FORSEGGJORD: Andreas Fauske har sett seg lei på å laga tradisjonelle peparkakehus, og klinka til med ein modell av nyeferja «Kommandøren» til peparkakebyen i Våge. (Foto: Ella Sandra Dahl Berland)
FORSEGGJORD: Andreas Fauske har sett seg lei på å laga tradisjonelle peparkakehus, og klinka til med ein modell av nyeferja «Kommandøren» til peparkakebyen i Våge. (Foto: Ella Sandra Dahl Berland)

Tok det på fri fantasi, og på trass

– Det er første gong eg har montert peparkaker med loddebolt.
Publisert 06.12.2019 kl. 06.00.

Andreas Fauske tok peparkakebakinga til eit nytt nivå då han stilte med ein modell av nyeferja til peparkakebyen i Våge.

– Det har berre teke rundt to dagar. Eg laga litt delar no og litt då, og så gjekk det ein kveld til montering, seier han.


Takknemleg materiale

Livbåtar, livbøyar, styrhus, lykter, feltmerking. Alle detaljar er med. Og alt er laga med utgangspunkt i bilete frå nettet.

– Det er jo peparkakedeig, så du blir tilgitt alle feil. Målmessig er det ingenting som er riktig, unnskuldar han seg.

– Eg tok det berre på fri fantasi og på trass, rett og slett.


Kjekt å ta ferja

Grunnen til at det blei ein modell av «Kommandøren», er at han har sett seg lei av å laga peparkakehus. Andreas jobbar i Lerøy, og i fjor laga han ein oppdrettsbåt, og ymse anna, inkludert det tradisjonelle peparkakehuset.

– Ungande spurde, «Kva skal du laga i år?». Det kjem ei ny ferje no, og eg synest det er kjekt å ta ferja. Så blei det det, fortel han.

– Me lagar jo peparkakehus kvart år. Så eg fann ut at i år skal eg gjera noko skikkeleg. Men det er berre på gøy. Det er første gongen eg har laga noko så stort, då. Men eg likar å putla på, smiler han.


Pappa sitt prosjekt

– Så ungane har ikkje vore med på å hjelpa? – Eg har ein tendens til å bli litt overivrig, humrar han.

– Dei har følgt nøye med heile vegen, men dei har ikkje spurt om dei fekk lov å pynta. Dei har nok skjønt at dette er pappa sitt prosjekt. Dei har laga peparkakehus, då. Og me skal laga meir fram mot jul, forsikrar han.

Jenta på seks er mest oppteken av å eta peparkakene, fortel han. Difor blei det godt motteke at det blei mykje avkapp under arbeidet med nyeferja.

– Ho eldste på snart ni var veldig oppteken av at ho skulle byggja bilane om bord, fortel han.


Treng ikkje reisa til by’n

Andreas er veldig glad i jul, fortel han. Og peparkaker er ein viktig del av førjulstida.

– Det har jo vore førjulstid heilt sidan september, ler han.

Men på heimefronten venta dei med å pynta til sist torsdag.

– Kvart år har me juleverkstad med vener, og har fokus på å slappa av i jula. Jul blir det uansett kor mykje ein gjer ut av det, seier han.

Forutan juleverkstad og peparkakebaking har familien ein fast tradisjon med å dra til Bergen og sjå peparkakebyen der.

– Men det er litt greitt at me kan visa oss fram her òg, og at me ikkje treng å reisa til by’n for alt mogleg. Det er det jo ingen vits i.


Bryr seg ikkje om konkurransen

Før Andreas stilte med bidraget til peparkakebyen, hadde han inga aning om at han er med i konkurransen om beste bidrag.

– Det hadde eg ikkje peiling på. Men det tenkjer eg ikkje på, seier han.

– Det er barnehagebarna som fortener å vinna. Dei har lagt mykje meir i det. Her har du born på to år, utan utvikla auge-hand-koordinasjon som har laga ting som blei kjempefint. Det synest eg er ei mykje meir imponerande bragd enn noko anna, meiner han.

– Og jula er jo for ungane, avsluttar han.


PÅ AUGEMÅL: Alle detaljar er med, og heile ferja er montert utan korrekte mål. – Det er jo peparkakedeig, så du blir tilgitt alle feil.
PÅ AUGEMÅL: Alle detaljar er med, og heile ferja er montert utan korrekte mål. – Det er jo peparkakedeig, så du blir tilgitt alle feil.

Siste saker Gå til framsida

Alex Lunde blir ny regiondirektør i Norconsult

Etter ein prosess med mange gode søknadar, frå både interne og eksterne kandidatar, er det no klart at Alex Lunde får jobben som direktør for region vest i Norconsult. Han er eit kjent fjes for mange tysnesingar ettersom han har slektsrøter her, og ofte legg turen til Tysnes når han har fri. Alex Lunde tek over direktørjobben etter Jens Kvarekvål, som skal fortsetja med andre spennande...

Desse hadde flest turar til Ramnanuten

Frank Hustad har igjen gjort ein stor skrifttydingsjobb, og kome fram til at det var desse 12 som gjekk mest til Ramnanuten i 2019: Ingunn Meland – 81Marita Nygård – 39Frank Hustad – 37Anette Kårstad – 24Kari Lande – 24Mathias Bakke – 23Oliver Fagerbakk – 19May-Lill Bergesen – 19Vibecke M. Gjerstad – 18Morten Bondhus –...