GREPA KVINNE: Lista er lang over kva Unni Langballe (73) engasjerer seg i. Hennar siste prosjekt var å strikka fire teppe til Nepal, og tjue luer og labbar til ein barneheim i Ukraina. (Foto: Camilla Korsnes)
GREPA KVINNE: Lista er lang over kva Unni Langballe (73) engasjerer seg i. Hennar siste prosjekt var å strikka fire teppe til Nepal, og tjue luer og labbar til ein barneheim i Ukraina. (Foto: Camilla Korsnes)

– Eg kan jo ikkje berre sitja her til pynt

Unni Langballe får årets første juleblom.
Publisert 07.12.2019 kl. 06.00.

– Ho vil eg nominera fordi ho er så aktiv. Ho har vore bøsseberar i fleire år, og er frivillig når ungane har lunsj på skulane. Ho er aktiv på Tysnesfest, og i bedehuset når dei har arrangement der.

Dette er noko av grunngjevinga Eva Lande lister opp når ho ringjer til «Tysnes» for å nominera Unni.

– Og elles når det er messe og tilstellingar i bedehuset er det berre til å ringja. Då kjem Unni og hjelper til, held ho fram.


Må hjelpa

Me vitjar Unni ein føremiddag for å overrekkja blomen, og lesa opp nominasjonen for ho. Men først insisterer ho på å servera ein kopp kaffi og noko å bita i.

– Eg blei veldig glad. Det er kjekt at nokon ser at du står på, smiler ho hjarteleg, når me set oss ned.

– Eg kan jo ikkje berre sitja her til pynt, ler ho.

– Viss noko skal skje, må ein vera med og hjelpa til. Sånn er det berre.


Fort gjort

Me fortset å lesa opp grunngjevinga for nominasjonen.

– Eg er no blitt ei litt eldre dame, og køyrer ikkje bil. Skal eg noko, er det berre til å ringja Unni, så står ho klar. Ho er òg bestemor til tre barnebarn som ho hentar og bringar til musikkøving, handball, fotball og dans.

Unni er snar med å kommentera.

– Ein kjem seg jo ingen veg utan bil. Eva er 83 år. Og det er fort gjort for meg å køyra, seier ho.

– Eg har ei svigerdotter som jobbar skift på sjukehuset på Stord, held ho fram.

– Det passar ikkje alltid inn. No byrjar borna å bli større, og klarar seg meir sjølv. Men skal ein opp til Uggdal er det ikkje berre berre.


– Det er jo ganske enkelt

Lista over kva Unni engasjerer seg i, går endå lenger.

– Ho er ikkje minst aktiv i styret i bygdekvinnelaget. Ho er eit ja-menneske som seier ja uansett kva du spør om. Eg skulle gjerne nemnt mykje meir. Ho er fleire og sytti år, og eg synest ho er veldig aktiv. Ho stiller opp på det meste, i alle lag og organisasjonar, avsluttar Eva.

– Me må jo hjelpa kvarandre, seier no eg. Det er jo ganske enkelt, smiler Unni.


Strikkar til Nepal

Ho fortel at det gir ei god kjensle å gjera noko fornuftig. Kvar gong ho sit med tv-en på, strikkar ho.

– Elles sit du der med hendene i fanget til unyttig tid. Eg er lært opp til å gjera noko, alltid. Då er det sutalaust å laga desse teppa, seier ho.

Ho viser oss fire teppe som ho har strikka til Nepal. Og fram kjem ein svær pose med luer og labbar som ho har strikka til ein barneheim i Ukraina.

– Du kan jo ikkje berre gå rundt og dulla. Eller sjølvsagt, eg kunne jo ha sete her og lese og strikka heile dagen, og hatt nok med meg sjølv, men det er noko med å vita at i dag har eg gjort noko meiningsfylt.

– Du strikkar, du køyrer, du steikar vaflar. Kva meir?

– Det er venskap du skal pleia, og så skal du lesa litt. Eg likar å lesa, og veit eg får ei bok til jul. Dagene går frykteleg fort, synest eg, avsluttar ho.


Siste saker Gå til framsida

Alex Lunde blir ny regiondirektør i Norconsult

Etter ein prosess med mange gode søknadar, frå både interne og eksterne kandidatar, er det no klart at Alex Lunde får jobben som direktør for region vest i Norconsult. Han er eit kjent fjes for mange tysnesingar ettersom han har slektsrøter her, og ofte legg turen til Tysnes når han har fri. Alex Lunde tek over direktørjobben etter Jens Kvarekvål, som skal fortsetja med andre spennande...

Desse hadde flest turar til Ramnanuten

Frank Hustad har igjen gjort ein stor skrifttydingsjobb, og kome fram til at det var desse 12 som gjekk mest til Ramnanuten i 2019: Ingunn Meland – 81Marita Nygård – 39Frank Hustad – 37Anette Kårstad – 24Kari Lande – 24Mathias Bakke – 23Oliver Fagerbakk – 19May-Lill Bergesen – 19Vibecke M. Gjerstad – 18Morten Bondhus –...