STAS: Tobias Frøyseth Olsen (i midten) fekk gå med fakkel for første gong i år. F.v. Lucas Rennevik Christensen, Mathias og Tobias Frøyseth Olsen, og Herman Fossdal. Bak f.v. Henrik Aakre og Jeanette Olsen. (Alle foto: Ella Sandra Dahl Berland)
STAS: Tobias Frøyseth Olsen (i midten) fekk gå med fakkel for første gong i år. F.v. Lucas Rennevik Christensen, Mathias og Tobias Frøyseth Olsen, og Herman Fossdal. Bak f.v. Henrik Aakre og Jeanette Olsen. (Alle foto: Ella Sandra Dahl Berland)

Tobias (6) fekk gå med fakkel for første gong

– Det er veldig gøy, smiler Tobias Frøyseth Olsen.
Publisert 01.12.2019 kl. 19.32.

I år var han nemleg gamal nok til å få bera sin eigen fakkel i fakkeltoget i Uggdal i ettermiddag, før den offisielle julegrantenninga ved Uggdal kyrkje.

– Han har gledd seg til det her, seier mor Jeanette Olsen.

Ho synest sjølv det er veldig kjekt å laga stas rundt 1. desember og å markera at me no går inn i julemånaden. Ekstra kjekt og praktisk er det at ho bur rett ved smia, der fakkeltoget starta.

– Det er veldig kjekt for ungane òg å få markert det. Julemånaden er jo mykje kos og hygge, familie og levande lys, fortel ho.


Leverte nissen

Etter julegrantenninga ved Uggdal kyrkje, samla dei nær 150 oppmøtte seg på Grendatun for peparkaker, gløgg og drøs.

Dei minste gledde seg nok aller mest til å få snop av nissen. Og heldigvis dukka han opp, takka vera kusken Trine Fossdal, som leverte han med hest på Grendatun.

– Han hadde gløymt snopesekken sin, og var ute og leita etter den. Heldigvis fann me han, og fekk levert både nissen og sekken her, fortel ho.


Lista seg inn på nissen

Linnea Emilie Frøyseth Olsen (9) og Lilja Sofie Teigland (7) gjorde ei stor oppdaging i dag.

– Eg såg julenissen då han tok på seg frakken. Så eg veit kven det er, seier Lilja.

Linnea veit òg kven nissen er.

– Det var Linnea som såg han. Så lista me oss inn på han for å finna ut kven det var, fortel Lilja.


Elskar snop

– Då var det vel ikkje like spanande då han kom hit med snop?

– Å, jo! Eg elskar snop, kjem det frå Linnea.

– Men ein ting som eg synest var litt rart, var at det var klementin i snopeposen, ler ho.

Dette tek Trine i forsvar.

– Det er ein god, gamal tradisjon det. Eg synest denne nissen er utruleg flink, meiner ho.

– Han var her førre helg og lagde god mat og bakte til julebordet vårt, smiler ho.


Fint høve til å samlast

Hilde Marie Flakket i styret i Uggdal bygdalag er veldig fornøgd med oppmøtet i år.

– Det er kjekt at så mange kom, seier ho.

Ho fortel at det er andre gong dei arrangerer fakkeltog.

– Det er eit fint høve til å samla bygdefolket, og ein fin start på førjulstida. Me er ganske heldige med vêret òg.

Det kom ein del regn då alle var komne på plass ved julegrana, men det gjorde ikkje noko.

– Men godt er det å komma inn i varmen, avsluttar ho.


AVSLØRT: Linnea Emilie Frøyseth Olsen (9) og Lilja Sofie Teigland (7) fortalde «Tysnes» at dei fann ut kven nissen var. Men det gjorde ikkje noko, for snop fekk dei likevel. T.h. Trine Fossdal, som leverte nissen til Grendatun så han kunne gje snop til alle dei snille borna.
AVSLØRT: Linnea Emilie Frøyseth Olsen (9) og Lilja Sofie Teigland (7) fortalde «Tysnes» at dei fann ut kven nissen var. Men det gjorde ikkje noko, for snop fekk dei likevel. T.h. Trine Fossdal, som leverte nissen til Grendatun så han kunne gje snop til alle dei snille borna.
VAKKERT: Fakkeltoget blei starta opp i fjor, og er ein tradisjon som er komen for å bli, i lag med den årlege julegrantenninga. Her er Kristine Trane ansvarleg for opptenning av faklane.
VAKKERT: Fakkeltoget blei starta opp i fjor, og er ein tradisjon som er komen for å bli, i lag med den årlege julegrantenninga. Her er Kristine Trane ansvarleg for opptenning av faklane.
JULEMUSIKK: Etter at ordførar Kåre Martin Kleppe tende julegrana, sette Tysnes Musikklag prikken over i-en med julesongar.
JULEMUSIKK: Etter at ordførar Kåre Martin Kleppe tende julegrana, sette Tysnes Musikklag prikken over i-en med julesongar.
FEKK SNOP: Siste høgdepunkt under julegrantenninga og fakkeltoget var då nissen kom innom Grendatun med snopesekken sin.
FEKK SNOP: Siste høgdepunkt under julegrantenninga og fakkeltoget var då nissen kom innom Grendatun med snopesekken sin.

Siste saker Gå til framsida