Rekordmange på vinterbading
– Det var veldig kaldt! Men det var deilig òg, seier Sunniva Olson Aslaksen (11) som var uti heile tre gongar.
– Det var litt vondt òg, ler ho.
Sina Georgsen (11) hadde hoppa uti éin gong før «Tysnes» spurde dei korleis dette kjennest ut.
– Skal me hoppa fleire gongar? kom det då frå Sina.
Skal vera med kvar gong
Dei var med på vinterbadinga i Våge for første gong, men har tenkt å stilla kvar gong framover.
– Kvifor det?
– Det var jo kjempegøy! svarar dei. – Kor kaldt trur de at det var i vatnet då?
– To grader, tipper Sunniva.
– Eg tipper éin grad, seier Sina.
Overvelda
Christian Nome Lepsøe er kjempefornøgd med det store oppmøtet.
– Eg er heilt overvelda, seier han.
Denne gongen var det heile 25 som deltok.
– Det var elleve sist, seier han, og fortel at det er veldig kjekt å sjå at så mange nye slengjer seg på.
Overraskande «varmt»
– Kva synest du om temperaturen då?
– No kjenner du det i marg og bein, seier han.
Likevel var han uti to gongar, og tippa at temperaturen låg på fire-fem grader.
Den offisielle målinga viste til slutt sju grader, til overrasking for mange. Vinnaren av tippekonkurransen blei Per Verner Aase, som tippa sju og ein halv grader.
