SPENTE: GLIMRAH gledde seg til å syngja eit vidt spekter av gamal folkemusikk, middelalder- og renessansetonar for tysnesingane under førjulskonserten med Tysnes Kammerkor i Tysnes kyrkje i går. (Alle foto: Ella Sandra Dahl Berland)
SPENTE: GLIMRAH gledde seg til å syngja eit vidt spekter av gamal folkemusikk, middelalder- og renessansetonar for tysnesingane under førjulskonserten med Tysnes Kammerkor i Tysnes kyrkje i går. (Alle foto: Ella Sandra Dahl Berland)

Glimrande, trass alt

– Det er noko av det beste publikummet eg har vore borti.
Publisert 01.12.2019 kl. 18.25.

Det seier musikalsk leiar i vokalensemblet GLIMRAH, Maria Malmsten.

Dei hadde førjulskonsert i lag med Tysnes Kammerkor i går, laurdag.

– Ein heilt fantastisk oppleving, og veldig bra publikum. Dei var så lydhøyre, skryt ho.


Stort oppmøte

Publikumsrosen byrja frå første stund, då Henrik Bartel i Tysnes Kammerkor ønskte velkomen til førjulskonserten i Tysnes kyrkje. På trass av mykje aktivitet i Våge med både julegateopning og skumringstur, var det nesten full kyrkje i år òg.

– Me er alltid like overraska, og veldig glade, seier Bartel.


Spanande

GLIMRAH var litt vingjeklyppte under konserten i går, fordi A og H var borte. Malmsten fortel at GLIMR difor måtte improvisera ein del.

– Ettersom me er berre sju stykk jobbar me ganske intimt og lærer kvarandre sine stemmer.

Det kom godt med, for det blei mykje stemmebyting undervegs.

– Det var litt spanande, med tanke på at me var berre fem av sju. Men då skjerpar ein seg veldig, og me hadde ei veldig god oppleving, legg ho til.

– Og kammerkoret er eit flott kor som gjer eit stort og viktig arbeid på Tysnes med omkrins. Dei skapar ei utruleg fin stemning, og konsertane eg har vore på er vel samansette og har ei fin ramme, avsluttar ho.


Endå meir julestemning

Else Karin Hystad Nesse og Roald Nesse frå Neshamn var blant dei som tok turen til Tysnes kyrkje for å høyra på Tysnes Kammerkor.

– Det var kjempeflott! seier dei.

Dei hadde ikkje høyrt GLIMRAH før, men var godt nøgde med konserten frå a til å.

– Dei var veldig flinke, og det var fantastisk vakkert å høyra på. Me er her hovudsakleg fordi dottera vår Karianne syng i koret. Og det er ein fin introduksjon til jula, fortel dei.

– No har me vore på julegateopninga i Våge, med nisser og julestemning, og så fekk me endå litt meir julestemning her, smiler dei.


SUKSESS: Tysnes Kammerkor, ved dirigent Trent Bruner, song for ei nær fullsett kyrkje.
SUKSESS: Tysnes Kammerkor, ved dirigent Trent Bruner, song for ei nær fullsett kyrkje.
BERRE GLIMR: A og H i GLIMRAH kunne ikkje stilla på førjulskonserten, men det gjekk ikkje ut over kvaliteteten. F.v. Maria Malmsten, Lene Taranger Bernhardsen, Gjertrud Sydnes Furdal, Renate Koløy og Ingvild Toskedal.
BERRE GLIMR: A og H i GLIMRAH kunne ikkje stilla på førjulskonserten, men det gjekk ikkje ut over kvaliteteten. F.v. Maria Malmsten, Lene Taranger Bernhardsen, Gjertrud Sydnes Furdal, Renate Koløy og Ingvild Toskedal.
– FANTASTISK VAKKERT: Else Karin Hystad Nesse og Roald Nesse frå Neshamn var godt nøgde med konsertopplevinga.
– FANTASTISK VAKKERT: Else Karin Hystad Nesse og Roald Nesse frå Neshamn var godt nøgde med konsertopplevinga.
FRÅ OSTERØY: Jurgita Bubilaite stilte som pianist for Tysnes Kammerkor denne førjulskvelden.
FRÅ OSTERØY: Jurgita Bubilaite stilte som pianist for Tysnes Kammerkor denne førjulskvelden.

Siste saker Gå til framsida