har allereie pynta litt heime, og så har eg kjøpt litt julepresangar, svarar ho. Andrea bur i Våge, men har familie i Lunde. Difor må ho ha med seg både julegateopninga i Lunde, og den i Våge.

– Dei er like bra, begge to! Eg skal få med meg den i Våge i morgon, fortel ho.


GOD STEMNING: – Det gjer meg glad, seier Andrea Skår Hagen (22) om julegateopninga.
GOD STEMNING: – Det gjer meg glad, seier Andrea Skår Hagen (22) om julegateopninga.
JULESONGAR: Mailinn Hagen (t.h.) tok initiativet til å starta allsong. Her i lag med (f.v.) Aleksander Gravdal Flatråker, Tomine Helland Hagen, Tuva Hauge Hansen, og Sanna Helland Hagen.
JULESONGAR: Mailinn Hagen (t.h.) tok initiativet til å starta allsong. Her i lag med (f.v.) Aleksander Gravdal Flatråker, Tomine Helland Hagen, Tuva Hauge Hansen, og Sanna Helland Hagen.
MINGLETID: Julegateopninga var ei fin oppleving både for dei store og for dei små.
MINGLETID: Julegateopninga var ei fin oppleving både for dei store og for dei små.

Siste saker Gå til framsida